ਬਠਿੰਡਾ ਪੁਲਿਸ ਨੇ ਪਟਾਕੇ ਪਾਉਣ ਵਾਲੇ ਬੁਲੈਟ ਮੋਟਰਸਾਈਕਲ ਚਾਲਕਾਂ ਵਿਰੁਧ ਵਿੱਢੀ ਮੁਹਿੰਮ

ਦਰਜ਼ਨਾਂ ਚਾਲਕਾਂ ਦੇ ਕੱਟੇ ਚਲਾਨ, ਦਰਜ਼ਨ ਮੋਟਰਸਾਈਕਲੇ ਕੀਤੇ ਬੰਦ
ਸੁਖਜਿੰਦਰ ਮਾਨ
ਬਠਿੰਡਾ, 8 ਜੂਨ: ਪਿਛਲੇ ਦਿਨੀਂ ਏਡੀਜੀਪੀ ਟਰੈਫ਼ਿਕ ਵਲੋਂ ਪਟਾਕੇ ਪਾਉਣ ਵਾਲੇ ਬੁਲੇਟ ਮੋਟਰਸਾਈਕਲ ਚਾਲਕਾਂ ਵਿਰੁਧ ਦਿੱਤੇ ਸਖ਼ਤੀ ਦੇ ਆਦੇਸ਼ ਤੋਂ ਬਾਅਦ ਅੱਜ ਸਥਾਨਕ ਟਰੈਫ਼ਿਕ ਪੁਲਿਸ ਵਲੋਂ ਵਿਸੇਸ ਮੁਹਿੰਮ ਵਿੱਢੀ ਗਈ। ਇਸ ਮੂਹਿੰਮ ਤਹਿਤ ਸਿਟੀ ਟਰੈਫ਼ਿਕ ਇੰਚਾਰਜ਼ ਸਬ ਇੰਸਪੈਕਟਰ ਅਮਰੀਕ ਸਿੰਘ ਦੀ ਅਗਵਾਈ ਹੇਠ ਸਥਾਨਕ ਸ਼ਹੀਦ ਨੰਦ ਸਿੰਘ ਦੇ ਬੁੱਤ ਕੋਲ ਨਾਕਾਬੰਦੀ ਕੀਤੀ ਗਈ। ਇਸ ਦੌਰਾਨ ਇੱਥੇ ਗੁਜਰਨ ਵਾਲੇ ਹਰ ਬੁਲੇਟ ਮੋਟਰਸਾਈਕਲ ਦੀ ਜਾਂਚ ਕੀਤੀ ਗਈ। ਜਿਸਦੇ ਵਿਚ ਉਸਦੇ ਸਲੰਸਰ ਨੂੰ ਚੈਕ ਕੀਤਾ ਗਿਆ ਕਿ ਇਹ ਕੰਪਨੀ ਫ਼ਿਟਡ ਹੈ ਜਾਂ ਇਸਨੂੰ ਮਾਡੀਫ਼ਾਈ ਕੀਤਾ ਗਿਆ ਹੈ। ਟਰੈਫ਼ਿਕ ਇੰਚਾਰਜ਼ ਅਮਰੀਕ ਸਿੰਘ ਨੇ ਦਸਿਆ ਕਿ ਸ਼ਾਮ ਤੱਕ ਕਰੀਬ 100 ਚਲਾਨ ਕੀਤੇ ਗਏ ਹਨ, ਜਿੰਨ੍ਹਾਂ ਦੇ ਸਲੰਸਰਾਂ ਵਿਚ ਛੇੜਛਾੜ ਕੀਤੀ ਗਈ ਹੈ। ਇਸਤੋਂ ਇਲਾਵਾ ਮੋਟਰਵਹੀਕਲ ਐਕਟ 207 ਤਹਿਤ ਇੱਕ ਦਰਜ਼ਨ ਮੋਟਰਸਾਈਕਲ ਵੱਖ ਵੱਖ ਥਾਣਿਆਂ ਵਿਚ ਬੰਦ ਕੀਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਹਾਈਕੋਰਟ ਦੇ ਨਿਯਮਾਂ ਤਹਿਤ ਹੁਣ ਇਕੱਲੇ ਮੋਟਰਸਾਈਕਲ ਚਾਲਕਾਂ ਵਿਰੁਧ ਹੀ ਕਾਰਵਾਈ ਨਹੀਂ ਹੋਵੇਗੀ, ਬਲਕਿ ਜਿੰਨ੍ਹਾਂ ਮੋਟਰਸਾਈਕਲਾਂ ਨੂੰ ਬੰਦ ਕੀਤਾ ਗਿਆ ਹੈ, ਉਨ੍ਹਾਂ ਦੇ ਮਾਲਕਾਂ ਤੋਂ ਪੁਛ ਪੜਤਾਲ ਤੋਂ ਬਾਅਦ ਕਿ ਸਲੰਸਰਾਂ ਵਿਚ ਇਹ ਛੇੜਛਾੜ ਕਿਹੜੇ ਮਕੈਨਿਕਾਂ ਵਲੋਂ ਕੀਤੀ ਗਈ ਹੈ, ਤਾਂ ਅਜਿਹੇ ਮਕੈਨਿਕਾਂ ਵਿਰੁਧ ਵੀ ਧਾਰਾ 188 ਤਹਿਤ ਕੇਸ ਦਰਜ਼ ਕੀਤੇ ਜਾਣਗੇ।