ਮੱਝਾਂ ਗਾਵਾਂ ਦਾ ਦੁੱਧ ਵਧਾਉਣ ਲਈ ਲਗਾਉਣ ਵਾਲੇ ਨਕਲੀ ਟੀਕੇ ਬਰਾਮਦ

ਸੁਖਜਿੰਦਰ ਮਾਨ
ਬਠਿੰਡਾ, 24 ਮਾਰਚ: ਸਥਾਨਕ ਪੁਲਿਸ ਨੇ ਪਿਛਲੇ ਲੰਮੇ ਸਮਂੇ ਤੋਂ ਬੈਨ ਕੀਤੇ ਹੋਏ ਮੱਝਾਂ ਤੇ ਗਾਵਾਂ ਦਾ ਦੁੱਧ ਵਧਾਉਣ ਲਈ ਵਰਤੇ ਜਾਣ ਵਾਲੇ ਆਕਸੀਟਾਸਨ ਦੇ ਨਾਂ ਹੇਠ ਨਕਲੀ ਟੀਕਿਆਂ ਦੀ ਵੱਡੀ ਖੇਪ ਬਰਾਮਦ ਕੀਤੀ ਹੈ। ਪੁਲਿਸ ਅਧਿਕਾਰੀਆਂ ਮੁਤਾਬਕ ਇੰਨ੍ਹਾਂ ਨਕਲੀ ਟੀਕਿਆਂ ਨੂੰ ਤਿਆਰ ਕਰਵਾਉਣ ਵਾਲੇ ਗਿਰੋਹ ਦਾ ਸਰਗਨਾ ਸਥਾਨਕ ਸ਼ਹਿਰ ਦਾ ਹੀ ਇੱਕ ਡੇਅਰੀ ਸੰਚਾਲਕ ਹੈ। ਪੁਲਿਸ ਨੇ ਇਸ ਮਾਮਲੇ ਵਿਚ ਚਾਰ ਵਿਅਕਤੀਆਂ ਵਿਰੁਧ ਕੇਸ ਦਰਜ਼ ਕਰਦਿਆਂ ਦੋ ਜਣਿਆਂ ਨੂੰ ਗਿ੍ਰਫਤਾਰ ਕਰ ਲਿਆ ਹੈ। ਮੌਕੇ ਤੋਂ ਪੁਲਿਸ ਨੂੰ ਨਕਲੀ ਟੀਕਿਆਂ ਦੀਆਂ 130 ਸ਼ੀਸ਼ੀਆਂ ਵੀ ਬਰਾਮਦ ਹੋਈਆਂ ਹਨ। ਮਾਮਲੇ ਦੀ ਜਾਂਚ ਕਰ ਰਹੇ ਥਾਣਾ ਥਰਮਲ ਦੇ ਏਐੱਸਆਈ ਵਿਸ਼ਨੂੰ ਦਾਸ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਇੱਕ ਗੁਪਤ ਸੂਚਨਾ ਦੇ ਆਧਾਰ ’ਤੇ ਗੁਰੂ ਨਾਨਕ ਨਗਰ ਸਥਿਤ ਇਕ ਫੈਕਟਰੀ ਵਿਚ ਇਹ ਛਾਪੇਮਾਰੀ ਕੀਤੀ ਗਈ ਸੀ। ਉਨ੍ਹਾਂ ਦਸਿਆ ਕਿ ਇੰਨ੍ਹਾਂ ਟੀਕਿਆਂ ਦਾ ਉਪਯੋਗ ਪਸ਼ੂਆਂ ਤੋਂ ਵੱਧ ਦੁੱਧ ਲੈਣ ਲਈ ਕੀਤਾ ਜਾਂਦਾ ਹੈ। ਉਨ੍ਹਾਂ ਦਸਿਆ ਕਿ ਫੈਕਟਰੀ ਵਿਚ ਛਾਪੇਮਾਰੀ ਦੌਰਾਨ ਕਥਿਤ ਦੋਸ਼ੀ ਰਾਜ ਕੁਮਾਰ ਯਾਦਵ ਤੇ ਅਕਸ਼ੈ ਕੁਮਾਰ ਵਾਸੀ ਗੁਰੂ ਨਾਨਕ ਨਗਰ ਨੂੰ ਗਿ੍ਰਫਤਾਰ ਕਰ ਲਿਆ ਗਿਆ ਹੈ। ਪੁੱਛ ਪੜਤਾਲ ਦੌਰਾਨ ਇਹ ਪਤਾ ਲੱਗਿਆ ਹੈ ਕਿ ਇਹ ਫੈਟਰੀ ਪ੍ਰਸ਼ੋਤਮ ਦਾਸ ਵਾਸੀ ਪਰਸਰਾਮ ਨਗਰ ਨਾਂ ਦੇ ਵਿਅਕਤੀ ਹੈ, ਜਿਸਦੇ ਇਸ਼ਾਰੇ ’ਤੇ ਇਹ ਨਕਲੀ ਟੀਕੇ ਬਣਦੇ ਸਨ। ਇੱਥੇ ਦਸਣਾ ਬਣਦਾ ਹੈ ਕਿ ਕਰੀਬ ਚਾਰ ਸਾਲ ਪਹਿਲਾਂ ਵੀ ਸ਼ਹਿਰ ਦੇ ਪ੍ਰਤਾਪ ਨਗਰ ਇਲਾਕੇ ਵਿਚ ਇੰਨ੍ਹਾਂ ਨਕਲੀ ਟੀਕਿਆਂ ਦੀ ਇੱਕ ਵੱਡੀ ਖੇਪ ਫ਼ੜੀ ਗਈ ਸੀ। ਜਦੋਂਕਿ ਹਾਲੇ ਕੁੱਝ ਦਿਨ ਪਹਿਲਾਂ ਵੀ ਰੇਲਵੇ ਵਿਭਾਗ ਦੇ ਪਾਰਸਲ ਹਾਊਸ ‘ਚੋਂ ਬਿਹਾਰ ਤੋਂ ਇੰਨ੍ਹਾਂ ਪਾਬੰਦੀਸੁਦਾ ਟੀਕਿਆਂ ਦੀਆਂ ਆਈਆਂ 15 ਪੇਟੀਆਂ ਬਰਾਮਦ ਕੀਤੀਆਂ ਗਈਆਂ ਸਨ ਪ੍ਰੰਤੂ ਹਾਲੇ ਤੱਕ ਇਨ੍ਹਾਂ ਨੂੰ ਭੇਜਣ ਤੇ ਮੰਗਵਾਉਣ ਵਾਲਿਆਂ ਦਾ ਪੁਲਿਸ ਨੂੰ ਪਤਾ ਨਹੀਂ ਚੱਲ ਸਕਿਆ ਹੈ।