ਜੇਲ੍ਹ ‘ਚੋਂ ਫ਼ਿਰੌਤੀਆਂ ਮੰਗਣ ਵਾਲੇ ਦੀ ਪਤਨੀ ਤੇ ਪੁੱਤਰ ਗਿ੍ਰਫਤਾਰ

ਜੇਲ੍ਹ ਦੀ ਚੈਕਿੰਗ ਦੌਰਾਨ ਮੋਬਾਇਲ ਫ਼ੋਨ ਬਰਾਮਦ, ਪ੍ਰੋਡਕਸ਼ਨ ਵਰੰਟ ’ਤੇ ਲਿਆਉਣ ਦੀ ਤਿਆਰੀ
ਸੁਖਜਿੰਦਰ ਮਾਨ
ਬਠਿੰਡਾ, 21 ਮਾਰਚ: ਦੋ ਦਿਨ ਪਹਿਲਾਂ ਫਰੀਦਕੋਟ ਜੇਲ੍ਹ ਵਿਚ ਬੰਦ ਇੱਕ ਮੁਜਰਮ ਵਲੋਂ ਜਵੈਲਰਜ਼ ਮਾਲਕਾਂ ਤੋਂ ਫ਼ਿਰੌਤੀਆਂ ਮੰਗਣ ਦੇ ਮਾਮਲੇ ’ਚ ਪੁਲਿਸ ਨੇ ਮੁਜਰਮ ਦਾ ਸਾਥ ਦੇਣ ਦੇ ਦੋਸ਼ਾਂ ਹੇਠ ਉਸਦੀ ਪਤਨੀ ਤੇ ਪੁੱਤਰ ਨੂੰ ਗਿ੍ਰਫਤਾਰ ਕਰ ਲਿਆ ਹੈ। ਦੋਨਾਂ ਕੋਲੋ ਫ਼ਿਰੌਤੀ ਵਜੋਂ ਲਏ ਗਏ ਪੈਸਿਆਂ ਵਿਚੋਂ ਸਾਢੇ 39 ਹਜ਼ਾਰ ਰੁਪਏ ਵੀ ਬਰਾਮਦ ਕਰ ਲਏ ਗਏ ਹਨ। ਉਧਰ ਫ਼ਰੀਦਕੋਟ ਜੇਲ੍ਹ ਦੀ ਲਈ ਤਲਾਸ਼ੀ ਦੌਰਾਨ ਤਰਸੇਮ ਨਿਊਰ ਨਾਂ ਦੇ ਉਕਤ ਮੁਜ਼ਰਮ ਕੋਲੋ ਫ਼ਿਰੌਤੀ ਮੰਗਣ ਲਈ ਵਰਤਿਆਂ ਗਿਆ ਮੋਬਾਇਲ ਫ਼ੋਨ ਵੀ ਬਰਾਮਦ ਹੋ ਗਿਆ ਹੈ। ਅੱਜ ਇੱਥੇ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਡੀਐਸਪੀ ਹਰਿੰਦਰ ਸਿੰਘ ਅਤੇ ਸੀਆਈਏ-2 ਦੇ ਇੰਚਾਰਜ਼ ਤਰਜਿੰਦਰ ਸਿੰਘ ਨੇ ਦਸਿਆ ਕਿ ਮੁਜਰਮ ਤਰਸੇਮ ਉਰਫ਼ ਸੇਮਾ ਵਾਸੀ ਨਿਊਰ ਨੂੰ ਜਲਦੀ ਹੀ ਪੁਛਗਿਛ ਲਈ ਫ਼ਰੀਦਕੋਟ ਜੇਲ੍ਹ ਵਿਚੋਂ ਪ੍ਰੋਡਕਸ਼ਨ ਵਰੰਟ ’ਤੇ ਲਿਆਂਦਾ ਜਾ ਰਿਹਾ ਹੈ। ਗੌਰਤਲਬ ਹੈ ਕਿ ਜੇਲ੍ਹ ਵਿਚੋਂ ਹੀ ਫ਼ੋਨ ਕਰਕੇ ਤਰਸੇਮ ਸਿੰਘ ਸੇਮਾ ਨੇ ਗੋਨਿਆਣਾ ਮੰਡੀ ਦੇ ਲੱਖੀ ਜਵੈਲਰਜ਼ ਦੇ ਮਾਲਕ ਸੁਖਵਿੰਦਰ ਸਿੰਘ ਉਰਫ਼ ਲੱਖੀ, ਰੂਪ ਜਵੈਲਰਜ਼ ਦੇ ਧਰਮਿੰਦਰ ਸਿੰਘ ਅਤੇ ਬਠਿੰਡਾ ਦੇ ਪ੍ਰੀਤ ਜਵੈਲਰਜ਼ ਤੋਂ ਫ਼ੋਨ ਕਰਕੇ ਪੈਸੇ ਮੰਗੇ ਸਨ। ਸੁਖਵਿੰਦਰ ਸਿੰਘ ਲੱਖੀ ਨੇ ਡਰਦੇ ਹੋਏ ਉਕਤ ਮੁਜਰਮ ਵੱਲੋਂ ਦਿੱਤੇੇ ਨੰਬਰ ਉੱਪਰ ਗੂਗਲ ਪੇਅ ਰਾਹੀਂ ਪੰਜਾਹ ਹਜਾਰ ਰੁਪਏ ਭੇਜ ਦਿੱਤੇ ਸਨ। ਪੁਲਿਸ ਅਧਿਕਾਰੀਆਂ ਨੇ ਖ਼ੁਲਾਸਾ ਕੀਤਾ ਕਿ ਮੁਜਰਮ ਤਰਸੇਮ ਦੀ ਪਤਨੀ ਹਰਪ੍ਰੀਤ ਕੌਰ ਅਤੇ ਲੜਕਾ ਰਾਜਦੀਪ ਸਿੰਘ ਪਹਿਲਾ ਪੈਸਿਆਂ ਵਾਲੀ ਸਾਮੀ ਦਾ ਨੰਬਰ ਲੱਭਦੇ ਸਨ ਤੇ ਫ਼ਿਰ ਕਿਸੇ ਮਨੀ ਐਕਸ਼ਚੇਜ਼ਰ ਦਾ ਨੰਬਰ ਲੱਭਦੇ ਸਨ, ਜਿਸਤੋਂ ਬਾਅਦ ਇਹ ਦੋਨੋਂ ਨੰਬਰ ਤਰਸੇਮ ਨੂੰ ਦੇ ਦਿੰਦੇ ਸਨ ਤੇ ਉਹ ਫ਼ੋਨ ਕਰਦਾ ਸੀ। ਪੈਸੇ ਆਉਣ ਤੋਂ ਬਾਅਦ ਹਰਪ੍ਰੀਤ ਕੋਰ ਉਕਤ ਮਨੀ ਅਕਸੈਂਚਜਰ ਕੋਲੋ ਪੈਸੇ ਲੈ ਆਉਂਦੇ ਸਨ।