Punjab News: ਪੂਰੇ ਵਿਸ਼ਵ ਦੀ ਸਭ ਤੋਂ ਵੱਡੀ ਰਾਜਨੀਤਕ ਜਮਾਤ ਦਾ ‘ਰਿਕਾਰਡ’ ਆਪਣੇ ਨਾਮ ਕਰਨ ਵਾਲੀ ਭਾਰਤੀ ਜਨਤਾ ਪਾਰਟੀ ਦਾ ਸਾਰਾ ਜ਼ੋਰ ਪੰਜਾਬ ਦੀ ‘ਸੱਤਾ’ ਹਾਸਲ ਕਰਨ ‘ਤੇ ਲੱਗਿਆ ਹੋਇਆ। ਕਿਸੇ ਸਮੇਂ ਮਰਹੂਮ ਪ੍ਰਕਾਸ਼ ਸਿੰਘ ਬਾਦਲ ਦੀ ਮਿਹਰਬਾਨੀ ਨਾਲ ਸ਼੍ਰੋਮਣੀ ਅਕਾਲੀ ਦੇ ਮੋਢਿਆ ‘ਤੇ ਸਵਾਰ ਹੋ ਕੇ ਪੰਜਾਬ ਵਿਚ ਮਜਬੂਤ ਸਿਆਸੀ ਪੈਰ ਜਮਾਉਣ ਵਾਲੀ ‘ਭਾਜਪਾ’ ਹੁਣ ਗਠਜੋੜ ਦੀ ਰਾਜਨੀਤੀ ਦੀ ਬਜਾਏ ਇਕੱਲਿਆ ਜਾਤੀ-ਗਠਜੋੜ ਅਤੇ ਡੇਰਿਆਂ ਦਾ ਜੋੜ-ਤੋੜ ਕਰਕੇ ਸਰਕਾਰ ਬਣਾਉਣ ਲਈ ਹਰ ਸੰਭਵ ਯਤਨ ਕਰ ਰਹੀ ਹੈ। ਦੱਖਣੀ ਭਾਰਤ ਤੱਕ ਕਾਂਗਰਸ ਤੇ ਸਥਾਨਕ ਪਾਰਟੀਆਂ ਨੂੰ ਵੱਡੀਆਂ ਚੁਣੌਤੀਆਂ ਦੇਣ ਤੋਂ ਬਾਅਦ ਹੁਣ ਭਾਜਪਾ ਦਾ ਇੱਕ ਨੁਕਾਤੀ ‘ਟੀਚਾ’ ਪੰਜਾਬ ਤੇ ਪੱਛਮੀ ਬੰਗਾਲ ਰਹਿ ਗਏ ਜਾਪਦੇ ਹਨ। ਤਿੰਨ ਖੇਤੀ ਬਿੱਲਾਂ ਕਾਰਨ ਪੰਜਾਬ ਦੇ ਕਿਸਾਨ ਵਰਗ (ਜਿਸਦਾ ਜਿਆਦਾਤਰ ਹਿੱਸਾ ਜੱਟ ਸਿੱਖ ਵਿਚ ਆਉਂਦਾ ਹੈ) ਵਿਚ ਭਾਜਪਾ ਪ੍ਰਤੀ ਭਾਰੀ ਨਰਾਜ਼ਗੀ ਪਾਈ ਗਈ ਸੀ, ਜਿਹੜੇ ਹਾਲੇ ਵੀ ਦੂਰ ਹੋਈ ਦਿਖਾਈ ਨਹੀਂ ਦੇ ਰਹੀ। ਜਿਸਦੇ ਚੱਲਦੇ ਹੁਣ ਭਾਜਪਾ ਵੱਲੋਂ ਹਰਿਆਣਾ ਪੈਟਰਨ ‘ਤੇ ਪੰਜਾਬ ਵਿਚ ਵੀ ਹਿੰਦੁਆਂ,ਵਪਾਰੀਆਂ ਤੇ ਸ਼ਹਿਰੀਆਂ ਦੇ ਨਾਲ-ਨਾਲ ਚੁੱਪ-ਚਪੀਤੇ ਦਲਿਤ ਵਿਹੜਿਆਂ ਵਿਚ ‘ਕਮਲ’ ਦਾ ‘ਫੁੱਲ’ ਖਿਲਾਉਣ ਲਈ ਸਖ਼ਤ ਮਿਹਨਤ ਕੀਤੀ ਜਾ ਰਹੀ ਹੈ।
ਬੀਤੇ ਕੱਲ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਬਜ਼ਟ ਸੈਸ਼ਨ ਵਾਲੇ ਦਿਨ ਪੰਜਾਬ ਦੇ ਦੋਆਬਾ ਵਿਚ ਸਥਿਤ ਡੇਰਾ ਸੱਚਖੰਡ ਬੱਲਾਂ ਦੀ ਫ਼ੇਰੀ ਨੂੰ ਵੀ ਇਸੇ ਸਿਆਸੀ ਘਟਨਾਕ੍ਰਮ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ। ਇਸਤੋਂ ਪਹਿਲਾਂ ਡੇਰਾ ਸਿਰਸਾ ਨੂੰ ਵੀ ਭਾਜਪਾ ਦੇ ਪ੍ਰਭਾਵ ਹੇਠ ਮੰਨਿਆਂ ਜਾ ਰਿਹਾ ਕਿਉਂਕਿ ਬਲਾਤਕਾਰ ਤੇ ਕਤਲ ਕੇਸਾਂ ਵਿਚ ਹਰਿਆਣਾ ਦੀ ਸੁਨਿਆਰੀਆ ਜੇਲ੍ਹ ‘ਚ ਬੰਦ ਡੇਰਾ ਮੁਖੀ ਰਾਮ ਰਹੀਮ ਨੂੰ ਥੋੜੇ ਸਮੇਂ ਮਿਲਦੀਆਂ ਫ਼ਰਲੋਆਂ ਨੂੰ ਵੀ ਸਿਆਸਤ ਨਾਲ ਜੋੜਿਆ ਜਾਂਦਾ। ਪੰਜਾਬ ਦੇ ਮਾਝੇ ਵਿਚ ਸਥਿਤ ਇੱਕ ਹੋਰ ਪ੍ਰਭਾਵਸ਼ਾਲੀ ਡੇਰੇ ਦੀਆਂ ਤਾਰਾਂ ਵੀ ਪਿਛਲੇ ਕੁੱਝ ਸਮੇਂ ਤੋਂ ਸਿੱਧੀਆਂ ਦਿੱਲੀ ਨਾਲ ਜੁੜਣ ਦੀਆਂ ਚਰਚਾਵਾਂ ਆਮ ਲੋਕਾਂ ਦੀ ਜੁਬਾਨ ‘ਤੇ ਹਨ। ਸਿਆਸੀ ਮਾਹਰਾਂ ਮੁਤਾਬਕ ਭਾਜਪਾ ਹੁਣ ਜਲੰਧਰ, ਨਵਾਂ ਸ਼ਹਿਰ,ਕਪੂਰਥਲਾ ਤੇ ਹਸ਼ਿਆਰਪੁਰ ਵਰਗੇ ਖੇਤਰਾਂ ਵਿਚ ਵੱਡਾ ਪ੍ਰਭਾਵ ਰੱਖਣ ਵਾਲੇ ਇੱਕ ਹੋਰ ਡੇਰੇ ਰਾਹੀਂ ਪੰਜਾਬ ‘ਚ ਨਵੇਂ ਸਿਆਸੀ ਸਮੀਕਰਨ ਬਣਾਉਣ ਦੀਆਂ ਕੋਸ਼ਿਸਾਂ ਵਿਚ ਜੁਟੀ ਹੋਈ ਹੈ।
ਇਹ ਵੀ ਪੜ੍ਹੋ Ex CM ਬੀਬੀ ਭੱਠਲ ਮੁੜ ਚੜ੍ਹਣਗੇ ਬਠਿੰਡਾ ਦੀ ਅਦਾਲਤ ਦੀਆਂ ਪੋੜੀਆਂ!, ਸਾਬਕਾ ਚੇਅਰਮੈਨ ਨੇ ਕੀਤੀ ਸਿਕਾਇਤ
ਭਾਜਪਾ ਦੀਆਂ ਇੰਨ੍ਹਾਂ ਗਤੀਵਿਧੀਆਂ ਤੋਂ ਦੂਜੀਆਂ ਸਿਆਸੀ ਜਮਾਤਾਂ ਤੇ ਖਾਸਕਰ ਸ਼੍ਰੋਮਣੀ ਅਕਾਲੀ ਦਲ ਨੂੰ ਗੁਆਂਢੀ ਸੂਬੇ ਹਰਿਆਣਾ ਵਿਚ ਪਿਛਲੇ ਇੱਕ ਦਹਾਕੇ ਵਿਚ ਵਾਪਰੇ ਸਿਆਸੀ ਘਟਨਾਕ੍ਰਮ ਤੋਂ ਸਬਕ ਲੈਣ ਦੀ ਲੋੜ ਹੈ। ਹਰਿਆਣਾ ਵਿਚ ਕਿਸੇ ਸਮੇਂ ਹਾਸ਼ੀਏ ‘ਤੇ ਰਹੀ ਭਾਜਪਾ ਵੱਲੋਂ ਅਚਾਨਕ ਸਿਆਸੀ ਰੰਗਮੰਚ ‘ਤੇ ਆਪਣੀ ਪ੍ਰਭਾਵਸ਼ਾਲੀ ਦਰਜ਼ ਕਰਵਾਈ ਗਈ ਤੇ ਨਾਲ ਹੀ ਗਠਜੋੜ ਦੇ ਸਹਾਰੇ ਇੱਥੋਂ ਦੀ ਪ੍ਰਭਾਵਸ਼ਾਲੀ ਖੇਤਰੀ ਪਾਰਟੀ ਇਨੈਲੋ ਨੂੰ ਦੋਫ਼ਾੜ ਕਰਕੇ ਪਹਿਲਾਂ ਇੱਕ ਧੜੇ ਨੂੰ ਮਜਬੂਤ ਕੀਤਾ ਗਿਆ ਤੇ ਉਸਤੋਂ ਬਾਅਦ ਦੂਜੇ ਧੜੇ ਨੂੰ ਵੀ ਸਿਆਸੀ ਪਟਕਣੀ ਦੇ ਦਿੱਤੀ। ਅਜਿਹੇ ਹਾਲਾਤ ਹੀ ਪੰਜਾਬ ਦੇ ਵਿਚ ਕਰਨ ਦੀ ਕੋਸ਼ਿਸ਼ ਦਿਖਾਈ ਦੇ ਰਹੀ ਹੈ, ਜਿਸਦੇ ਵਿਚ ਅਕਾਲੀ ਦਲ ਵੀ ਦੋ ਭਾਗ ਹੋ ਚੁੱਕੇ ਹਨ। ਜਦਕਿ ਕਾਂਗਰਸ ਆਪਸ ਵਿਚ ਪਾਟੋਧਾੜ ਦਿਖਾਈ ਦੇ ਰਹੀ ਹੈ ਤੇ ਸੱਤਾਧਾਰੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਅੰਦਰ ਦਿੱਲੀ ਦੇ ਵਧਦੇ ਪ੍ਰਭਾਵ ਕਾਰਨ ਆਮ ਲੋਕਾਂ ਵਿਚ ਨਰਾਜ਼ਗੀ ਦੀ ਝਲਕ ਨੂੰ ਭਾਜਪਾ ਆਪਣੇ ਲਈ ਪੰਜਾਬ ਵਿਚ ਸੁਨਿਹਰਾ ਅਵਸਰ ਮੰਨ ਕੇ ਚੱਲ ਰਹੀ ਹੈ।
👉ਹੋਰ ਤਾਜ਼ੀਆਂ ਖ਼ਬਰਾਂ ਪੜ੍ਹਨ ਲਈ ਹੇਠ ਦਿੱਤੇ Link ਉੱਪਰ Click ਕਰੋ।
Whatsapp Channel 👉 🛑https://whatsapp.com/channel/0029VbBYZTe89inflPnxMQ0A
Whatsapp Group👉 🛑https://chat.whatsapp.com/EK1btmLAghfLjBaUyZMcLK
Telegram Channel👉 🛑https://t.me/punjabikhabarsaarwebsite
☎ਨਿਊਜ਼ ਅਤੇ ਇਸ਼ਤਿਹਾਰਾਂ ਦੇ ਲਈ ਸਾਡੇ whatsapp number +91 98786-15057 ‘ਤੇ ਸੰਪਰਕ ਕਰੋ।
