ਮਾਨਸਾ ਦੀ ਧਰਤੀ `ਤੇ ਰੈਲੀ ਦੌਰਾਨ ਚਿੱਟਾ ਤੇ ਹੋਰ ਨਸ਼ਿਆਂ ਨੂੰ ਜੜੋਂ ਪੁੱਟ ਕੇ ਦਮ ਲੈਣ ਦਾ ਐਲਾਨ

ਨਸ਼ਾ ਵਿਰੋਧੀ ਸਾਂਝੀ ਐਕਸ਼ਨ ਕਮੇਟੀ ਵੱਲੋਂ 14 ਅਗਸਤ ਨੂੰ ਮੁੜ ਵੱਡਾ ਇਕੱਠ ਕਰਨ ਦਾ ਐਲਾਣ
ਪੰਜਾਬੀ ਖ਼ਬਰਸਾਰ ਬਿਉਰੋ
ਮਾਨਸਾ, 21 ਜੁਲਾਈ:ਨਸ਼ਾ ਵਿਰੋਧੀ ਸਾਂਝੀ ਐਕਸ਼ਨ ਕਮੇਟੀ ਅਤੇ ਐਂਟੀ ਡਰੱਗ ਟਾਸਕ ਫੋਰਸ ਮਾਨਸਾ ਦੇ ਸੱਦੇ `ਤੇ ਅੱਜ ਮਾਨਸਾ ਵਿਖੇ ਮਰਦਾਂ ਅਤੇ ਔਰਤਾਂ ਨੇ ਸਮੂਲੀਅਤ ਕਰਕੇ ਪੂਰੇ ਸੂਬੇ `ਚ ਨਸ਼ਾ ਬੰਦੀ ਲਈ ਅਵਾਜ ਬੁਲੰਦ ਕੀਤੀ।ਹੱਥਾਂ `ਚ ਨਸ਼ਾ ਵਿਰੋਧੀ ਬੈਨਰ ਅਤੇ ਤਖਤੀਆਂ ਫੜ੍ਹੀਂ ਕਾਫਲਿਆਂ ਦੇ ਕਾਫਲੇ ਰੈਲੀ ਵਾਲੀ ਥਾਂ ਪੁੱਜਦੇ ਰਹੇ। ਭਾਰੀ ਇਕੱਠਾ ਕਾਰਨ ਥਾਂ ਦੀ ਪਈ ਘਾਟ ਦਾ ਖੁਦ ਹੀ ਹੱਲ ਕਰਦਿਆਂ ਬਜ਼ੁਰਗਾਂ , ਔਰਤਾਂ ਅਤੇ ਆਮ ਲੋਕਾਂ ਨੇ ਕਚਹਿਰੀਆਂ ਦੀ ਹਰ ਸੜਕ `ਤੇ ਆਪਣਾ ਪੜਾਅ ਕੀਤਾ । ਪ੍ਰਬੰਧਕ ਵੱਲੋਂ ਥਾਂ ਥਾਂ ਨਸ਼ੇ ਕਾਰਨ ਮੌਤ ਦੇ ਮੂੰਹ ਜਾ ਪਏ ਨੌਜਵਾਨ ਮੁੰਡਿਆਂ ਦੀਆਂ ਤਸਵੀਰਾਂ ਵਾਲੇ ਫਲੈਕਸ ਟੰਗੇ ਹੋਏ ਸਨ ਜਿੰਨ੍ਹਾਂ ਨੂੰ ਦੇਖ ਕੇ ਹਰ ਕੋਈ ਭਾਵੁਕ ਹੁੰਦਾ ਰਿਹਾ ।ਬੁਲਾਰਿਆਂ ਦੇ ਮੰਚ ਤੋਂ ਸੰਬੋਧਨ ਦੌਰਾਨ ਪੰਡਾਲ ਵਿੱਚੋਂ ਨਸ਼ਾ ਬੰਦੀ, ਸਰਕਾਰ ਅਤੇ ਪੁਲੀਸ ਪ੍ਰਸਾਸ਼ਨ ਮੁਰਦਾਬਾਦ, ਪਰਵਿੰਦਰ ਸਿੰਘ ਝੋਟਾ ਜਿੰਦਾਬਾਦ ਦੇ ਨਾਅਰੇ ਗੁੰਜਦੇ ਰਹੇ। ਆਪਣੇ ਸੰਬੋਧਨ ਦੌਰਾਨ ਸੰਯੁਕਤ ਕਿਸਾਨ ਮੋਰਚਾ ਦੇ ਆਗੂ ਰੁਲਦੂ ਸਿੰਘ ਮਾਨਸਾ, ਡਾਕਟਰ ਦਰਸਨ ਪਾਲ , ਜਗਜਤੀ ਸਿੰਘ ਡੱਲੇਵਾਲ ਅਤੇ ਉੱਤਰ ਪ੍ਰਦੇਸ਼ ਤੋਂ ਵਿਸ਼ੇਸ਼ ਤੌਰ `ਤੇ ਪੁੱਜੇ ਰਿਕੇਸ਼ ਟਕੈਤ ਨੇ ਪੂਰਨ ਸਹਿਯੋਗ ਦਾ ਐਲਾਣ ਕਰਦਿਆਂ ਤਸਕਰਾਂ ਦਾ ਸਮਾਜਿਕ ਬਾਈਕਾਟ ਕਰਨ, ਨਸ਼ਾ ਬੰਦੀ ਤੱਕ ਦਿੱਲੀ ਦੀ ਤਰ੍ਹਾਂ ਸ਼ਾਂਤਮਈ ਸੰਘਰਸ਼ ਲੜਨ ਅਤੇ ਪੰਜਾਬ ਦੀ ਜਵਾਨੀ ਨੂੰ ਬਚਾਉਂਣ ਲਈ ਹਰ ਸੰਘਰਸ਼ ਕਰਨ ਦਾ ਐਲਾਣ ਕੀਤਾ । ਆਗੂਆਂ ਕਿਹਾ ਜੇਕਰ ਲੋਕ ਏਕਤਾ ਦਿੱਲੀ ਦੀ ਤਾਨਾਸ਼ਾਹ ਸਰਕਾਰ ਦੀ ਗੋਡਣੀ ਲਵਾ ਸਕਦੀ ਹੈ ਤਾਂ ਪਹਿਲਾਂ ਤੋਂ ਹੀ ਤੀਲਾ ਤੀਲਾ ਹੋਈ ਆਪ ਸਰਕਾਰ ਕਿਹੜੇ ਬਾਗ ਦੀ ਮੂਲੀ ਹੈ। ਐਡਵੋਕੇਟ ਲਖਵਿੰਦਰ ਸਿੰਘ ਲੱਖਨਪਾਲ ਨੇ ਨਸ਼ਾ ਮੁਕਤੀ ਲਈ ਸੰਘਰਸ਼ ਕਰ ਰਹੇ ਪਰਵਿੰਦਰ ਸਿੰਘ ਝੋਟਾ ਅਤੇ ਸਾਥੀਆਂ ਖਿਲਾਫ਼ ਪੁਲੀਸ ਵੱਲੋਂ ਦਰਜ਼ ਕੀਤੇ ਝੂਠੇ ਪਰਚਿਆਂ ਦਾ ਸੱਚ ਲੋਕਾਂ ਸਾਹਮਣੇ ਰੱਖਿਆ ।ਉਨ੍ਹਾਂ ਦੱਸਿਆ ਕਿ ਝੋਟੇ `ਤੇ ਛੇੜ ਝਾੜ ਦਾ ਝੂਠਾ ਪਰਚਾ ਦਰਜ ਕਰਵਾਉਂਣ ਵਾਲੀ ਲੜਕੀ ਬਬਲੀ ਨੇ ਵੀ ਕਬੂਲ ਕਰ ਲਿਆ ਹੈ ਕਿ ਉਸਨੇ ਪੁਲੀਸ ਦੇ ਕਹੇ ਗਲਤ ਬਿਆਨ ਦਰਜ਼ ਕਰਵਾਏ ਸਨ। ਨੌਜਵਾਨ ਆਗੂ ਲੱਖਾ ਸਿਧਾਣਾ, ਵਿਜੈ ਕੁਮਾਰ ਭੀਖੀ ,ਭਾਨਾ ਸਿੱਧੂ, ਰੁਪਿੰਦਰ ਸਿੰਘ ,ਇਮਾਨ ਸਿੰਘ ਮਾਨ, ਭਗਵੰਤ ਸਮਾਓ,ਸਤਨਾਮ ਸਿੰਘ ਮਨਾਵਾ ਨੇ ਐਲਾਣ ਕੀਤਾ ਜੇਕਰ ਸਰਕਾਰ ਨੇ ਨਸ਼ਾ ਤਸਕਰਾਂ ਸਮੇਤ ਨਸ਼ਾ ਵਿਕਰੀ `ਚ ਦੋਸ਼ੀਆਂ ਦੀ ਮੱਦਦ ਕਰਨ ਵਾਲੇ ਅਫਸਰਾਂ ਖਿਲਾਫ਼ ਤੁਰੰਤ ਕਾਰਵਾਈ ਨਾ ਕੀਤਾ ਤਾਂ ਰਾਜ ਕਰਦੀ ਪਾਰਟੀ ਦੇ ਕਿਸੇ ਵੀ ਆਗੂ ਨੂੰ ਪਿੰਡਾਂ ਵਿੱਚ ਨਹੀਂ ਜਾਣ ਦਿੱਤਾ ਜਾਵੇਗਾ। ਉਨ੍ਹਾਂ ਕਿਹਾ ਤਸਕਰਾਂ, ਨੇਤਾਵਾਂ ਅਤੇ ਅਫ਼ਸਰਾਂ ਦੀ ਚੰਡਾਲ ਤਿੱਕੜੀ ਨੂੰ ਤੀਲਾ ਤੀਲਾ ਕਰਕੇ ਹੀ ਪੰਜਾਬ ਦੀ ਜਵਾਨੀ ਬਚ ਸਕਦੀ ਹੈ।ਨਸ਼ੇ ਕਾਰਨ ਆਪਣਾ ਪਤੀ ਗਵਾ ਚੁੱਕੀ ਰਮਨਦੀ ਕੌਰ ਮਰਖਈ ਨੇ ਆਪਣੀ ਝੋਲੀ ਅੱਡ ਕੇ ਲੋਕਾਂ ਕੋਲੋਂ ਪਿੰਡਾਂ `ਚ ਦਾਲ ਸਬਜ਼ੀ ਵਾਂਗ ਵਿਕਦੇ ਨਸ਼ਿਆਂ ਨੂੰ ਰੋਕਣ ਲਈ ਹਰ ਮਰਦ ਔਰਤ ਤੋਂ ਸਹਿਯੋਗ ਮੰਗਿਆ । ਪਰਵਿੰਦਰ ਸਿੰਘ ਝੋਟੇ ਦੇ ਮਾਤਾ ਅਮਰਜੀਤ ਕੌਰ ਅਤੇ ਮਰਹੂਮ ਸਿੱਧੂ ਮੂਸੇਵਾਲਾ ਦੇ ਪਿਤਾ ਬਲਕੌਰ ਸਿੰਘ ਸਿੰਧੂ ਨੇ ਆਪਣੇ ਸਬੋਧਨ ਦੌਰਾਨ ਕਿਹਾ ਕਿ ਸਰਕਾਰ ਨੇ ਪੰਜਾਬ ਨੂੰ ਬਚਾਉਂਣ ਵਾਲੇ ,ਪੰਜਾਬ ਨੂੰ ਵਸਦਾ ਦੇਖਣ ਵਾਲੇ ਅਤੇ ਪੰਜਾਬ ਦੀ ਜਵਾਨੀ ਅਤੇ ਪੰਜਾਬੀਅਤ ਨੂੰ ਮੋਹ ਕਰਨ ਵਾਲੇ ਨੌਜਵਾਨ ਆਗੂਆਂ ਨੂੰ ਮਾਰ ਮੁਕਾਉਂਣ ਜਾਂ ਫੜ੍ਹਕੇ ਜੇਲ੍ਹਾਂ ਵਿੱਚ ਸੁੱਟਣ ਦਾ ਕੋਝਾ ਵਰਤਾਰਾ ਸ਼ੁਰੂ ਕੀਤਾ ਹੋਇਆ ਹੈ ਜਿਸਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ । ਇਸਤਰੀ ਆਗੂ ਜਸਵੀਰ ਕੌਰ ਨੰਤ ਨੇ ਕਿਹਾ ਕਿ ਨਸ਼ੇ ਤੋਂ ਪੀੜਤ ਪੁੱਤਾਂ ਅਤੇ ਪਤੀਆਂ ਦਾ ਸਭ ਤੋਂ ਵੱਡਾ ਦੁੱਖ ਔਰਤਾਂ ਹੀ ਭੋਗਦੀਆਂ ਹਨ । ਉਨ੍ਹਾਂ ਪੰਡਾਲ `ਚ ਇਕੱਤਰ ਹਜ਼ਾਰਾਂ ਔਰਤਾਂ ਨੂੰ ਮਾਈ ਭਾਗੋ ਬਣਨ ਦਾ ਸੱਦਾ ਦਿੱਤਾ । ਸਾਂਝੀ ਐਕਸ਼ਨ ਕਮੇਟੀ ਦੇ ਕਨਵੀਨਰ ਰਾਜਵਿੰਦਰ ਸਿੰਘ ਰਾਣਾ ਨੇ ਵੱਡੇ ਮੰਚ ਤੋਂ ਐਲਾਣ ਕੀਤਾ ਕਿ 14 ਅਗਸਤ ਨੂੰ ਫਿਰ ਮਾਨਸਾ ਦੀ ਧਰਤੀ `ਤੇ ਇਸਤੋਂ ਵੀ ਵੱਡਾ ਇਕੱਠਾ ਕੀਤਾ ਜਾਵੇਗਾ । ਇਸ ਇਕੱਠ ਦੌਰਾਨ ਨਸ਼ਾ ਬੰਦੀ ਦੇ ਇਸ ਸਫਲ ਸੰਘਰਸ਼ ਦਾ ਮੁੱਢ ਬੰਨ੍ਹਣ ਵਾਲੇ ਐਂਟੀ ਟਾਸਕ ਫੋਰਸ ਦੀ ਸਮੁੱਚੀ ਟੀਮ ਦਾ ਸਨਮਾਨ ਕੀਤਾ ਜਾਵੇਗਾ । ਜੇਕਰ ਉਦੋਂ ਤੱਕ ਪਰਵਿੰਦਰ ਸਿੰਘ ਝੋਟਾ ਬਾਹਰ ਆਉਂਦਾ ਹੈ ਤਾਂ ਸਮੁੱਚੀ ਟੀਮ ਨੂੰ ਫੁੱਲਾਂ ਦੇ ਹਾਰਾਂ ਨਾਲ ਲਿਵਾਜਿਆ ਜਾਵੇਗਾ ਤੇ ਜੇਕਰ ਉਦੋਂ ਤੱਕ ਵੀ ਹਰ ਥਾਂ ਝੂਠੇ ਸਾਬਤ ਹੋ ਰਹੇ ਪ੍ਰਸ਼ਾਨ ਦੀ ਨੀਂਦ ਨਾ ਖੁੱਲ੍ਹੀ ਤਾਂ ਤਿੱਖੇ ਸੰਘਰਸ਼ ਦੀ ਰੂਪ ਰੇਖਾ ਦਾ ਐਲਾਣ ਕਰ ਦਿੱਤਾ ਜਾਵੇਗਾ ।ਮੰਚ ਤੋਂ ਪਰਵਿੰਦਰ ਸਿੰਘ ਝੋਟਾ ਦੀ ਸਾਰੇ ਝੂਠੇ ਕੇਸ਼ ਰੱਦ ਕਰਕੇ ਤੁਰੰਤ ਰਿਹਈ ਦੀ ਮੰਗ ਕੀਤੀ ਗਈ ਅਤੇ ਨਾਲ ਹੀ ਉਸਦੇ ਸਾਥੀਆਂ `ਤੇ ਦਰਜ਼ ਕੀਤੇ ਪਰਚੇ ਰੱਦ ਕਰਨ ਦੀ ਮੰਗ ਕੀਤੀ ਗਈ । ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸੁਖਦਰਸ਼ਨ ਸਿੰਘ ਨੱਤ ,ਕ੍ਰਿਸ਼ਨ ਚੌਹਾਨ, ਬਲਦੇਵ ਸਿੰਘ ਸਿਰਸਾ,ਵਿਸ਼ਵਦੀਪ ਫਾਜ਼ਿਲਕਾ, ਧੰਨਾ ਮੱਲ ਗੋੲਲ, ਗੁਰਸੇਵਕ ਸਿੰਘ ਜਵਾਹਰਕੇ, ਹਰਿੰਦਰਪਾਲ ਸਿੰਘ ਖਾਲਸਾ, ਸੁਖਜਿੰਦਰ ਸਿੰਘ ਖੋਸਾ,ਜ਼ਸਵੰਤ ਸਿੰਘ, ਸੁਖਜੀਤ ਸਿੰਘ ਰਾਮਾਨੰਦੀ, ਸੈਬੇਦਾਰ ਦਰਸਨ ਸਿੰਘ,ਨਿਰਮਲ ਸਿੰਘ ,ਮਹਿੰਦਰ ਸਿੰਘ ਭੈਣੀ,ਘਣਸ਼ਾਮ ਨਿੱਕੂ,ਗਗਨਦੀਪ ਸਿੰਘ , ਅਮਨਦੀਪ ਪਟਵਾਰੀ,ਬਲਵਿੰਦਰ ਕੌਰ, ਛੱਜੂ ਰਾਮ ਰਿਸ਼ੀ ਸਮੇਤ ਸੱਤਰ ਆਗੂਆਂ ਨੇ ਸੰਬੋਧਨ ਕੀਤਾ ।