ਸ਼ੀਸ ਮਹਿਲ ਕਲੌਨੀ ਵਾਸੀਆਂ ਵਲੋਂ ਪ੍ਰਬੰਧਕਾਂ ਵਿਰੁਧ ਧਰਨਾ ਜਾਰੀ

ਪੰਜਾਬੀ ਖ਼ਬਰਸਾਰ ਬਿਊਰੋ
ਬਠਿੰਡਾ, 7 ਨਵੰਬਰ: ਕਲੌਨੀ ’ਚ ਨਹਿਰੀ ਪਾਣੀ ਦੀ ਸਪਲਾਈ ਤੇ ਹੋਰਨਾਂ ਮੁੱਦਿਆਂ ਨੂੰ ਲੈ ਕੇ ਪ੍ਰਬੰਧਕਾਂ ਵਿਰੁਧ ਸੰਘਰਸ਼ ਵਿੱਢਣ ਵਾਲੇ ਸ਼ੀਸ ਮਹਿਲ ਕਲੌਨੀ ਵਾਸੀਆਂ ਵਲੋਂ ਅੱਜ ਵੀ ਮੁੱਖ ਗੇਟ ’ਤੇ ਧਰਨਾ ਲਗਾ ਕੇ ਨਾਅਰੇਬਾਜ਼ੀ ਕੀਤੀ ਗਈ। ਇਸਦੇ ਨਾਲ ਪਿਛਲੇ ਇੱਕ ਮਹੀਨੇ ਤੋਂ ਜਿਆਦਾਤਰ ਕਲੌਨੀ ਵਾਸੀਆਂ ਦੇ ਘਰਾਂ ਉਪਰ ਕਲੌਨੀ ’ਚ ਪਲਾਟ ਖ਼ਰੀਦਣ ਤੋਂ ਪਹਿਲਾਂ ਸੰਪਰਕ ਕਰਨ ਲਈ ਫਲੈਕਸਾਂ ਲਗਾਈਆਂ ਹੋਈਆਂ ਹਨ। ਉਧਰ ਅੱਜ ਦੇ ਧਰਨੇ ਨੂੰ ਸੰਬੋਧਨ ਕਰਦਿਆਂ ਕਲੌਨੀ ਕਮੇਟੀ ਦੇ ਉਪ ਪ੍ਰਧਾਨ ਸੁਖਪਾਲ ਸਿੰਘ ਸਰਾਂ, ਸੈਕਟਰੀ ਪ੍ਰਸ਼ਾਂਤ ਗਰਗ, ਅਰਵਿੰਦਰ ਸਿੰਘ, ਕੁਲਦੀਪ ਸਿੰਘ ਤੇ ਹੋਰਨਾਂ ਨੇ ਦੋਸ਼ ਲਗਾਇਆ ਕਿ ਦਰਜ਼ਨਾਂ ਵਾਰ ਲਿਖ਼ਤੀ ਸਿਕਾਇਤ ਕਰਨ ਦੇ ਬਾਵਜੂਦ ਵੀ ਕਲੋਨੀ ਵਿਚ ਧਰਤੀ ਹੇਠਲੇ ਪਾਣੀ ਦੀ ਸਪਲਾਈ ਆ ਰਹੀ ਹੈ, ਜਿਸ ਵਿਚ ਕਈ ਵਾਰ ਸੀਵਰ ਦਾ ਪਾਣੀ ਵੀ ਮਿਲਿਆ ਹੁੰਦਾ ਹੈ। ਇਸ ਤੋਂ ਇਲਾਵਾ ਵਪਾਰਕ ਮੰਤਵ ਲਈ ਛੱਡੀ ਜਗ੍ਹਾਂ ਉਪਰ ਹੁਣ ਫਲੈਟ ਉਸਾਰਣ ਦੀ ਯੋਜਨਾ ਦਾ ਵੀ ਕਲੌਨੀ ਵਾਸੀਆਂ ਵਲੋਂ ਵਿਰੋਧ ਕੀਤਾ ਜਾ ਰਿਹਾ ਹੈ। ਧਰਨੇ ਵਿਚ ਕਲੌਨੀ ਵਾਸੀਆਂ ਦੇ ਨਾਲ ਬੱਚਿਆਂ ਨੇ ਵੀ ਹਿੱਸਾ ਲਿਆ।