ਮੁਫ਼ਤ ਬਿਜਲੀ ਦਾ ਜਾਰੀ ਹੋਇਆ ਨੋਟੀਫਿਕੇਸ਼ਨ, ਸਭ ਨੂੰ ਮਿਲੇਗੀ 600 ਯੂਨਿਟ

ਐਸ.ਸੀ, ਬੀ.ਸੀ ਤੇ ਸੁਤੰਤਰਤਾ ਸੈਨਾਨੀਆਂ ਦੀ ਕਿਲੋਵਾਟ ਦੀ ਸ਼ਰਤ ’ਤੇ ਕੀਤੀ ਖ਼ਤਮ
ਸੁਖਜਿੰਦਰ ਮਾਨ
ਚੰਡੀਗੜ, 12 ਜੁਲਾਈ : ਚੋਣਾਂ ਤੋਂ ਪਹਿਲਾਂ ਹਰੇਕ ਪੰਜਾਬੀ ਨੂੰ 600 ਮੁਫ਼ਤ ਯੂਨਿਟ ਦੇਣ ਦੀ ਕੀਤੀ ਗਰੰਟੀ ਨੂੰ ਪੂਰਾ ਕਰਦਿਆਂ ਜਿੱਥੇ ਇਸ 1 ਜੁਲਾਈ ਤੋਂ ਬਾਅਦ ਇਸ ਵਾਅਦੇ ਨੂੰ ਲਾਗੂ ਕਰਨ ਦਾ ਐਲਾਨ ਕੀਤਾ ਸੀ, ਉਥੇ ਇਸ ਗਰੰਟੀ ਪੂਰਾ ਕਰਨ ਲਈ ਅੱਜ ਜਾਰੀ ਨੋਟੀਫਿਕੇਸ਼ਨ ’ਚ ਵੱਡੀ ਰਾਹਤ ਦਿੰਦਿਆਂ ਇੱਕ ਕਿਲੋਵਾਟ ਲੋਡ ਵਾਲੀ ਸ਼ਰਤ ਨੂੰ ਖ਼ਤਮ ਕਰ ਦਿੱਤਾ ਹੈੇ। ਜਾਰੀ ਨੋਟੀਫਿਕੇਸ਼ਨ ਵਿਚ ਬੇਸ਼ੱਕ ਜਨਰਲ ਵਰਗ ਦਾ ਕੋਈ ਵਿਸ਼ੇਸ ਜਿਕਰ ਨਹੀਂ ਕੀਤਾ ਗਿਆ, ਪ੍ਰੰਤੂ ਐੱਸਸੀ, ਬੀਸੀ, ਬੀਪੀਐੱਲ ਤੇ ਆਜਾਦੀ ਘੁਲਾਟੀਆਂ ਲਈ ਇਕ ਕਿੱਲੋਵਾਟ ਦੀ ਸ਼ਰਤ ਹਟਾ ਦਿੱਤੀ ਹੈ। ਦਸਣਾ ਬਣਦਾ ਹੈ ਕਿ ਪੰਜਾਬ ਸਰਕਾਰ ਵਲੋਂ ਇਹ ਮੁਫ਼ਤ 600 ਯੂਨਿਟ ਦੀ ਸਹੂਲਤ ਸਿਰਫ ਰਿਹਾਇਸ਼ੀ ਘਰਾਂ ਲਈ ਦਿੱਤੀ ਜਾਵੇਗੀ। ਗੌਰਤਲਬ ਹੈ ਕਿ ਇਸ ਮੁਫ਼ਤ ਗਰੰਟੀ ਦੀ ਇਸ ਸਕੀਮ ਵਿਚ ਜਨਰਲ ਵਰਗ ਲਈ ਸਭ ਤੋਂ ਵੱਡੀ ਸਮੱਸਿਆ ਇਹ ਹੈ ਕਿ ਜੇਕਰ 2 ਮਹੀਨਿਆਂ ਦੇ ਵਿਚ 600 ਯੂਨਿਟ ਤੋਂ ਇੱਕ ਵੀ ਯੂਨਿਟ ਵਧ ਜਾਂਦੀ ਹੈ ਤਾਂ ਸਾਰੀਆਂ ਯੂਨਿਟਾਂ ਦੇ ਪੈਸੇ ਦੇਣੇ ਪੈਣਗੇ।