ਨਸੀਲੀਆਂ ਗੋਲੀਆਂ ਸਹਿਤ ਕਾਬੂ ਕੀਤੀ ਔਰਤ ਨੂੰ ਥਾਣੇ ’ਚ ਪਿਆ ਦੌਰਾ

ਪ੍ਰਵਾਰ ਨੇ ਪੁਲਿਸ ’ਤੇ ਵੱਧ ਗੋਲੀਆਂ ਪਾਉਣ ਦੇ ਲਗਾਏ ਦੋਸ਼
ਸੁਖਜਿੰਦਰ ਮਾਨ
ਬਠਿੰਡਾ, 9 ਫ਼ਰਵਰੀ: ਬੀਤੇ ਕੱਲ ਸਥਾਨਕ ਥਾਣਾ ਕੈਂਟ ਦੀ ਪੁਲਿਸ ਵੱਲੋਂ ਨਜਦੀਕੀ ਪਿੰਡ ਭੁੱਚੋ ਖੁਰਦ ਤੋਂ ਕਥਿਤ ਤੌਰ ’ਤੇ ਭਾਰੀ ਮਾਤਰਾ ’ਚ ਨਸ਼ੀਲੀਆਂ ਗੋਲੀਆਂ ਸਹਿਤ ਗਿ੍ਰਫਤਾਰ ਕੀਤੀ ਗਈ ਔਰਤ ਨੂੰ ਅੱਜ ਥਾਣੇ ਅੰਦਰ ਦੌਰਾ ਪੈ ਗਿਆ। ਪੁਲਿਸ ਅਧਿਕਾਰੀਆਂ ਨੂੰ ਇਸਦਾ ਪਤਾ ਲੱਗਦੇ ਹੀ ਹੱਥਾਂ ਪੈਰਾਂ ਦੀ ਪੈ ਗਈ ਤੇ ਤੁਰੰਤ ਔਰਤ ਨੂੰ ਸਿਵਲ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ, ਜਿੱਥੇ ਡਾਕਟਰਾਂ ਵਲੋਂ ਉਸਦਾ ਇਲਾਜ਼ ਕੀਤਾ ਗਿਆ। ਉਧਰ ਔਰਤ ਛਿੰਦੋ ਕੌਰ ਦੇ ਪ੍ਰਵਾਰ ਵਾਲਿਆਂ ਨੇ ਪੁਲਿਸ ’ਤੇ ਦੋਸ਼ ਲਗਾਇਆ ਕਿ ਪੁਲਿਸ ਨੇ ਜਾਣਬੁੱਝ ਕੇ ਵੱਧ ਗੋਲੀਆਂ ਦਾ ਕੇਸ ਪਾਇਆ ਹੈ ਜਦੋਂਕਿ ਅਸਲ ਵਿਚ ਘਰੋਂ ਸਿਰਫ਼ ਚਾਰ ਗੋਲੀਆਂ ਦੇ ਬਰਾਮਦ ਹੋਏ ਹਨ। ਪ੍ਰਵਾਰ ਦੇ ਮੈਂਬਰਾਂ ਮੁਤਾਬਕ ਘਰ ਦਾ ਇੱਕ ਵਿਅਕਤੀ ਨਸ਼ੇ ਕਰਦਾ ਹੈ ਕਿ ਜਿਸਦੇ ਚੱਲਦੇ ਉਕਤ ਚਾਰ ਪੱਤੇ ਘਰ ਪਏ ਹੋਏ ਸਨ। ਦੂਜੇ ਪਾਸੇ ਪੁਲਿਸ ਅਧਿਕਾਰੀਆਂ ਨੇ ਇੰਨ੍ਹਾਂ ਦੋਸ਼ਾਂ ਨੂੰ ਗਲਤ ਕਰਾਰ ਦਿੰਦਿਆਂ ਕਿਹਾ ਕਿ ਉਕਤ ਔਰਤ ਕੋਲੋ 250 ਪੱਤੇ ਕੈਲਵੀਡੋਲ ਦੇ ਬਰਾਮਦ ਹੋਏ ਹਨ ਤੇ ਹੁਣ ਬਚਣ ਲਈਪ ਝੂਠੇ ਦੋਸ਼ ਲਗਾਏ ਜਾ ਰਹੇ ਹਨ।