ਮਾਮਲਾ ਹੌਲਦਾਰ ਦਾ ਹੱਥ ਕੱਟਣ ਦਾ: ਲੁਟੇਰਿਆਂ ਵਿਰੁਧ ਥਾਣਾ ਸੰਗਤ ਤੇ ਨੰਦਗੜ੍ਹ ’ਚ ਹੋਇਆ ਪਰਚਾ ਦਰਜ਼

ਪੁਲਿਸ ਮੁਲਾਜਮ ਹੌਲਦਾਰ ਕਿੱਕਰ ਸਿੰਘ ਦੇ ਹੱਥ ਦਾ ਬਠਿੰਡਾ ਦੇ ਪ੍ਰਾਈਵੇਟ ਹਸਪਤਾਲ ’ਚ ਹੋਇਆ ਸਫ਼ਲ ਅਪਰੇਸ਼ਨ
ਸੁਖਜਿੰਦਰ ਮਾਨ
ਬਠਿੰਡਾ, 3 ਅਗਸਤ : ਬੀਤੀ ਸ਼ਾਮ ਲੁਟੇਰਿਆਂ ਨੂੰ ਫ਼ੜਣ ਲਈ ਪਿੱਛੇ ਲੱਗੀ ਪੁਲਿਸ ਟੀਮ ’ਤੇ ਹਮਲਾ ਕਰਕੇ ਇੱਕ ਹੌਲਦਾਰ ਦਾ ਕਿਰਪਾਨ ਨਾਲ ਹੱਥ ਕੱਟਣ ਦੇ ਮਾਮਲੇ ਵਿਚ ਪੁਲਿਸ ਨੇ ਮੌਕੇ ਤੋਂ ਕਾਬੂ ਕੀਤੇ ਗਏ ਲੁਟੇਰਿਆਂ ਵਿਰੁਧ ਥਾਣਾ ਸੰਗਤ ਅਤੇ ਨੰਦਗੜ੍ਹ ਵਿਖੇ ਦੋ ਵੱਖ ਵੱਖ ਮੁਕਦਮੇ ਦਰਜ਼ ਕਰ ਲਏ ਹਨ। ਦੂਜੇ ਪਾਸੇ ਇਸ ਹਮਲੇ ਵਿਚ ਗੰਭੀਰ ਜਖਮੀ ਹੋਏ ਹੌਲਦਾਰ ਕਿੱਕਰ ਸਿੰਘ ਦਾ ਅੱਜ ਸਥਾਨਕ ਸ਼ਹਿਰ ਦੇ ਇੱਕ ਪ੍ਰਾਈਵੇਟ ਹਸਪਤਾਲ ਵਿਚ ਹੱਥ ਦਾ ਅਪਰੇਸ਼ਨ ਕੀਤਾ ਗਿਆ। ਐਸ.ਐਸ.ਪੀ ਗੁਲਨੀਤ ਸਿੰਘ ਖੁਰਾਣਾ ਨੇ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ‘‘ ਪੁਲਿਸ ਮੁਲਾਜਮ ਦੇ ਹੱਥ ਦਾ ਅਪਰੇਸ਼ਨ ਸਫ਼ਲ ਰਿਹਾ ਤੇ ਉਸਦੇ ਅਪਰੇਸ਼ਨ ਦੀ ਜਿੰਮੇਵਾਰੀ ਪੁਲਿਸ ਵਿਭਾਗ ਵਲੋਂ ਚੂੱਕੀ ਜਾ ਰਹੀ ਹੈ। ’’ ਉਨ੍ਹਾਂ ਕਿਹਾ ਕਿ ਹੌਲਦਾਰ ਕਿੱਕਰ ਸਿੰਘ ਨੇ ਵੱਡੀ ਬਹਾਦਰੀ ਦਿਖ਼ਾਈ ਹੈ, ਜਿਸਦੇ ਚੱਲਦੇ ਜਲਦੀ ਹੀ ਉਸਨੂੰ ਬਣਦਾ ਮਾਣ-ਸਨਮਾਣ ਵੀ ਦਿੱਤਾ ਜਾਵੇਗਾ।

ਬਠਿੰਡਾ ’ਚ ਖੋਹ ਕਰਕੇ ਭੱਜੇ ਲੁਟੇਰਿਆਂ ਨੇ ਪੁਲਿਸ ਪਾਰਟੀ ’ਤੇ ਹਮਲਾ ਕਰਕੇ ਹੌਲਦਾਰ ਦਾ ਹੱਥ ਵੱਢਿਆ

ਉਨ੍ਹਾਂ ਕੇਸ ਬਾਰੇ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ਘਟਨਾ ਵਾਪਰਨ ਤੋਂ ਪਹਿਲਾਂ ਬਿਨ੍ਹਾਂ ਨੰਬਰੀ ਸਵਿੱਫ਼ਟ ਕਾਰ ’ਤੇ ਸਵਾਰ ਕਥਿਤ ਦੋਸ਼ੀਆਂ ਨੇ ਹਸਨ ਰਾਮ ਉਰਫ ਕੋਕੀ ਵਾਸੀ ਮੁਹਾਲਾ ਜੋ ਕਿ ਆਪਣੇ ਮੋਟਰਸਾਈਕਲ ’ਤੇ ਪਿੰਡ ਕਾਲਝਰਾਣੀ ਵੱਲ ਜਾ ਰਿਹਾ ਸੀ, ਦੇ ਮੋਟਰਸਾਈਕਲ ਅੱਗੇ ਕਾਰ ਲਗਾ ਕੇ ਉਸਦੀ ਜੇਬ ਵਿਚੋਂ 12 ਹਜ਼ਾਰ ਰੁਪਏ ਕੱਢ ਲਏ ਸਨ। ਇਸਤੋਂ ਬਾਅਦ ਇਹ ਮੁਜਰਮ ਧਮਕੀਆਂ ਦਿੰਦੇ ਹੋਏ ਫ਼ਰਾਰ ਹੋ ਗਏ ਤੇ ਅੱਗੇ ਪਿੰਡ ਘੁੱਦਾ ਤੋਂ ਕਰੀਬ 2 ਕਿੱਲੋਮੀਟਰ ਅੱਗੇ ਮੋਟਰਸਾਈਕਲ ’ਤੇ ਸਵਾਰ ਐਮਾਜੋਨ ਕੰਪਨੀ ਦੇ ਡਿਲਵਰੀ ਵਾਲੇ ਲੜਕੇ ਦੀ ਕੁੱਟਮਾਰ ਕਰਕੇ ਉਸਦਾ ਪਰਸ ਖੋ ਕੇ ਭਂੱਜ ਗਏ। ਪੀੜਤ ਨੌਜਵਾਨ ਸੁਖਵੀਰ ਸਿੰਘ ਵਾਸੀ ਨਰੂਆਣਾ ਮੁਤਾਬਕ ਉਸਦੇ ਪਰਸ ਵਿਚ ਕਰੀਬ 3/4 ਹਜਾਰ ਰੁਪਏ ਸਨ। ਇਸ ਦੌਰਾਨ ਇਤਲਾਹ ਮਿਲਣ ’ਤੇ ਜਦ ਇਲਾਕੇ ਵਿਚ ਗਸਤ ਕਰ ਰਹੀ ਪੰਜਾਬ ਪੁਲਿਸ ਦੀ ਲੀਕਰ ਸੈੱਲ ਅਤੇ ਥਾਣਾ ਨੰਦਗੜ੍ਹ ਦੀ ਟੀਮ ਗਤੀਸ਼ੀਲ ਹੋ ਗਈ। ਜਦ ਲੀਕਰ ਸੈੱਲ ਵਾਲੀ ਪੁਲਿਸ ਪਾਰਟੀ ਨੇ ਉਹਨਾਂ ਦਾ ਪਿੱਛਾ ਕੀਤਾ ਅਤੇ ਇਹਨਾਂ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਕਤਾਨ ਕਾਰ ਸਵਾਰਾਂ ਨੇ ਇੱਕਦਮ ਕਾਰ ਵਿੱਚੋਂ ਉੱਤਰ ਕੇ ਪੁਲਿਸ ਪਾਰਟੀ ’ਤੇ ਹਮਲਾ ਕਰਕੇ ਹੌਲਦਾਰ ਕਿੱਕਰ ਸਿੰਘ ਦੇ ਸੱਜੇ ਹੱਥ ਦੀ ਹਥੇਲੀ ਵੱਢ ਦਿੱਤੀ। ਇਸ ਮੌਕੇ ਪੁਲਿਸ ਟੀਮ ਅਤੇ ਮੌਜੂਦ ਲੋਕਾਂ ਨੇ ਹਿੰਮਤ ਕਰਕੇ ਕਾਰ ਵਿਚ ਸਵਾਰ ਪੰਜ ਜਣਿਆਂ, ਜੋ ਕੇ ਮੌਕੇ ਤੋਂ ਭੱਜਣ ਲੱਗੇ ਸਨ, ਵਿਚੋਂ ਚਾਰ ਨੂੰ ਕਾਬੂ ਕਰ ਲਿਆ।

ਪੁਲਿਸ ਮੁਲਾਜਮ ਦੀ ਕਾਰ ਨਾਲ ਹੋਏ ਹਾਦਸੇ ’ਚ ਮਜਦੂਰ ਦੀ ਹੋਈ ਮੌਤ, ਪਿੰਡ ਵਾਲਿਆਂ ਨੇ ਲਗਾਇਆ ਜਾਮ

ਐਸ.ਐਸ.ਪੀ ਨੇ ਦਸਿਆ ਕਿ ਇਸ ਮਾਮਲੇ ਵਿਚ ਹੋਲਦਾਰ ਕਿੱਕਰ ਸਿੰਘ ਦੇ ਬਿਆਨ ਉਪਰ ਜੋਧਾ ਸਿੰਘ, ਅਗਵੀਰ ਸਿੰਘ , ਬੁੱਘੀ ਸਿੰਘ ਵਾਸੀ ਭੁੱਚੋ ਕਲਾਂ, ਹਰਜਿੰਦਰ ਸਿੰਘ ਅਤੇ ਕੁਲਜੀਤ ਸਿੰਘ ਵਾਸੀ ਭੁੱਚੋ ਖੁਰਦ ਵਿਰੁਧ ਥਾਣਾ ਨੰਦਗੜ੍ਹ ਵਿਚ ਅਧ 307,353,186,148,149 ਆਈ.ਪੀ.ਸੀ ਤਹਿਤ ਕੇਸ ਦਰਜ ਕੀਤਾ ਗਿਆ। ਜਦੋਂਕਿ ਪਹਿਲੇ ਮਾਮਲੇ ਵਿਚ ਥਾਣਾ ਸੰਗਤ ਵਿਖੇ ਅ/ਧ 382 ਆਈ.ਪੀ.ਸੀ ਕੇਸ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਦਸਿਆ ਕਿ ਇਨ੍ਹਾਂ ਦੋਨਾਂ ਕੇਸਾਂ ਵਿਚ ਜੋਧਾ ਸਿੰਘ, ਅਗਵੀਰ ਸਿੰਘ, ਹਰਜਿੰਦਰ ਸਿੰਘ ਅਤੇ ਕੁਲਜੀਤ ਸਿੰਘ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਜਦੋਂਕਿ ਬੁੱਘੀ ਸਿੰਘ ਦੀ ਗ੍ਰਿਫਤਾਰੀ ਬਾਕੀ ਹੈ। ਪੁਲਿਸ ਨੇ ਕਥਿਤ ਦੋਸ਼ੀਆਂ ਕੋਲੋਂ ਇੱਕ ਸਵਿਫਟ ਕਾਰ ਬਿਨਾਂ ਨੰਬਰੀ ਕਾਰ ਤੋਂ ਇਲਾਵਾ 01 ਕਿਰਪਾਨ, 01 ਦਾਹ ਖੰਡਾ, 02 ਲੋਹੇ ਦੀਆਂ ਰਾਡਾਂ ਬਰਾਮਦ ਕੀਤੀਆਂ ਹਨ।
ਜਖਮੀ ਹੌਲਦਾਰ ਦੇ ਪ੍ਰਵਾਰ ਨੇ ਸਰਕਾਰ ਤੋਂ ਤਰੱਕੀ ਤੇ ਨੌਕਰੀ ਮੰਗੀ
ਬਠਿੰਡਾ: ਉਧਰ ਪ੍ਰਾਈਵੇਟ ਹਸਪਤਾਲ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਜਖਮੀ ਹੌਲਦਾਰ ਕਿੱਕਰ ਸਿੰਘ ਦੀ ਪਤਨੀ ਤੇ ਪੁੱਤਰੀ ਨੇ ਇਸ ਬਹਾਦਰੀ ’ਤੇ ਫ਼ਖਰ ਮਹਿਸੂਸ ਕਰਦਿਆਂ ਸਰਕਾਰ ਕੋਲੋਂ ਮੰਗ ਕੀਤੀ ਕਿ ਕਿੱਕਰ ਸਿੰਘ ਨੂੰ ਤਰੱਕੀ ਦੇਣ ਤੋਂ ਇਲਾਵਾ ਉਸਦੇ ਪੁੱਤਰ ਨੂੰ ਵੀ ਨੌਕਰੀ ਦਿੱਤੀ ਜਾਵੇ।