ਬਠਿੰਡਾ ਦੇ ਮਿਲਕ ਪਲਾਂਟ ਦੀ ਚੋਣ ’ਚ 11 ਡਾਇਰੈਕਟਰ ਨਿਰਵਿਰੋਧ ਚੁਣੇ

ਕਾਂਗਰਸੀਆਂ ਆਗੂਆਂ ਨੇ ਨਹੀਂ ਦਿਖ਼ਾਇਆ ਉਤਸ਼ਾਹ
ਫ਼ੂਲ ’ਚ ਕਾਂਗੜ ਤੇ ਮਲੂਕਾ ਸਮਰਥਕ ਦੇ ਫ਼ਸੇ ਸਿੰਗ
ਕਈ ਅਕਾਲੀ ਵੀ ਬਣੇ ਡਾਇਰੈਕਟਰ
ਸੁਖਜਿੰਦਰ ਮਾਨ
ਬਠਿੰਡਾ, 16 ਦਸੰਬਰ: ਲੰਮੇ ਸਮੇਂ ਤੋਂ ਲੰਬਿਤ ਪਈ ਬਠਿੰਡਾ ਮਿਲਕ ਪਲਾਂਟ ਦੇ ਬੋਰਡ ਆਫ਼ ਡਾਇਰੈਕਟਰ ਦੀ ਚੱਲ ਰਹੀ ਚੋਣ ਵਿਚ ਅੱਜ 11 ਡਾਇਰੈਕਟਰ ਨਿਰਵਿਰੋਧ ਚੁਣੇ ਗਏ। ਜਦੋਂਕਿ ਫ਼ੂਲ ’ਚ ਕਾਂਗੜ੍ਹ ਤੇ ਮਲੂਕਾ ਸਮਰਥਕਾਂ ਵਿਚ ਸਿੰਗ ਫ਼ਸਣ ਕਾਰਨ ਭਲਕੇ ਚੋਣ ਕਰਵਾਈ ਜਾ ਰਹੀ ਹੈ। ਉਜ ਇਸ ਚੋਣ ਵਿਚ ਕਾਂਗਰਸੀਆਂ ਆਗੂਆਂ ਦੁਆਰਾ ਜਿਆਦਾ ਉਤਸ਼ਾਹ ਨਹੀਂ ਦਿਖਾਇਆ ਗਿਆ, ਜਿਸ ਕਾਰਨ 7 ਜੋਨਾਂ ਉਪਰ ਸਿਰਫ਼ ਇੱਕ-ਇੱਕ ਉਮੀਦਵਾਰ ਹੀ ਸਾਹਮਣੇ ਆਇਅ। ਇਸਤੋਂ ਇਲਾਵਾ ਭਗਤਾ ਭਾਈ ਜੋਨ ਵਿਚ ਯੋਗ ਉਮੀਦਵਾਰ ਹੀ ਨਹੀਂ ਮਿਲ ਸਕਿਆ। ਪਤਾ ਲੱਗਿਆ ਹੈ ਕਿ ਅੱਜ ਨਿਰਵਿਰੋਧ ਚੁਣੇ ਗਏ ਡਾਇਰੈਕਟਰਾਂ ਵਿਚੋਂ ਕਈ ਅਕਾਲੀ ਉਮੀਦਵਾਰ ਵੀ ਸਫ਼ਲ ਰਹੇ। ਇੰਨ੍ਹਾਂ ਵਿਚ ਇੱਕ ਸਾਬਕਾ ਚੇਅਰਮੈਨ ਸੁਖਪਾਲ ਸਿੰਘ ਦਾ ਨਾਮ ਵੀ ਪ੍ਰਮੁੱਖ ਤੌਰ ’ਤੇ ਸ਼ਾਮਲ ਹੈ। ਗੌਰਤਲਬ ਹੈ ਕਿ ‘ਦੀ ਬਠਿੰਡਾ ਜ਼ਿਲ੍ਹਾ ਸਹਿਕਾਰੀ ਦੁੱਧ ਉਤਪਾਦਕ ਸੰਘ ਲਿਮਟਿਡ ’ ਦੇ ਹਰ ਪੰਜ ਸਾਲਾਂ ਬਾਅਦ 13 ਡਾਇਰੈਕਟਰ ਚੁਣੇ ਜਾਂਦੇ ਹਨ। ਪ੍ਰੰਤੂ ਕਾਂਗਰਸੀ ਸਰਕਾਰ ਬਣਨ ਤੋਂ ਬਾਅਦ ਕਥਿਤ ਤੌਰ ’ਤੇ ਅਕਾਲੀ ਪੱਖੀ ਬੋਰਡ ਨੂੰ ਭੰਗ ਕਰਨ ਦੇ ਚੱਲਦੇ ਮਾਮਲਾ ਅਦਾਲਤ ਵਿਚ ਚਲਿਆ ਗਿਆ ਸੀ। ਜਿਸ ਕਾਰਨ ਇਹ ਚੋਣ ਕਾਫ਼ੀ ਲਮਕ ਕੇ ਹੋਈ ਹੈ। ਮਿਲਕ ਪਲਾਂਟ ਦੇ ਚੋਣ ਪ੍ਰਬੰਧਾਂ ਨਾਲ ਜੁੜੇ ਸੂਤਰਾਂ ਨੇ ਖ਼ੁਲਾਸਾ ਕੀਤਾ ਕਿ ‘‘ ਇਸ ਚੋਣ ਲਈ ਕੁੱਝ ਅਕਾਲੀ ਲੀਡਰਾਂ ਦੇ ਫ਼ੋਨ ਜਰੂਰ ਆਏ ਪ੍ਰੰਤੂ ਇੱਕ ਵੀ ਕਾਂਗਰਸੀ ਨੇ ਉਤਸ਼ਾਹ ਨਹੀਂ ਦਿਖਾਇਆ, ਜਿਸ ਕਾਰਨ ਚੋਣ ਪੂਰੀ ਤਰ੍ਹਾਂ ਨਿਰਪੱਖ ਤੇ ਸਧਾਰਨ ਤਰੀਕੇ ਨਾਲ ਹੋਈ। ’’ ਸੂਚਨਾ ਮੁਤਾਬਕ ਫ਼ੂਲ ਜੋਨ ਵਿਚ ਸਹਿਮਤੀ ਨਾ ਬਣਨ ਕਾਰਨ ਭਲਕੇ ਚੋਣ ਹੋਵੇਗੀ। ਇੱਥੇ ਚਰਨਜੀਤ ਸਿੰਘ ਤੇ ਰਾਮ ਸਿੰਘ ਵਿਚਕਾਰ ਮੁਕਾਬਲਾ ਹੈ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਸ ਜੋਨ ਵਿਚ ਸਿਰਫ਼ ਪੰਜ ਹੀ ਵੋਟਾਂ ਹਨ ਤੇ ਦੋਨਾਂ ਧਿਰਾਂ ਨਾਲ ਦੋ-ਦੋ ਵੋਟਾਂ ਦਸੀਆਂ ਜਾ ਰਹੀਆਂ ਹਨ। ਇਸਤੋਂ ਇਲਾਵਾ ਰਾਮਪੁਰਾ, ਮੋੜ, ਸੰਗਤ ਵਿਚ ਸਿਰਫ਼ ਦੋ-ਦੋ ਉਮੀਦਵਾਰਾਂ ਨੇ ਨਾਮਜਦਗੀਆਂ ਦਾਖ਼ਲ ਕੀਤੀਆਂ ਸਨ, ਜਿੰਨ੍ਹਾਂ ਵਿਚੋਂ ਇੱਕ-ਇੱਕ ਨੇ ਅਪਣੇ ਕਾਗਜ਼ ਵਾਪਸ ਲੈ ਲਏ। ਇਸੇ ਤਰ੍ਹਾਂ ਸੱਤ ਜੋਨਾਂ ਵਿਚ ਸਿਰਫ਼ ਇੱਕ-ਇੱਕ ਉਮੀਦਵਾਰ ਹੀ ਸਾਹਮਣੇ ਆਇਆ। ਜਿਸਦੇ ਚੱਲਦੇ ਚੋਣ ਪ੍ਰੀਿਆ ਮੁਤਾਬਕ 11 ਜੋਨਾਂ ਵਿਚੋਂ ਡਾਇਰੈਕਟਰਾਂ ਨੂੰ ਨਿਰਵਿਰੋਧ ਜੇਤੂ ਕਰਾਰ ਦਿੱਤਾ ਗਿਆ। ਚੋਣ ਪ੍ਰੀਿਆ ਮੁਕੰਮਲ ਹੋਣ ਤੋਂ ਬਾਅਦ ਚੁਣੇ ਗਏ ਮੈਂਬਰਾਂ ਵਿਚੋਂ ਇੱਕ ਚੇਅਰਮੈਨ, ਇੱਕ ਉਪ ਚੇਅਰਮੈਨ ਤੇ ਇੱਕ ਡਾਇਰੈਕਟਰ ਸਟੇਟ ਲਈ ਚੁਣਿਆ ਜਾਂਦਾ ਹੈ। ਗੌਰਤਲਬ ਹੈ ਕਿ ਮਾਲਵਾ ਪੱਟੀ ’ਚ ਵੇਰਕਾ ਮਿਲਕ ਪਲਾਂਟ ਇੱਕ ਕਾਫ਼ੀ ਮਹੱਤਵਪੂਰਨ ਸੰਸਥਾ ਹੈ, ਜਿਸਦੇ ਉਤਪਾਦ ਪੰਜਾਬ ਤੋਂ ਇਲਾਵਾ ਹਰਿਆਣਾ ਤੇ ਰਾਜਸਥਾਨ ਵਿਚ ਵੀ ਜਾਂਦੇ ਹਨ।