ਭਿ੍ਰਸ਼ਟਾਚਾਰ ਦੇ ਦੋਸ਼ਾਂ ਹੇਠ ਪੁਲਿਸ ਦੇ ਐਸ.ਪੀ ਤੇ ਉਸਦੇ ਰੀਡਰ ਵਿਰੁਧ ਪਰਚਾ ਦਰਜ਼

ਸੁਖਜਿੰਦਰ ਮਾਨ
ਸੰਗਰੂਰ, 10 ਮਈ : ਜ਼ਿਲ੍ਹਾ ਪੁਲਿਸ ਨੇ ਅਪਣੇ ਹੀ ਐਸ.ਪੀ ਕਰਨਵੀਰ ਸਿੰਘ ਤੇ ਉਸਦੇ ਰੀਡਰ ਦਵਿੰਦਰ ਸਿੰਘ ਵਿਰੂਧ 7 ਭਿ੍ਰਸਟਾਚਾਰ ਰੋਕੂ ਐਕਟ 2018 ਤਹਿਤ ਥਾਣਾ ਸਿਟੀ-1 ਸੰਗਰੂਰ ਵਿਖੇ ਪਰਚਾ ਦਰਜ਼ ਕੀਤਾ ਹੈ। ਇੰਨ੍ਹਾਂ ਦੋਨਾਂ ਪੁਲਿਸ ਅਧਿਕਾਰੀਆਂ ਵਿਰੁਧ 3 ਲੱਖ ਰੁਪਏ ਦੀ ਰਿਸਵਤ ਲੈਣ ਦੇ ਦੋਸ ਲੱਗੇ ਹਨ। ਪੁਲਿਸ ਨੇ ਥਾਣੇਦਾਰ ਦਵਿੰਦਰ ਸਿੰਘ ਨੂੰ ਗਿ੍ਰਫਤਾਰ ਕਰ ਲਿਆ ਹੈ ਜਦੋਂਕਿ ਐਸ.ਪੀ ਫ਼ਰਾਰ ਹੋ ਗਿਆ ਹੈ। ਇਸ ਮਾਮਲੇ ਵਿਚ ਸਿਕਾਇਤ ਮਹਿੰਗਾ ਸਿੰਘ ਅਤੇ ਉਸਦੇ ਸਾਥੀਆਂ ਵਿਰੁਧ ਥਾਣਾ ਖਨੌਰੀ ‘ਚ ਮੁਕੱਦਮਾ ਨੰਬਰ 16 ਮਿਤੀ 27.2.2022 ਨੂੰ ਧਾਰਾ 302, 120 ਬੀ, 148 ਤੇ 149 ਆਈ ਪੀ ਸੀ ਦਰਜ ਹੋਇਆ ਸੀ। ਇਸ ਮਾਮਲੇ ਦੀ ਜਾਂਚ ਦਾ ਜਿੰਮਾ ਐੱਸ ਪੀ ਸੰਗਰੂਰ ਕਰਨਵੀਰ ਸਿੰਘ ਨੂੰ ਸੋਂਪਿਆ ਗਿਆ ਸੀ। ਪ੍ਰੰਤੂ ਉਕਤ ਪੁਲਿਸ ਅਧਿਕਾਰੀ ਨੇ ਇਨਸਾਫ਼ ਦੇਣ ਦੀ ਬਜਾਏ ਆਪਣੇ ਰੀਡਰ ਦਵਿੰਦਰ ਸਿੰਘ ਰਾਹੀਂ ਉਕਤ ਵਿਅਕਤੀਆਂ ਕੋਲੋ ਸਾਢੇ 3 ਲੱਖ ਰੁਪਏ ਦੀ ਮੰਗ ਕੀਤੀ ਸੀ। ਜਿਸਦੇ ਬਦਲੇ ਤਿੰਨ ਲੱਖ ਰੁਪਏ ਦੇ ਦਿੱਤੇ। ਜਿਹੜੇ ਰੀਡਰ ਮੁਤਾਬਕ ਅੱਗੇ ਐਸ.ਪੀ ਕੋਲ ਚਲੇ ਗਏ। ਬਾਅਦ ਵਿਚ ਕੇਸ ਉਨ੍ਹਾਂ ਦੇ ਹੱਕ ਵਿਚ ਨਹੀਂ ਹੋਇਆ ਤਾਂ ਉਨ੍ਹਾਂ ਸਿਕਾਇਤ ਦਿੱਤੀ ਤੇ ਪੜਤਾਲ ਤੋਂ ਬਾਅਦ ਇਹ ਕੇਸ ਦਰਜ਼ ਕੀਤਾ ਗਿਆ।