ਨਿਊਜ਼ ਡੈਸਕ :ਜੇਕਰ ਤੁਹਾਡੇ ਡਰਾਈਵਿੰਗ ਲਾਇਸੈਂਸ ’ਤੇ ਪੁਰਾਣਾ ਪਤਾ ਦਰਜ ਹੈ, ਮੋਬਾਈਲ ਨੰਬਰ ਬਦਲ ਗਿਆ ਹੈ ਜਾਂ ਲਾਇਸੈਂਸ ਨਾਲ ਜੁੜੇ ਹੋਰ ਵੇਰਵੇ ਠੀਕ ਕਰਵਾਉਣੇ ਹਨ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਅਹਿਮ ਹੈ। ਕੇਂਦਰ ਸਰਕਾਰ ਡਰਾਈਵਿੰਗ ਲਾਇਸੈਂਸ ਨਾਲ ਜੁੜੀਆਂ ਕਈ ਸੇਵਾਵਾਂ ਨੂੰ ਆਸਾਨ ਬਣਾਉਣ ਦੀ ਤਿਆਰੀ ਕਰ ਰਹੀ ਹੈ। ਨਵੇਂ ਪ੍ਰਸਤਾਵਾਂ ਤਹਿਤ ਕੁਝ ਸੇਵਾਵਾਂ ਮੁਫ਼ਤ ਹੋ ਸਕਦੀਆਂ ਹਨ, ਅਰਜ਼ੀਆਂ ਦੇ ਨਿਪਟਾਰੇ ਲਈ ਸਮਾਂ ਤੈਅ ਹੋ ਸਕਦਾ ਹੈ ਅਤੇ ਦਸਤਾਵੇਜ਼ਾਂ ਦੀ ਪ੍ਰਕਿਰਿਆ ਵੀ ਸਰਲ ਬਣਾਈ ਜਾ ਸਕਦੀ ਹੈ। ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਨੇ ਡਰਾਈਵਿੰਗ ਲਾਇਸੈਂਸ ਨਿਯਮਾਂ ਵਿੱਚ ਸੋਧ ਦਾ ਖਰੜਾ ਜਾਰੀ ਕੀਤਾ ਹੈ। ਇਸ ਸਬੰਧੀ ਆਮ ਲੋਕਾਂ ਅਤੇ ਹੋਰ ਸਬੰਧਤ ਧਿਰਾਂ ਤੋਂ 30 ਦਿਨਾਂ ਦੇ ਅੰਦਰ ਸੁਝਾਅ ਅਤੇ ਇਤਰਾਜ਼ ਮੰਗੇ ਗਏ ਹਨ। ਸਭ ਤੋਂ ਪਹਿਲਾਂ ਗੱਲ ਕਰਦੇ ਹਾਂ ਫੀਸ ਦੀ। ਪ੍ਰਸਤਾਵ ਮੁਤਾਬਕ, ਡਰਾਈਵਿੰਗ ਲਾਇਸੈਂਸ ’ਤੇ ਪਤਾ, ਮੋਬਾਈਲ ਨੰਬਰ ਅਤੇ ਈਮੇਲ ਪਤਾ ਬਦਲਵਾਉਣ ਦੀ ਫੀਸ ਮੁਆਫ਼ ਕੀਤੀ ਜਾ ਸਕਦੀ ਹੈ। ਆਧਾਰ ਰਾਹੀਂ ਆਨਲਾਈਨ ਤਸਦੀਕ ਨਾਲ ਮਿਲਣ ਵਾਲੀਆਂ ਕੁਝ ਸੇਵਾਵਾਂ ਨੂੰ ਵੀ ਮੁਫ਼ਤ ਕਰਨ ਦਾ ਪ੍ਰਸਤਾਵ ਹੈ।
ਜੇਕਰ ਇਹ ਤਬਦੀਲੀਆਂ ਮਨਜ਼ੂਰ ਹੋ ਜਾਂਦੀਆਂ ਹਨ, ਤਾਂ ਘਰ ਜਾਂ ਨੌਕਰੀ ਬਦਲਣ ਵਾਲੇ ਲੋਕਾਂ ਨੂੰ ਰਾਹਤ ਮਿਲ ਸਕਦੀ ਹੈ।ਦੂਜਾ ਵੱਡਾ ਬਦਲਾਅ ਅਰਜ਼ੀਆਂ ਦੇ ਨਿਪਟਾਰੇ ਨਾਲ ਜੁੜਿਆ ਹੈ। ਖਰੜੇ ਵਿੱਚ ਨਾਮ ਅਤੇ ਹੋਰ ਵੇਰਵੇ ਬਦਲਣ ਵਾਲੀਆਂ ਅਰਜ਼ੀਆਂ ਦਾ ਫ਼ੈਸਲਾ 15 ਦਿਨਾਂ ਦੇ ਅੰਦਰ ਕਰਨ ਦਾ ਪ੍ਰਸਤਾਵ ਹੈ। ਇਸ ਤੋਂ ਇਲਾਵਾ, ਪਤਾ ਬਦਲਣ ਦੀ ਅਰਜ਼ੀ ’ਤੇ 30 ਦਿਨਾਂ ਅੰਦਰ ਫ਼ੈਸਲਾ ਨਾ ਹੋਣ ਦੀ ਸੂਰਤ ਵਿੱਚ ਉਸ ਨੂੰ ਮਨਜ਼ੂਰ ਮੰਨਣ ਦੀ ਵਿਵਸਥਾ ਵੀ ਪ੍ਰਸਤਾਵਿਤ ਹੈ। ਲਾਇਸੈਂਸ ਵਿੱਚੋਂ ਵਾਹਨ ਦੀ ਸ਼੍ਰੇਣੀ ਹਟਾਉਣ ਦੀ ਅਰਜ਼ੀ ਲਈ ਸੱਤ ਦਿਨਾਂ ਅੰਦਰ ਸਵੈਚਾਲਿਤ ਪ੍ਰਕਿਰਿਆ ਦਾ ਸੁਝਾਅ ਦਿੱਤਾ ਗਿਆ ਹੈ। ਹੁਣ ਗੱਲ ਪਤੇ ਦੇ ਸਬੂਤ ਦੀ। ਪ੍ਰਸਤਾਵ ਮੁਤਾਬਕ, ਤਿੰਨ ਮਹੀਨਿਆਂ ਤੋਂ ਪੁਰਾਣੇ ਨਾ ਹੋਣ ਵਾਲੇ ਬਿਜਲੀ ਅਤੇ ਘਰੇਲੂ ਗੈਸ ਦੇ ਬਿੱਲਾਂ ਨੂੰ ਵੀ ਪਤੇ ਦੇ ਸਬੂਤ ਵਜੋਂ ਸਵੀਕਾਰ ਕੀਤਾ ਜਾ ਸਕਦਾ ਹੈ। ਇਸ ਨਾਲ ਬਿਨੈਕਾਰਾਂ ਲਈ ਦਸਤਾਵੇਜ਼ ਜਮ੍ਹਾਂ ਕਰਵਾਉਣਾ ਆਸਾਨ ਹੋ ਸਕਦਾ ਹੈ।
ਇਹ ਵੀ ਪੜ੍ਹੋ 👉 ਵੱਡੀ ਖ਼ਬਰ; ਪੰਜਾਬ ਵਿਧਾਨ ਸਭਾ ‘ਚ ਪਰਵਿੰਦਰ ਸਿੰਘ ਝੋਟੇ ਨੂੰ ਦਿੱਤੀ ਜਾਵੇਗੀ ਸ਼ਰਧਾਂਜਲੀ!
ਇਸ ਤੋਂ ਇਲਾਵਾ, ਸਾਰਥੀ ਪੋਰਟਲ ’ਤੇ ਜਾਣਕਾਰੀ ਆਪਣੇ ਆਪ ਭਰਨ ਦੀ ਸਹੂਲਤ ਦੇਣ ਦਾ ਪ੍ਰਸਤਾਵ ਹੈ, ਤਾਂ ਜੋ ਲੋਕਾਂ ਨੂੰ ਵਾਰ-ਵਾਰ ਇੱਕੋ ਵੇਰਵੇ ਨਾ ਭਰਨੇ ਪੈਣ। ਲਾਇਸੈਂਸ ਦਾ ਨਵੀਨੀਕਰਨ, ਗੁੰਮ ਹੋਏ ਲਾਇਸੈਂਸ ਦੀ ਦੂਜੀ ਕਾਪੀ ਅਤੇ ਨਵੀਂ ਵਾਹਨ ਸ਼੍ਰੇਣੀ ਜੋੜਨ ਲਈ ਵੱਖਰਾ ਫਾਰਮ ਵੀ ਪ੍ਰਸਤਾਵਿਤ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ, ਅਰਜ਼ੀ ਵਿੱਚ ਐਮਰਜੈਂਸੀ ਸੰਪਰਕ ਦੀ ਜਾਣਕਾਰੀ ਲਾਜ਼ਮੀ ਕਰਨ ਅਤੇ ਅੰਗਦਾਨ ਲਈ ਆਪਣੀ ਇੱਛਾ ਦਰਜ ਕਰਨ ਦਾ ਵਿਕਲਪ ਦੇਣ ਦੀ ਤਜਵੀਜ਼ ਵੀ ਸ਼ਾਮਲ ਹੈ। ਹਾਲਾਂਕਿ, ਇੱਥੇ ਧਿਆਨ ਦੇਣ ਵਾਲੀ ਗੱਲ ਇਹ ਹੈ ਕਿ ਇਹ ਸਾਰੇ ਬਦਲਾਅ ਹਾਲੇ ਪ੍ਰਸਤਾਵਿਤ ਹਨ, ਲਾਗੂ ਨਹੀਂ ਹੋਏ। ਸਰਕਾਰ ਵੱਲੋਂ ਸੁਝਾਅ ਅਤੇ ਇਤਰਾਜ਼ਾਂ ’ਤੇ ਵਿਚਾਰ ਕਰਨ ਤੋਂ ਬਾਅਦ ਹੀ ਅੰਤਿਮ ਨਿਯਮ ਜਾਰੀ ਕੀਤੇ ਜਾਣਗੇ। ਇਸ ਲਈ ਫਿਲਹਾਲ ਲਾਇਸੈਂਸ ਨਾਲ ਜੁੜੀਆਂ ਸੇਵਾਵਾਂ ਲਈ ਮੌਜੂਦਾ ਨਿਯਮਾਂ ਦੀ ਹੀ ਪਾਲਣਾ ਕਰੋ।
Whatsapp Channel 👉 🛑https://whatsapp.com/channel/0029VbBYZTe89inflPnxMQ0A
Whatsapp Group👉 🛑https://chat.whatsapp.com/EK1btmLAghfLjBaUyZMcLK
Telegram Channel👉 🛑https://t.me/punjabikhabarsaarwebsite
