ਚੰਡੀਗੜ੍ਹ ’ਚ ਵੀ ਓਮੀਕਰੋਨ ਦੀ ਦਸਤਕ, 20 ਸਾਲਾਂ ਨੌਜਵਾਨ ਪਾਜ਼ੀਟਿਵ ਮਿਲਿਆ

ਸੁਖਜਿੰਦਰ ਮਾਨ
ਚੰਡੀਗੜ੍ਹ,12 ਦਸੰਬਰ: ਦੇਸ ’ਚ ਕਰੋਨਾ ਮਹਾਂਮਾਰੀ ਦੀ ਸੰਭਾਵਿਤ ਆਉਣ ਵਾਲੀ ਤੀਜ਼ੀ ਲਹਿਰ ਲਈ ਜਿੰਮੇਵਾਰ ਮੰਨੇ ਜਾਣ ਵਾਲੇ ਕਰੋਨਾ ਵਾਇਰਸ ਦੇ ਨਵੇਂ ਰੂਪ ਓਮੀਕ੍ਰੋਨ ਨੇ ਹੁਣ ਪੰਜਾਬ ਤੇ ਹਰਿਆਣਾ ਦੀ ਰਾਜਧਾਨੀ ਚੰਡੀਗੜ੍ਹ ’ਚ ਵੀ ਦਸਤਕ ਦੇ ਦਿੱਤੀ ਹੈ। ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਮੁਤਾਬਕ ਸਥਾਨਕ ਸ਼ਹਿਰ ‘ਚ ਰਹਿੰਦੇ ਅਪਣੇ ਰਿਸ਼ਤੇਦਾਰਾਂ ਨੂੰ ਮਿਲਣ ਆਇਆ ਇੱਕ 20 ਸਾਲਾ ਇਕ ਨੌਜਵਾਨ ਕੋਰੋਨਾ ਦੇ ਇਸ ਨਵੇਂ ਵੈਰੀਏਂਟ ਨਾਲ ਪਾਜੇਟਿਵ ਪਾਇਆ ਗਿਆ ਹੈ। ਪਤਾ ਲੱਗਿਆ ਹੈ ਕਿ ਇਹ ਨੌਜਵਾਨ ਪਿਛਲੇ ਮਹੀਨੇ ਹੀ ਇਟਲੀ ਤੋਂ ਆਇਆ ਸੀ ਅਤੇ ਉਸਦੇ ਫ਼ਾਈਜ਼ਰ ਕੰਪਨੀ ਦੀਆਂ ਦੋਨੋ ਵੈਕਸੀਨ ਡੋਜ਼ ਵੀ ਲੱਗੀਆਂ ਹੋਈਆਂ ਹਨ। ਮਹੱਤਵਪੂਰਨ ਗੱਲ ਇਹ ਵੀ ਸਾਹਮਣੇ ਆਈ ਹੈ ਕਿ ਨੌਜਵਾਨ ਨੂੰ ਕੋਈ ਲੱਛਣ ਵੀ ਜਿਆਦਾ ਨਹੀਂ ਸੀ। ਇਸ ਮਰੀਜ਼ ਕਾਰਨ ਚੰਡੀਗੜ੍ਹ ਦੇ ਲੋਕਾਂ ਵਿਚ ਚਿੰਤਾ ਵਧ ਗਈ ਹੈ। ਇਸਤੋਂ ਇਲਾਵਾ ਇਹ ਸ਼ਹਿਰ ਦੋ ਸੂਬਿਆਂ ਦੀ ਰਾਜਧਾਨੀ ਹੋਣ ਕਾਰਨ ਤੇ ਇਸਦੇ ਨਾਲ ਦੋ ਵੱਡੇ ਸ਼ਹਿਰ ਪੰਚਕੂਲਾ ਤੇ ਮੋਹਾਲੀ ਲੱਗਦੇ ਹੋਣ ਕਾਰਨ ਸਿਹਤ ਵਿਭਾਗ ਨੇ ਅਲਰਟ ਜਾਰੀ ਕਰ ਦਿੱਤਾ ਹੈ। ਦਸਣਾ ਬਣਦਾ ਹੈ ਕਿ ਹੁਣ ਤਕ ਕਰੋਨਾ ਦੇ ਨਵੇਂ ਆਏ ਰੂਪਾਂ ਵਿਚੋਂ ਓਮੀਕ੍ਰੋਨ ਸਭ ਤੋਂ ਤੇਜੀ ਨਾਲ ਫੈਲਦਾ ਹੈ।