ਸੰਘਰਸ਼ ਤੋਂ ਬਾਅਦ ਲਹਿਰਾ ਬੇਗਾ ਟੋਲ ਪਲਾਜ਼ਾ ਵਾਲਿਆਂ ਨੇ ਮੰਡੀਆਂ ਵਾਲਿਆਂ ਦੀ ਮੰਨੀ ਮੰਗ
ਰਿਹਾਇਸ਼ ਦੀ ਸਿਨਾਖ਼ਤ ਦਿਖਾਉਣ ਤੋਂ ਬਾਅਦ ਨਹੀਂ ਲੱਗੇਗੀ ਟੋਲ ਪਰਚੀ
ਸੁਖਜਿੰਦਰ ਮਾਨ
ਬਠਿੰਡਾ, 28 ਮਈ: ਬਠਿੰਡਾ ਜ਼ਿਲ੍ਹੇ ਦੀ ਹੱਦ ’ਤੇ ਚੰਡੀਗੜ੍ਹ ਮਾਰਗ ਉਪਰ ਪੈਂਦੇ ਪਿੰਡ ਲਹਿਰਾ ਬੇਗਾ ਕੋਲ ਚੱਲਦੇ ਟੋਲ ਪਲਾਜ਼ਾ ‘ਤੇ ਹੁਣ ਭੁੱਚੋ ਮੰਡੀ ਦੇ ਸ਼ਹਿਰੀਆਂ ਦੀ ਟੋਲ ਪਰਚੀ ਨਹੀਂ ਲੱਗੇਗੀ। ਦਰਜ਼ਨਾਂ ਵਾਰ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਅਰਜ਼ੀਆਂ ਦੇਣ ਦੇ ਬਾਵਜੂਦ ਨਿਯਮਾਂ ਤਹਿਤ 20 ਕਿਲੋਮੀਟਰ ਦੇ ਦਾਈਰੇ ਵਿਚ ਰਹਿੰਦੇ ਲੋਕਾਂ ਦੀ ਟੋਲ ਪਰਚੀ ਫ਼ਰੀ ਹੋਣ ਦੇ ਬਾਵਜੂਦ ਭੁੱਚੋ ਮੰਡੀਆਂ ਵਾਸੀਆਂ ਦੀਆਂ ਜੇਬਾਂ ਹਲਕੀਆਂ ਕਰ ਰਹੇ ਟੋਲ ਕਾਮਿਆਂ ਦੇ ਰਵੱਈਏ ਵਿਰੁਧ ਅੱਜ ਸ਼ਹਿਰੀਆਂ ਵਲੋਂ ਹੋਰਨਾਂ ਜਥੇਬੰਦੀਆਂ ਦੇ ਸਹਿਯੋਗ ਨਾਲ ਟੋਲ ’ਤੇ ਧਰਨਾ ਲਗਾ ਦਿੱਤਾ। ਕਾਫ਼ੀ ਲੰਮੀ ਜਦੋਜਹਿਦ ਤੋਂ ਬਾਅਦ ਟੋਲ ਪ੍ਰਬੰਧਕ ਭੁੱਚੋਂ ਮੰਡੀ ’ਚ ਰਹਿਣ ਵਾਲੇ ਸ਼ਹਿਰੀਆਂ ਦੀ ਟੋਲ ਪਰਚੀ ਨਾ ਕੱਟਣ ਲਈ ਸਹਿਮਤ ਹੋਏ। ਇਸ ਮੌਕੇ ਫੈਸਲਾ ਹੋਇਆ ਕਿ ਇੱਥੋਂ ਗੁਜਰਨ ਵਾਲੇ ਭੁੱਚੋਂ ਵਾਸੀਆਂ ਨੂੰ ਅਪਣੀ ਰਿਹਾਇਸ਼ ਦਾ ਸਬੂਤ ਦਿਖਾਉਣਾ ਪਏਗਾ। ਦਸਣਾ ਬਣਦਾ ਹੈ ਕਿ ਇਸਤੋਂ ਪਹਿਲਾਂ ਬੀਤੇ ਕੱਲ ਮਹਿਰਾਜ਼ ਵਾਸੀਆਂ ਨੇ ਟੋਲ ’ਤੇ ਇਕੱਠੇ ਹੋ ਕੇ ਧਰਨਾ ਲਗਾ ਦਿੱਤਾ ਸੀ। ਜਿਸਤੋਂ ਬਾਅਦ ਉਨ੍ਹਾਂ ਦੀ ਵੀ ਟੋਲ ਪਰਚੀ ਫ਼ਰੀ ਕਰ ਦਿੱਤੀ ਸੀ। ਅੱਜ ਦੇ ਧਰਨੇ ਵਿਚ ਭੁੱਚੋ ਮੰਡੀ ਵਾਸੀਆਂ ਤੋਂ ਇਲਾਵਾ ਸਹਿਯੋਗ ਲਈ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਵਰਕਰ ਵੀ ਵੱਡੀ ਗਿਣਤੀ ਵਿਚ ਲਹਿਰਾ ਬੇਗਾ ਟੋਲ ਪਲਾਜ਼ਾ ‘ਤੇ ਸਵੇਰ ਤੋਂ ਹੀ ਡਟੇ ਹੋਏ ਸਨ।
Share the post "ਮਹਿਰਾਜ ਤੇ ਲਹਿਰਾ ਬੇਗਾ ਤੋਂ ਬਾਅਦ ਹੁਣ ਭੁੱਚੋਂ ਮੰਡੀਆਂ ਵਾਲਿਆਂ ਦੀ ਵੀ ਨਹੀਂ ਲੱਗੇਗੀ ਟੋਲ ਪਰਚੀ"
