ਵਿਧਾਇਕ ਨਾਲ ਵਿਵਾਦ ਤੋਂ ਬਾਅਦ ਡੀਸੀਪੀ ਦਾ ਤਬਾਦਲਾ

ਪੰਜਾਬੀ ਖ਼ਬਰਸਾਰ ਬਿਉਰੋ
ਜਲੰਧਰ, 23 ਸਤੰਬਰ: ਇੱਥੇ ਤੈਨਾਤ ਡੀਸੀਪੀ ਨਰੇਸ਼ ਡੋਗਰਾ ਅਤੇ ਆਪ ਵਿਧਾਇਕ ਰਮਨ ਅਰੋੜਾ ਵਿਚਕਾਰ ਹੋਏ ਵਿਵਾਦ ਦਾ ਮਾਮਲਾ ਸੋਸਲ ਮੀਡੀਆ ’ਤੇ ਵਾਈਰਲ ਹੋਣ ਤੋਂ ਬਾਅਦ ਅੱਜ ਪੰਜਾਬ ਸਰਕਾਰ ਨੇ ਪੁਲਿਸ ਅਧਿਕਾਰੀ ਡੋਗਰਾ ਦਾ ਪੀਏਪੀ ਵਿਚ ਤਬਾਦਲਾ ਕਰ ਦਿੱਤਾ। ਹਾਲਾਂਕਿ ਪਹਿਲਾਂ ਇਹ ਵੀ ਕਿਹਾ ਜਾ ਰਿਹਾ ਸੀ ਕਿ ਡੋਗਰਾ ਵਿਰੁਧ ਪਰਚਾ ਵੀ ਦਰਜ਼ ਕੀਤਾ ਜਾ ਰਿਹਾ ਹੈ ਪ੍ਰੰਤੂ ਬਾਅਦ ਵਿਚ ਦੋਵਾਂ ਪੱਖਾਂ ਚ ਰਾਜ਼ੀਨਾਮਾ ਹੋਣ ਦੀ ਚਰਚਾ ਹੈ ਜਿਸਤੋਂ ਬਾਅਦ ਇੱਕ ਵਾਰ ਮਾਮਲਾ ਸ਼ਾਂਤ ਹੋ ਗਿਆ ਹੈ। ਵਿਧਾਇਕ ਰਮਨ ਅਰੋੜਾ ਨੇ ਵੀ ਖੁਦ ਨੂੰ ਇਸ ਮਾਮਲੇ ਵਿਚ ਪਾਸੇ ਕਰਦੇ ਹੋਏ ਦਾਅਵਾ ਕੀਤਾ ਹੈ ਕਿ ਇਹ ਵਿਵਾਦ ਡੀਸੀਪੀ ਤੇ ਵਾਲਮੀਕੀ ਭਾਈਚਾਰੇ ਵਿਚ ਹੋਇਆ ਸੀ। ਗੌਰਤਲਬ ਹੈ ਕਿ ਇਸ ਮਾਮਲੇ ਵਿਚ ਦੋ ਵੀਡੀਓ ਵੀ ਸੋਸਲ ਮੀਡੀਆ ’ਤੇ ਵਾਈਰਲ ਹੋਈਆਂ ਸਨ, ਜਿੰਨ੍ਹਾਂ ਵਿਚ ਇੱਕ ਵੀਡੀਓ ‘ਚ ਡੀਸੀਪੀ ਡੋਗਰਾ ਨੂੰ ਕੁੱਝ ਲੋਕ ਘੇਰੀ ਬੈਠੇ ਹਨ ਤੇ ਦੂਜੀ ‘ਚ ਡੀਸੀਪੀ ਜਸਕਿਰਨ ਤੇਜਾ ਉਨ੍ਹਾਂ ਨੂੰ ਬਚਾ ਕੇ ਲਿਜਾ ਰਹੇ ਹਨ।