ਜਗਮੇਲ ਜਠੌਲ ਦੀ ਕਿਤਾਬ ’ਸਾਡਾ ਪਿੰਡ ਅਜਿੱਤ ਗਿੱਲ’ ਲੋਕ ਅਰਪਣ

ਸੁਖਜਿੰਦਰ ਮਾਨ
ਬਠਿੰਡਾ, 16 ਫਰਵਰੀ :ਪਿੰ: ਜਗਮੇਲ ਸਿੰਘ ਜਠੌਲ ਦੀ ਲਿਖੀ ਕਿਤਾਬ ‘ਸਾਡਾ ਪਿੰਡ ਅਜਿੱਤ ਗਿੱਲ’ ਪਿੰਡ ਦੇ ਗੁਰਦੁਆਰਾ ਦਸਤਾਰ ਸਾਹਿਬ ਵਿਖੇ ਅਖੰਡ ਪਾਠ ਦੇ ਭੋਗ ਉਪਰੰਤ ਲੋਕਾਂ ਦੇ ਭਰਵੇੰ ਇਕੱਠ ਵਿੱਚ ਲੋਕ ਅਰਪਣ ਕੀਤੀ ਗਈ। ਜਗਮੇਲ ਜਠੌਲ ਦੀ ਇਹ ਚੌਥੀ ਮੌਲਿਕ ਪੁਸਤਕ ਹੈ। ਇਸ ਤੋਂ ਪਹਿਲਾਂ ਉਹ ’ਜਿੰਦਗੀ ਜਿੰਦਾਬਾਦ’,’ਪਹਿਲਾਂ ਸਿਹਤ ਜਰੂਰੀ ਹੈ ਅਤੇ ਇੱਕ ਨਾਵਲ ’ਏਹ ਕੇਹੀ ਜੰਨਤ’ ਤੋਂ ਇਲਾਵਾ ਕਈ ਪੁਸਤਕਾਂ ਸੰਪਾਦਿਤ ਕਰ ਚੁੱਕੇ ਹਨ। ਉਹਨਾਂ ਦੀ ਇਸ ਕਿਤਾਬ ਵਿੱਚ ਪਿੰਡ ਅਜਿੱਤ ਗਿੱਲ ਦੇ ਬੱਝਣ ਤੇ ਵਿਕਸਤ ਹੋਣ ਦਾ ਇਤਿਹਾਸ ਬਾਖੂਬੀ ਵਰਣਨ ਕੀਤਾ ਗਿਆ ਹੈ। ਪੁਸਤਕ ਨੂੰ ਲੋਕ ਅਰਪਣ ਕਰਨ ਦੀ ਰਸਮ ਵਿੱਚ ਜਗਦੇਵ ਸਿੰਘ ਰੋਮਾਣਾ,ਡਾ ਅਜੀਤਪਾਲ ਸਿੰਘ ਐਮ ਡੀ,ਡਾ ਅਮਰਵੀਰ ਸਿੰਘ,ਦਰਸ਼ਨ ਸਿੰਘ ਬਰਾੜ,ਜਗਤਾਰ ਸਿੰਘ ਐਕਸੀਅਨ,ਮੇਜਰ ਸਿੰਘ ਬਰਾੜ,ਕਰਨਲ ਹਰਪਾਲ ਸਿੰਘ ਸਿੱਧੂ,ਪਿੰ ਅਜੀਤ ਸਿੰਘ,ਪਿੰ ਨਿਰੰਗ ਸਿੰਘ,ਸਮਸ਼ੇਰ ਸਿੰਘ ਗਿੱਲ,ਕੁਲਦੀਪ ਸਿੰਘ ਜਠੌਲ,ਗੁਰਸੇਵਕ ਸਿੰਘ ਜਠੌਲ,ਜਸਵਿੰਦਰ ਸਿੰਘ ਜਠੌਲ ਅਤੇ ਐਮੀ ਸਿੱਧੂ ਸ਼ਾਮਲ ਹੋਏ। ਇਸ ਕਿਤਾਬ ਬਾਰੇ ਡਾ ਅਜੀਤਪਾਲ ਸਿੰਘ ਨੇ ਕਿਹਾ ਕਿ ਜਗਮੇਲ ਜਠੌਲ ਨੇ ਬੜੀ ਮਿਹਨਤ ਤੇ ਲਗਨ ਨਾਲ ਇਹ ਖੋਜ ਕਾਰਜ ਕਰਕੇ ਪਿੰਡ ਪ੍ਰਤੀ ਆਪਣਾ ਫਰਜ ਅਦਾ ਕੀਤਾ ਹੈ। ਪਿੰਡਾਂ ਦੀ ਭਾਈਚਾਰਕ ਸਾਂਝਾ ਨਾਲ ਹੀ ਲੋਕ ਸਾਂਝੇ ਮਸਲਿਆਂ ਤੇ ਸੰਘਰਸ਼ ਕਰ ਸਕਦੇ ਹਨ। ਕਰਨਲ ਹਰਪਾਲ ਸਿੰਘ ਨੇ ਕਿਹਾ ਕਿ ਪਿੰਡ ਬਾਰੇ ਲਿਖੀ ਇਹ ਕਿਤਾਬ ਸਾਰੇ ਪਿੰਡ ਨੂੰ ਪੜ੍ਹਨੀ ਚਾਹੀਦੀ ਹੈ। ਪੁਸਤਕ ਬਾਰੇ ਡਾ ਅਮਰਵੀਰ,ਦਰਸ਼ਨ ਬਰਾੜ,ਜਗਦੇਵ ਰੋਮਾਣਾ ਤੇ ਅਵਤਾਰ ਸਿੰਘ ਨੇ ਵੀ ਵਿਚਾਰ ਰੱਖੇ। ਜਗਮੇਲ ਜਠੌਲ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀ ਪੁਸਤਕ ਲਿਖਣ ਲਈ ਉਹਨਾਂ ਨੇ ਲਗਾਤਾਰ ਦਸ ਸਾਲ ਨਿੱਠ ਕੇ ਮਿਹਨਤ ਕੀਤੀ ਹੈ। ਉਹਨਾਂ ਕਿਹਾ ਕਿ ਪਾਠਕ ਕਿਤਾਬ ਪੜ੍ਹ ਕੇ ਆਪਣੇ ਪ੍ਰਭਾਵ ਜਰੂਰ ਦੇਣ। ਉਹਨਾਂ ਨੇ ਪੰਜਾਬੀ ਸੱਥ ਲੱਖੀ ਜੰਗਲ ਦਾ ਧੰਨਵਾਦ ਕੀਤਾ ਜਿਹਨਾਂ ਨੇ ਪੁਸਤਕ ਨੂੰ ਬੜੀ ਸੋਹਣੀ ਦਿਖ ਦਿੱਤੀ ਹੈ ਅਤੇ ਉਸ ਨੂੰ ਅਪਣਾਇਆ ਹੈ। ਮੰਚ ਦਾ ਸੰਚਾਲਨ ਉਘੇ ਲੇਖਕ ਡਾ ਜਸਪਾਲਜੀਤ ਨੇ ਬਾਖੂਬੀ ਕੀਤਾ।