ਪੰਜਾਬੀ ਖ਼ਬਰਸਾਰ ਬਿਊਰੋ
ਸ਼੍ਰੀ ਅੰਮਿ੍ਰਤਸਰ ਸਾਹਿਬ, 18 ਮਈ:-ਦੇਸ ਦੀ ਵੰਡ ਵੇਲੇ ਹੋਏ ਖੂਨ ਖਰਾਬੇ ਦੌਰਾਨ ਪਾਕਿਸਤਾਨ ਤੋਂ ਭਾਰਤ ਵਾਲੇ ਪਾਸੇ ਆਉਣ ਸਮੇਂ ਬਚਪਨ ’ਚ ਹੀ ਪ੍ਰਵਾਰ ਨਾਲੋਂ ਵਿਛੜ ਇੱਕ ਬਜੁਰਗ ਔਰਤ 75 ਸਾਲਾਂ ਦੇ ਅਰਸੇ ਬਾਅਦ ਅਪਣੇ ਭਰਾਵਾਂ ਨੂੰ ਕਰਤਾਰਪੁਰ ਸਾਹਿਬ ਵਿਖੇ ਮਿਲੀ। ਪਾਕਿਸਤਾਨੀ ਮੀਡੀਆ ਦੀਆਂ ਰੀਪੋਰਟਾਂ ਮੁਤਾਬਕ ਮੁਮਤਾਜ ਬੀਬੀ ਨਾਂ ਦੀ ਇਸ ਔਰਤ ਦੀ ਮਾਂ 1947 ਸਮੇਂ ਕਤਲ ਕਰ ਦਿੱਤਾ ਗਿਆ ਤੇ ਦੂਜਾ ਪ੍ਰਵਾਰ ਬਚਦਾ-ਬਚਾਉਂਦਾ ਇਧਰਲੇ ਪੰਜਾਬ ਪੁੱਜ ਗਿਆ ਪ੍ਰੰਤੂ ਮਾਂ ਦੀ ਲਾਸ਼ ’ਤੇ ਰੋ ਰਹੀ ਬੱਚੀ ’ਤੇ ਤਰਸ ਖ਼ਾਦਿਆਂ ਇੱਕ ਮੁਸਮਿਲ ਪ੍ਰਵਾਰ ਨੇ ਇਸਨੂੰ ਅਪਣੇ ਨਾਲ ਲੈ ਗਏ। ਉਸਨੂੰ ਗੋਦ ਲੈਣ ਵਾਲੇ ਮੁਹੰਮਦ ਇਕਬਾਲ ਅਤੇ ਉਸ ਦੀ ਪਤਨੀ ਅੱਲ੍ਹਾ ਰਾਖੀ ਨੇ ਇਸ ਬੱਚੀ ਦਾ ਨਾਮ ਮੁਮਤਾਜ ਰੱਖਿਆ ਤੇ ਉਸਨੂੰ ਅਪਣੀ ਬੱਚੀ ਦੀ ਤਰ੍ਹਾਂ ਹੀ ਪਾਲਿਆ-ਪੋਸਿਆ ਅਤੇ ਵਿਆਹ ਕੀਤਾ। ਮੌਜੂਦਾ ਸਮੇਂ ਮੁਮਤਾਜ ਪਾਕਿਸਤਾਨੀ ਪੰਜਾਬ ਦੇ ਸੇਖਪੁਰਾ ਜਿਲ੍ਹੇ ਦੇ ਇੱਕ ਪਿੰਡ ਵਿਚ ਰਹਿੰਦੀ ਦੱਸੀ ਜਾ ਰਹੀ ਹੈ। ਪਤਾ ਲੱਗਿਆ ਹੈ ਕਿ ਫ਼ਿਲਮੀ ਕਹਾਣੀ ਦੀ ਤਰ੍ਹਾਂ ਮੁਮਤਾਜ਼ ਬੀਬੀ ਦੀ ਜਿੰਦਗੀ ਵਿਚ ਉਸ ਸਮੇਂ ਇੱਕ ਵੱਡਾ ਮੋੜ ਆਇਆ ਜਦ ਉਸਦੇ ਧਰਮੀ ਬਾਬਲ ਮੁਹੰਮਦ ਇਕਬਾਲ ਨੇ ਉਸਨੂੰ ਦਸਿਆ ਕਿ ਉਹ ਉਸ ਦੀ ਅਸਲੀ ਬੇਟੀ ਨਹੀਂ ਹੈ, ਬਲਕਿ ਉਸਦਾ ਤਾਲੁਕਾਤ ਇੱਕ ਸਿੱਖ ਪ੍ਰਵਾਰ ਨਾਲ ਸੀ ਤੇ ਉਸਦੀ ਜਾਨ ਬਚਾਉਣ ਲਈ ਉਹ ਅਪਣੇ ਨਾਲ ਲੈ ਆਇਆ ਸੀ। ਇਹ ਸੁਣਦੇ ਹੀ ਮੁਮਤਾਜ ਬੀਬੀ ’ਤੇ ਜਿਵੇਂ ਪਹਾੜ ਟੁੱਟ ਪਿਆ ਪ੍ਰੰਤੂ ਉਸਦੇ ਪ੍ਰਵਾਰ ਤੇ ਖ਼ਾਸਕਰ ਬੇਟੇ ਸਾਹਬਾਜ ਨੇ ਮਾਂ ਦਾ ਸਾਥ ਦਿੰਦਿਆਂ ਪਿਛਲੇ ਦੋ ਸਾਲਾਂ ਤੋਂ ਹੀ ਮੁਮਤਾਜ ਬੀਬੀ ਦੇ ਪ੍ਰਵਾਰ ਨੂੰ ਲੱਬਣ ਲਈ ਭੱਜਦੋੜ ਕੀਤੀ ਜਾ ਰਹੀ ਸੀ। ਇਸ ਦੌਰਾਨ ਸੋਸਲ ਮੀਡੀਆ ਰਾਹੀਂ ਉਨਾਂ ਨੂੰ ਪਤਾ ਲੱਗਿਆ ਕਿ ਮੁਮਤਾਜ ਦੇ ਪ੍ਰਵਾਰ ਵਾਲੇ ਪਟਿਆਲਾ ਜ਼ਿਲ੍ਹੇ ਵਿਚ ਵਸ ਗਏ ਸਨ, ਜਿਸਤੋਂ ਬਾਅਦ ਦੋਨਾਂ ਪ੍ਰਵਾਰਾਂ ਵਿਚ ਸੰਪਰਕ ਹੋਇਆ ਤੇ ਹੁਣ ਉਸਦੇ ਅਸਲੀ ਭਰਾ ਕਰਤਾਰਪੁਰ ਸਾਹਿਬ ਮਿਲਣ ਗਏ ਸਨ, ਜਿੱਥੇ ਵਿਸੇਸ ਤੌਰ ’ਤੇ ਪੁੱਜੀ ਮੁਮਤਾਜ ਬੀਬੀ ਅਪਣੇ ਭਰਾ ਗੁਰਮੀਤ ਸਿੰਘ ਤੇ ਹੋਰਨਾਂ ਦੇ ਗਲ ਲੱਗ ਬੱਚਿਆਂ ਵਾਂਗ ਰੋਈ। ਦੋਨਾਂ ਪ੍ਰਵਾਰਾਂ ਨੇ ਇਸ ਮੌਕੇ ਪ੍ਰਮਾਤਮਾ ਦਾ ਸ਼ੁਕਰ ਕੀਤਾ।
Share the post "75 ਸਾਲਾਂ ਬਾਅਦ ਪ੍ਰਵਾਰ ਨਾਲੋਂ ਵਿਛੜੀ ਭੈਣ ਕਰਤਾਰਪੁਰ ਸਾਹਿਬ ’ਚ ਭਰਾਵਾਂ ਨੂੰ ਮਿਲੀ"
