ਉਮੀਦਵਾਰ ਕੈਪਟਨ ਦਾ, ਲੜੇਗਾ ‘ਕਮਲ’ ਦੇ ਚੋਣ ਨਿਸ਼ਾਨ ’ਤੇ

ਸੁਖਜਿੰਦਰ ਮਾਨ
ਬਠਿੰਡਾ, 25 ਜਨਵਰੀ: ਮਾਲਵਾ ਦਾ ‘ਦਿਲ’ ਮੰਨੀ ਜਾਣ ਵਾਲੇ ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਆਪੋ-ਅਪਣੀ ਦਾਅਵੇਦਾਰੀ ਜਤਾਉਣ ਦੀ ਚੱਲਾ ਰੱਸ਼ਾ-ਕਸ਼ੀ ਦੌਰਾਨ ‘ਮੈਚ’ ਬੇਸ਼ੱਕ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਪੰਜਾਬ ਲੋਕ ਕਾਂਗਰਸ ਜਿੱਤਣ ਵਿਚ ਸਫ਼ਲ ਰਹੀ ਹੈ ਪ੍ਰੰਤੂ ਇੱਥੋਂ ਐਲਾਨੇਂ ਉਮੀਦਵਾਰ ਅਪਣੀ ਚੋਣ ਭਾਜਪਾ ਦੇ ਨਿਸ਼ਾਨ ‘ਕਮਲ ਦੇ ਫੁੱਲ’ ’ਤੇ ਲੜਣਗੇ। ਇਸਦਾ ਖ਼ੁਲਾਸਾ ਖ਼ੁਦ ਗਠਜੋੜ ਉੁਮੀਦਵਾਰ ਰਾਜ ਨੰਬਰਦਾਰ ਨੇ ਵੀ ਕੀਤਾ ਹੈ। ਦਸਣਾ ਬਣਦਾ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਨਾਲ ਗਠਜੋੜ ਦੇ ਸਮੇਂ ਤੋਂ ਹੀ ਇਸ ਹਲਕੇ ’ਤੇ ਦਾਅਵੇ ਜਤਾ ਰਹੀ ਭਾਜਪਾ ਨੇ ਬਠਿੰਡਾ ਸ਼ਹਿਰੀ ਹਲਕੇ ’ਤੇ ਮੁੜ ਅਪਣਾ ਹੱਕ ਜਤਾਇਆ ਸੀ ਪ੍ਰੰਤੂ ਕੈਪਟਨ ਵਲੋਂ ਅੜ ਜਾਣ ਦੇ ਚੱਲਦਿਆਂ ਦੋਨਾਂ ਧਿਰਾਂ ਵਲੋਂ ਵਿਚਕਾਰਲਾ ਰਾਹ ਅਪਣਾਇਆ ਹੈ, ਜਿਸਦੇ ਚੱਲਦੇ ਉਮੀਦਵਾਰ ਕੈਪਟਨ ਦਾ ਹੋਵੇਗਾ ਤੇ ਚੋਣ ਨਿਸ਼ਾਨ ਭਾਜਪਾ ਦਾ। ਹਾਲਾਂਕਿ ਇਸਦਾ ਗਠਜੋੜ ਉਮੀਦਾਵਰ ਨੂੰ ਵੀ ਵੱਡਾ ਫ਼ਾਈਦਾ ਹੈ ਪ੍ਰੰਤੂ ਭਾਜਪਾ ਦਾ ਕਮਲ ਚੋਣ ਨਿਸ਼ਾਨ ਮੈਦਾਨ ’ਚ ਆਉਣ ਕਾਰਨ ਦੂਜੀਆਂ ਪਾਰਟੀਆਂ ਨੂੰ ਇਸਦਾ ਫ਼ਾਈਦਾ ਤੇ ਨਫ਼ਾ ਨੁਕਸਾਨ ਹੋਣ ਦੀ ਪੜਚੋਲ ਸ਼ੁਰੂ ਹੋ ਗਈ ਹੈ। ਸਿਆਸੀ ਮਾਹਰਾਂ ਮੁਤਾਬਕ ਬੇਸ਼ੱਕ ਇੱਥੋਂ ਭਾਜਪਾ ਦੇ ਕਈ ਆਗੂ ਟਿਕਟ ਦੇ ਦਾਅਵੇਦਾਰ ਸਨ ਪ੍ਰੰਤੂ ਪਹਿਲੀ ਵਾਰ ਪਾਰਟੀ ਦੇ ਚੋਣ ਨਿਸ਼ਾਨ ਦੇ ਮੈਦਾਨ ਵਿਚ ਆਉਣ ਕਾਰਨ ਉਨ੍ਹਾਂ ਵਿਚ ਉਤਸ਼ਾਹ ਵੀ ਪਾਇਆ ਜਾ ਰਿਹਾ ਹੈ। ਇਸਤੋਂ ਇਲਾਵਾ ਭਾਜਪਾ ਦਾ ਸ਼ਹਿਰੀ ਖ਼ਾਸਕਰ ਇੱਕ ਭਾਈਚਾਰੇ ਵਿਚ ਵੱਡਾ ਪ੍ਰਭਾਵ ਹੋਣ ਕਾਰਨ ਇਸਦਾ ਨੁਕਸਾਨ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਨੂੰ ਹੋ ਸਕਦਾ ਹੈ। ਹਾਲਾਂਕਿ ਅਕਾਲੀ ਦਲ ਲਈ ਵੀ ਭਾਜਪਾ ਵਲੋਂ ਅਲੱਗ ਚੋਣ ਲੜਣ ਦਾ ਐਲਾਨ ਕਿਸੇ ਸਦਮੇ ਤੋਂ ਘੱਟ ਨਹੀਂ ਹੈ।