ਹਲਕੀ ਬਾਰਸ਼ ਤੋਂ ਬਾਅਦ ਮਾਲਵਾ ਪੱਟੀ ’ਚ ਠੰਢ ਨੇ ਜ਼ੋਰ ਫੜਿਆ

ਮੌਸਮ ਵਿਭਾਗ ਮੁਤਾਬਕ ਅਗਲੇ ਦਿਨਾਂ ‘ਚ ਠੰਢ ਦਾ ਪ੍ਰਕੋਪ ਹੋਰ ਵਧੇਗਾ
ਸੁਖਜਿੰਦਰ ਮਾਨ
ਬਠਿੰਡਾ, 29 ਦਸੰਬਰ: ਪਿਛਲੇ ਕੁੱਝ ਦਿਨਾਂ ਤੋਂ ਪੈ ਰਹੀ ਠੰਢ ਦੇ ਦੌਰਾਨ ਅੱਜ ਹੋਈ ਹਲਕੀ ਬਾਰਸ ਤੋਂ ਬਾਅਦ ਮਾਲਵਾ ਪੱਟੀ ’ਚ ਠੰਢ ਨੇ ਹੋਰ ਜੋਰ ਫ਼ੜ ਲਿਆ ਹੈ। ਪਹਿਲਾਂ ਹੀ ਪੰਜਾਬ ਦੇ ਸਭ ਤੋਂ ਠੰਢ ਰਹਿਣ ਵਾਲੇ ਇਲਾਕਿਆਂ ਵਿਚ ਦਰਜ ਬਠਿੰਡਾ ਵਿਚ ਅੱਜ ਬੱਦਲਵਾਈ ਛਾਈ ਰਹੀ ਤੇ ਸੂਰਜ ਦੇਵਤਾ ਨੇੇ ਦਰਸ਼ਨ ਨਹੀਂ ਦਿੱਤੇ। ਜਿਸ ਕਾਰਨ ਮਾਲਵਾ ਖੇਤਰ ਵਿੱਚ ਮਨੁੱਖੀ ਜ਼ਿੰਦਗੀ ਦੀ ਰਫ਼ਤਾਰ ਨੂੰ ਬਰੇਕ ਲੱਗ ਗਈ ਹੈ। ਜਿਕਰਯੋਗ ਹੈ ਕਿ ਸਵੇਰ ਅਤੇ ਸ਼ਾਮ ਪੈ ਰਹੀ ਧੁੰਦ ਕਾਰਨ ਹਨੇਰਾ ਛਾ ਜਾਂਦਾ ਹੈ ਅਤੇ ਸੜਕਾਂ ਤੇ ਚੱਲਣ ਵਾਲੇ ਵਾਹਨਾਂ ਦੇ ਹਾਦਸਿਆਂ ਦੀ ਗਿਣਤੀ ਵੀ ਵਧ ਰਹੀ ਹੈ। ਉਧਰ ਠੰਢ ਕਾਰਨ ਪੇਂਡੂ ਖੇਤਰ ਅਤੇ ਸ਼ਹਿਰੀ ਖੇਤਰਾਂ ਦੇ ਸੜਕੀ ਕੰਢਿਆਂ ਉੱਪਰ ਗ਼ਰੀਬ ਵਰਗ ਦੇ ਲੋਕਾਂ ਨੇ ਅੱਗ ਸੇਕ ਕਿ ਦਿਨ ਲੰਘਾਇਆ ਅਤੇ ਕੰਮ ਕਾਜ ਨਾ ਮਿਲਣ ਕਾਰਨ ਗ਼ਰੀਬ ਵਰਗ ਦੇ ਚੁੱਲ੍ਹੇ ਵੀ ਠੰਢੇ ਰਹੇ। ਖੇਤੀਬਾੜੀ ਯੂਨੀਵਰਸਿਟੀ ਦੇ ਖੇਤਰੀ ਕੈਂਪਸ ਅਨੁਸਾਰ ਹਾਲੇ ਧੁੰਦ ਠੰਢ ਤੋ ਛੁਟਕਾਰਾ ਮਿਲਦਾ ਦਿਖਾਈ ਦਿੰਦਾ ਨਜ਼ਰ ਨਹੀਂ ਆ ਰਿਹਾ ਮਾਲਵੇ ਖੇਤਰ ਦੇ ਜ਼ਿਲ੍ਹਾ ਬਠਿੰਡਾ ਵਿੱਚ ਲਗਾਤਾਰ ਪਾਰਾ ਗਿਰਾਵਟ ਵੱਲ ਜਾ ਰਿਹਾ ਹੈ ਅਤੇ ਬੀਤੀ ਬੁੱਧਵਾਰ ਦੇ ਦਿਨ ਬਠਿੰਡਾ ਗਰਾਂਟ ਤੋ ਠੰਢਾ ਰਿਹਾ । ਜ਼ਿਕਰਯੋਗ ਹੈ ਬੀਤੀ ਇੱਕ ਹਫ਼ਤੇ ਤੋਂ ਲੈ ਕਿ ਬਠਿੰਡਾ ਅੰਦਰ ਦਿਨ ਪਾਰਾ 1 ਡਿਗਰੀ ਸੈਲਸੀਅਸ ਤੋਂ ਲੈ 5.6 ਡਿਗਰੀ ਤੱਕ ਬਣਿਆ ਹੋਇਆ ਹੈ। ਬਠਿੰਡਾ ਦੇ ਮਹਿਣਾ ਚੌਂਕ ਵਿਚਲੇ ਦੁਕਾਨਦਾਰ ਰਵੀ ਕੁਮਾਰ ਅਤੇ ਸੰਜੀਵ ਕੁਮਾਰ ਦਾ ਕਹਿਣਾ ਹੈ ਠੰਢ ਕਾਰਨ ਦੁਕਾਨਾਂ ਤੇ ਗਾਹਕ ਵੀ ਘੱਟ ਗਿਆ ਅਤੇ ਲੋਕ ਘਰ ਵਿੱਚ ਬੈਠ ਕਿ ਆਨਲਾਈਨ ਆਰਡਰ ਰਾਹੀ ਹੀ ਸਮਾਨ ਮੰਗਵਾ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਠੰਢ ਕਾਰਨ ਭਾਵੇਂ ਜਨ ਜੀਵਨ ਅਸਥ ਵਿਆਸਥ ਨਜ਼ਰ ਆ ਰਿਹਾ ਹੈ ਪਰ ਜੇਕਰ ਖੇਤੀ ਸੈਕਟਰ ਦੀ ਗੱਲ ਕੀਤੀ ਜਾਵੇ ਤਾਂ ਧੁੰਦ ਦਾ ਮੌਸਮ ਕਣਕ ਲਈ ਬੇਹੱਦ ਲਾਹੇਵੰਦ ਹੈ ਜਿਸ ਦੀ ਖੇਤੀ ਮਾਹਿਰ ਪੁਸ਼ਟੀ ਕਰ ਰਹੇ ਹਨ।