ਸੁਖਜਿੰਦਰ ਮਾਨ
ਬਠਿੰਡਾ, 23 ਸਤੰਬਰ :ਨਰਮਾ ਪੱਟੀ ਦੇ ਪਿੰਡਾਂ ’ਚ ਗੁਲਾਬੀ ਸੁੰਡੀ ਕਾਰਨ ਫ਼ਸਲ ਦੇ ਹੋਏ ਵੱਡੇ ਨੁਕਸਾਨ ਦੀ ਭਰਪਾਈ ਲਈ ਅੱਜ ਕਾਂਗਰਸ ਦੇ ਜ਼ਿਲ੍ਹਾ ਪ੍ਰਧਾਨ ਖੁਸਬਾਜ ਸਿੰਘ ਜਟਾਣਾ ਨੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਕੋਲ ਮਾਮਲਾ ਚੁੱਕਦਿਆਂ ਉਨ੍ਹਾਂ ਨੂੰ ਇੱਕ ਪੱਤਰ ਵੀ ਦਿੱਤਾ। ਇੱਥੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਜਟਾਣਾ ਨੇ ਦਸਿਆ ਕਿ ਮੁੱਖ ਮੰਤਰੀ ਚੰਨੀ ਸਾਹਿਬ ਨੂੰੂ ਹਲਕਾ ਤਲਵੰਡੀ ਸਾਬੋ ਵਿੱਚ ਨਰਮੇ ਦੀ ਫਸਲ ’ਤੇ ਗੁਲਾਬੀ ਸੁੰਡੀ ਦੇ ਹੋਏ ਹਮਲੇ ਬਾਰੇ ਜਾਣਕਾਰੀ ਦਿੱਤੀ ਤੇ ਹਲਕੇ ਦੇ ਸਾਰੇ ਪਿੰਡਾਂ ਵਿੱਚ ਸ਼ਪੈਸ਼ਲ ਗਿਰਦਾਵਰੀ ਕਰਵਾ ਕੇ ਕਿਸਾਨ ਅਤੇ ਮਜਦੂਰ ਭਰਾਵਾਂ ਨੂੰ ਬਣਦਾ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ ਗਈ। ਹਲਕਾ ਤਲਵੰਡੀ ਸਾਬੋ ਦੇ ਇੰਚਾਰਜ਼ ਜਟਾਣਾ ਨੇ ਦਾਅਵਾ ਕੀਤਾ ਕਿ ਮੁੱਖ ਮੰਤਰੀ ਵੱਲੋਂ ਕਿਸਾਨ ਭਰਾਵਾਂ ਦੀ ਇਸ ਸਮੱਸਿਆ ਨੂੰ ਮੁੱਖ ਰੱਖਦੇ ਹੋਏ ਮੌਕੇ ’ਤੇ ਹੀ ਮੁੱਖ ਸਕੱਤਰ ਨੂੰ ਫੋਨ ਕਰਕੇ ਹਲਕਾ ਤਲਵੰਡੀ ਸਾਬੋ ਦੇ ਸਾਰੇ ਪਿੰਡਾਂ ਵਿੱਚ ਹੋਏ ਨੁਕਸਾਨ ਦੀ ਦੋ ਦਿਨਾਂ ਵਿੱਚ ਰਿਪੋਰਟ ਬਣਾਕੇ ਦੇਣ ਸਬੰਧੀ ਹੁਕਮ ਦਿੱਤੇ। ਜਿਸਦੇ ਚੱਲਦੇ ਉਨ੍ਹਾਂ ਨੂੰ ਮੁੱਖ ਮੰਤਰੀ ਵੱਲੋਂ ਪੂਰਾ ਭਰੋਸਾ ਦਿਵਾਇਆ ਗਿਆ ਕਿ ਜੋ ਕਿਸਾਨ ਭਰਾਵਾਂ ਦਾ ਨੁਕਸਾਨ ਹੋਇਆ ਉਸ ਨੂੰ ਜਲਦੀ ਤੋਂ ਜਲਦੀ ਸਪੈਸ਼ਲ ਗਿਰਦਾਵਰੀ ਕਰਵਾਕੇ ਮੁਆਵਜ਼ਾ ਦਿੱਤਾ ਜਾਵੇਗਾ। ਇਸ ਮੌਕੇ ਉਨ੍ਹਾਂ ਸ: ਚੰਨੀ ਨੂੰ ਮੁੱਖ ਮੰਤਰੀ ਬਣਨ ’ਤੇ ਵਧਾਈ ਵੀ ਦਿੱਤੀ।

ਕਾਂਗਰਸ ਮਖੌਟੇ ਬਦਲਣੇ ਕਰੇ ਬੰਦ-ਜਗਰੂਪ ਗਿੱਲ

ਸੁਖਜਿੰਦਰ ਮਾਨ

ਬਠਿੰਡਾ 23 ਸਤੰਬਰ –ਆਗਾਮੀ ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਸਿਆਸੀ ਪਾਰਟੀਆਂ ਵਲੋਂ ਕੀਤੀਆਂ ਜਾ ਰਹੀਆਂ ਗਤੀਵਿਧੀਆਂ ਦੀ ਕੜੀ ਤਹਿਤ ਅੱਜ ਆਮ ਆਦਮੀ ਪਾਰਟੀ ਦੀ ਬਠਿੰਡਾ ਸਹਿਰੀ ਯੂਨਿਟ ਦੁਆਰਾ ਹਲਕਾ ਇੰਚਾਰਜ ਜਗਰੂਪ ਸਿੰਘ ਗਿੱਲ ਦੀ ਅਗਵਾਈ ’ਚ ਸਿਆਸੀ ਦਮਖ਼ਮ ਦਿਖਾਇਆ ਗਿਆ। ਸਥਾਨਕ ਇੱਕ ਪੈਲੇਸ ’ਚ ਹੋਈ ਮੀਟਿੰਗ ਵਿਚ ਇਕੱਠੇ ਹੋਏ ਪਾਰਟੀ ਵਲੰਟੀਅਰਜ ਨੇ ਆਗੂਆਂ ਦੇ ਹੋਸਲੇ ਬੁਲੰਦ ਕੀਤੇ। ਇਸ ਮੌਕੇ ਹਲਕਾ ਇੰਚਾਰਜ਼ ਜਗਰੂਪ ਸਿੰਘ ਗਿੱਲ ਨੇ ਦਾਅਵਾ ਕੀਤਾ ਕਿ ਪਾਰਟੀ ਦਾ ਇੱਕ ਇੱਕ ਵਲੰਟੀਅਰ ਲੋਕ ਪੱਖੀ ਨੀਤੀਆਂ ਨੂੰ ਘਰ ਘਰ ਤੱਕ ਲੈ ਕੇ ਜਾਵਾਂਗੇ ਅਤੇ ਲੋਕਾਂ ਨੂੰ ਆਗਾਮੀ ਵਿਧਾਲ ਸਭਾ ਚੋਣਾਂ ’ਚ ਆਪ ਨੂੰ ਮੌਕਾ ਦੇਣ ਲਈ ਪ੍ਰੇਰਿਤ ਕੀਤਾ ਜਾਵੇਗਾ। ਸ: ਗਿੱਲ ਨੇ ਕਿਹਾ ਕਿ ਹੁਣ ਲੋਕ ਕਾਂਗਰਸ ਸਰਕਾਰ ਵਲੋਂ ਬਦਲੇ ਜਾ ਰਹੇ ਮਖੌਟੇ ਬਦਲਣ ਦੇ ਝਾਂਸੇ ਵਿਚ ਨਹੀਂ ਆਉਣਗੇ। ਇਸ ਮੌਕੇ ਵਪਾਰ ਵਿੰਗ ਦੇ ਆਗੂ ਅਨਿਲ ਠਾਕੁਰ, ਕਾਰਜਕਾਰੀ ਪ੍ਰਧਾਨ ਅੰਮਿ੍ਰਤ ਅਗਰਵਾਲ, ਯੂਥ ਵਿੰਗ ਦੇ ਜ਼ਿਲ੍ਹਾ ਪ੍ਰਧਾਨ ਅਮਰਦੀਪ ਸਿੰਘ ਰਾਜਨ, ਲੋਕ ਸਭਾ ਆਗੂ ਰਾਕੇਸ ਪੁਰੀ, ਐਡਵੋਕੇਟ ਗੁਰਲਾਲ ਸਿੰਘ, ਐਡਵੋਕੇਟ ਗੁਰਪ੍ਰੀਤ ਸਿੰਘ ਸਿੱਧੂ, ਮਹਿੰਦਰ ਸਿੰਘ ਫੁੱਲੋ ਮਿੱਠੀ, ਸੁਖਵੀਰ ਬਰਾੜ ਆਦਿ ਹਾਜਰ ਸਨ।

ਸੁਖਜਿੰਦਰ ਮਾਨ
ਬਠਿੰਡਾ, 23 ਸਤੰਬਰ –ਬਾਬਾ ਫ਼ਰੀਦ ਗਰੁੱਪ ਆਫ਼ ਇੰਸਟੀਚਿਊਸ਼ਨਜ਼ਵਿਖੇ ਬਾਬਾ ਸ਼ੇਖ਼ ਫ਼ਰੀਦ ਜੀ ਦੇ ਆਗਮਨ ਪੁਰਬ ਦੇ ਸੰਬੰਧ ਵਿੱਚ ਜੀਵਨ, ਰਚਨਾ ਅਤੇ ਸਿੱਖਿਆਵਾਂ ਬਾਰੇ ਵਿਦਿਆਰਥੀਆਂ ਨੂੰ ਜਾਣੂ ਕਰਵਾਉਣ ਦੇ ਮੁੱਢਲੇ ਮੰਤਵ ਵਜੋਂ ਕੁਇਜ਼ ਮੁਕਾਬਲਾ ਕਰਵਾਇਆ ਗਿਆ। ਇਸ ਮੌਕੇ ਗੁਰੂ ਗੋਬਿੰਦ ਸਿੰਘ ਸਟੱਡੀ ਸਰਕਲ ਸ੍ਰੀ ਮੁਕਤਸਰ ਸਾਹਿਬ ਤੋਂ ਪ੍ਰੋਫੈਸਰ ਗੁਰਪ੍ਰੀਤ ਸਿੰਘ ਨੇ ਮੁੱਖ ਬੁਲਾਰੇ ਵਜੋਂ ਸ਼ਿਰਕਤ ਕੀਤੀ। ਪ੍ਰੋਫੈਸਰ ਗੁਰਪ੍ਰੀਤ ਸਿੰਘ ਨੇ ਕਿਹਾ ਕਿ ਬਾਬਾ ਫ਼ਰੀਦ ਜੀ ਦੀਆਂ ਸਿੱਖਿਆਵਾਂ ਦੇ ਫ਼ਲਸਫ਼ੇ ਨੂੰ ਆਪਣੇ ਜੀਵਨ ਵਿੱਚ ਲਾਗੂ ਕਰ ਕੇ ਹੀ ਜ਼ਿੰਦਗੀ ਜਿਊਣ ਦੇ ਅਸਲ ਢੰਗ ਬਾਰੇ ਜਾਣਿਆ ਜਾ ਸਕਦਾ ਹੈ। ਉਨ੍ਹਾਂ ਨੇ ਬਾਬਾ ਫ਼ਰੀਦ ਜੀ ਦੇ ਸਲੋਕਾਂ ਦੀ ਵਿਆਖਿਆ ਕਰਕੇ ਬਾਬਾ ਸ਼ੇਖ਼ ਫ਼ਰੀਦ ਜੀ ਦੀ ਵਿਚਾਰਧਾਰਾ ਨੂੰ ਅਪਣਾਉਣ ਬਾਰੇ ਪ੍ਰੇਰਿਤ ਕੀਤਾ ਅਤੇ ਵਿਦਿਆਰਥੀਆਂ ਨਾਲ ਬਾਬਾ ਸ਼ੇਖ਼ ਫ਼ਰੀਦ ਜੀ ਦੇ ਜੀਵਨ, ਰਚਨਾ ਅਤੇ ਸਿੱਖਿਆਵਾਂ ਬਾਰੇ ਵਡਮੁੱਲੀ ਜਾਣਕਾਰੀ ਸਾਂਝੀ ਕੀਤੀ।ਡਿਪਟੀ ਡਾਇਰੈਕਟਰਬੀ. ਡੀ. ਸ਼ਰਮਾ ਨੇ ਆਏ ਹੋਏ ਮਹਿਮਾਨ ਬੁਲਾਰੇ ਦਾ ਸਵਾਗਤ ਕੀਤਾ।ਇਸ ਮੌਕੇ ਬੀ.ਐਫ.ਜੀ.ਆਈ. ਦੇ ਚੇਅਰਮੈਨ ਡਾ.ਗੁਰਮੀਤ ਸਿੰਘ ਧਾਲੀਵਾਲ ਨੇ ਸੰਬੋਧਨ ਕਰਦਿਆਂ ਹਾਜ਼ਰੀਨ ਨੂੰ ਬਾਬਾ ਸ਼ੇਖ਼ ਫ਼ਰੀਦ ਆਗਮਨ ਪੁਰਬ ਦੀ ਵਧਾਈ ਦਿੱਤੀ । ਉਨ੍ਹਾਂ ਦੱਸਿਆ ਕਿ ਸੰਸਥਾ ਵਿਖੇ ਹਰ ਸਾਲ ਇਹ ਦਿਨ ਬਹੁਤ ਹੀ ਸ਼ਰਧਾਪੂਰਵਕ ਮਨਾਇਆ ਜਾਂਦਾ ਹੈ ਜੋ ਕਿ ਬਾਬਾ ਸ਼ੇਖ਼ ਫ਼ਰੀਦ ਜੀ ਦੀ ਵਿਚਾਰਧਾਰਾ ਅਤੇ ਸੋਚ ਨੂੰ ਜਾਣਨ ਲਈ ਬਹੁਤ ਚੰਗਾ ਮੌਕਾ ਹੁੰਦਾ ਹੈ। ਮੰਚ ਸੰਚਾਲਨ ਦੀ ਭੂਮਿਕਾ ਮੈਡਮ ਅੰਮਿ੍ਰਤਪਾਲ ਕੌਰ (ਸੋਸ਼ਲ ਵੈੱਲਫੇਅਰ ਡਿਪਾਰਟਮੈਂਟ) ਨੇ ਬਾਖ਼ੂਬੀ ਨਿਭਾਈ।

ਮਨਪ੍ਰੀਤ ਬਾਦਲ ਦਾ ਮੁੜ ਮੰਤਰੀ ਬਣਨਾ ਤੈਅ, ਗੁਰਪ੍ਰੀਤ ਕਾਂਗੜ੍ਹ ਵਲੋਂ ਵੀ ਭੱਜਦੋੜ ਜਾਰੀ

ਸੁਖਜਿੰਦਰ ਮਾਨ
ਬਠਿੰਡਾ, 23 ਸਤੰਬਰ -ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਕੱਟੜ ਵਿਰੋਧੀ ਮੰਨੇ ਜਾਂਦੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਤੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਸਹਿਤ ਉਪ ਮੁੱਖ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਵਲੋਂ ਕੌਮੀ ਯੂਥ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਵਜ਼ਾਰਤ ’ਚ ਸ਼ਾਮਲ ਕਰਨ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। ਉਕਤ ਤਿੰਨੇਂ ਆਗੂ ਤੇ ਖ਼ਾਸਕਰ ਸਿੱਧੂ ਤੇ ਰੰਧਾਵਾ ਮੌਜੂਦਾ ਸਮੇਂ ਪੰਜਾਬ ਕਾਂਗਰਸ ਦੀ ਸਿਆਸਤ ’ਚ ਬਾਦਲਾਂ ਵਿਰੁਧ ਸਕਤੀਸ਼ਾਲੀ ਆਗੂ ਵਜੋਂ ਉਭਰ ਕੇ ਸਾਹਮਣੇ ਆਏ ਹਨ। ਅਜਿਹੀ ਹਾਲਾਤ ’ਚ ਬਾਦਲ ਪ੍ਰਵਾਰ ਨੂੰ ਉਨ੍ਹਾਂ ਦੇ ਗੜ੍ਹ ’ਚ ਘੇਰਣ ਲਈ ਪੰਜਾਬ ਕਾਂਗਰਸ ਤੇ ਸਰਕਾਰ ਵਲੋਂ ਰਾਜਾ ਵੜਿੰਗ ਵਰਗੇ ਨੌਜਵਾਨ ਆਗੂ ਨੂੰ ਥਾਪੜਾ ਦਿੱਤਾ ਜਾ ਸਕਦਾ ਹੈ, ਜਿਹੜੇ ਮੌਜੂਦਾ ਸਮੇਂ ’ਚ ਦੱਖਣੀ ਮਾਲਵਾ ਵਿਚ ਸਭ ਤੋਂ ਵੱਡੇ ਬਾਦਲ ਵਿਰੋਧੀ ਆਗੂ ਵਜੋਂ ਚਰਚਿਤ ਹੋਏ ਹਨ। ਇੱਥੇ ਦਸਣਾ ਬਣਦਾ ਹੈ ਕਿ ਰਾਜਾ ਵੜਿੰਗ ਪਿਛਲੀਆਂ ਲੋਕ ਸਭਾ ਚੋਣਾਂ ਵਿਚ ਵੀ ਬਾਦਲ ਪ੍ਰਵਾਰ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਵਿਰੁਧ ਚੋਣ ਮੈਦਾਨ ਵਿਚ ਨਿੱਤਰੇ ਸਨ, ਜਿੱਥੇ ਉਨ੍ਹਾਂ ਤਕੜੀ ਟੱਕਰ ਦਿੱਤੀ ਸੀ ਪ੍ਰੰਤੂ ਉਹ ਕੁੱਝ ਹਜ਼ਾਰ ਵੋਟਾਂ ਦੇ ਅੰਤਰ ਨਾਲ ਹਾਰ ਗਏ ਸਨ। ਸਿਆਸੀ ਮਾਹਰਾਂ ਮੁਤਾਬਕ ਜੇਕਰ ਰਾਜਾ ਵੜਿੰਗ ਮੰਤਰੀ ਬਣਦੇ ਹਨ ਤਾਂ ਅਪਣੇ ਜੱਦੀ ਜ਼ਿਲ੍ਹੇ ਨੂੰ ਖੁੱਲਾ ਛੱਡ ਕੇ ਪੂਰੇ ਪੰਜਾਬ ’ਚ ਘੁੰਮਣ ਵਾਲੇ ਸੁਖਬੀਰ ਸਿੰਘ ਬਾਦਲ ਨੂੰ ਮੁੜ ਰਣਨੀਤੀ ਬਣਾਉਣ ਲਈ ਮਜਬੂਰ ਹੋਣਾ ਪੈ ਸਕਦਾ ਹੈ। ਇਸਤੋਂ ਇਲਾਵਾ ਵੜਿੰਗ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਪੁਰਾਣੇ ਜੱਦੀ ਹਲਕੇ ਗਿੱਦੜਵਹਾ ਵਿਚੋਂ ਵੀ ਲਗਾਤਾਰ ਦੋ ਵਾਰ ਜਿੱਤ ਪ੍ਰਾਪਤ ਕਰ ਚੁੱਕੇ ਹਨ ਤੇ ਪਿਛਲੇ ਸਾਢੇ ਚਾਰ ਸਾਲਾਂ ਵਿਚ ਸ਼੍ਰੀ ਮੁਕਤਸਰ ਸਾਹਿਬ ਜ਼ਿਲ੍ਹੇ ਵਿਚੋਂ ਕਾਂਗਰਸ ਦਾ ਕੋਈ ਨੁਮਾਇੰਦਾ ਪੰਜਾਬ ਸਰਕਾਰ ਵਿਚ ਸ਼ਾਮਲ ਨਹੀਂ ਕੀਤਾ ਗਿਆ ਸੀ। ਹਾਲਾਂਕਿ ਮਲੋਟ ਹਲਕੇ ਤੋਂ ਜਿੱਤੇ ਅਜਾਇਬ ਸਿੰਘ ਭੱਟੀ ਨੂੰ ਡਿਪਟੀ ਸਪੀਕਰ ਜਰੂਰ ਬਣਾਇਆ ਸੀ ਪ੍ਰੰਤੂ ਮੌਜੂਦਾ ਸਮੇਂ ਮਲੋਟ ਹਲਕੇ ’ਚ ਭੱਟੀ ਤੇ ਉਨ੍ਹਾਂ ਦੇ ਪੁੱਤਰ ਵਿਰੁਧ ਉਠ ਰਹੀਆਂ ਅਵਾਜ਼ਾਂ ਕਾਰਨ ਮੁੜ ਦਾਅ ਲੱਗਣਾ ਮੁਸ਼ਕਿਲ ਜਾਪਦਾ ਹੈ ਜਦੋਂਕਿ ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਵਿਧਾਇਕ ਮਨਪ੍ਰੀਤ ਸਿੰਘ ਬਾਦਲ ਦਾ ਮੁੜ ਮੰਤਰੀ ਬਣਨੀ ਤੈਅ ਹੈ। ਚਰਚਾ ਮੁਤਾਬਕ ਉਹ ਮੁੜ ਤੋਂ ਖ਼ਜਾਨਾ ਵਿਭਾਗ ਸੰਭਾਲ ਸਕਦੇ ਹਨ। ਉਨ੍ਹਾਂ ਦੀ ਨਵਜੋਤ ਸਿੱਧੂ ਦੇ ਇਲਾਵਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨਾਲ ਨੇੜਤਾ ਕਿਸੇ ਤੋਂ ਲੁਕੀ ਛਿਪੀ ਨਹੀਂ ਹੋਈ ਹੈ। ਇਸੇ ਤਰ੍ਹਾਂ ਫ਼ੂਲ ਹਲਕੇ ਤੋਂ ਤੀਜੀ ਵਾਰ ਵਿਧਾਇਕ ਤੇ ਕੈਪਟਨ ਵਜ਼ਾਰਤ ’ਚ ਪ੍ਰਭਾਵਸ਼ਾਲੀ ਮੰਤਰੀ ਰਹੇ ਗੁਰਪ੍ਰੀਤ ਸਿੰਘ ਕਾਂਗੜ੍ਹ ਦਾ ਰਾਹ ਰੋਕਣ ਲਈ ਕਈ ਤਾਕਤਾਂ ਕੰਮ ਕਰ ਰਹੀਆਂ ਹਨ ਪ੍ਰੰਤੂ ਉਹ ਵੀ ਮੁੜ ਸਿਆਸੀ ਤਾਕਤ ਹਾਸਲ ਕਰਨ ਲਈ ਭੱਜਦੋੜ ਕਰ ਰਹੇ ਹਨ। ਸੂਤਰਾਂ ਮੁਤਾਬਕ ਉਪ ਮੁੱਖ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਤੇ ਤਿ੍ਰਪਤ ਰਜਿੰਦਰ ਸਿੰਘ ਰੰਧਾਵਾ ਨਾਲ ਕਾਂਗੜ੍ਹ ਦੇ ਚੰਗੇ ਸਬੰਧ ਕੰਮ ਆ ਸਕਦੇ ਹਨ।

ਮਾਮਲਾ ਫ਼ਿਰੌਤੀ ਲਈ ਵਪਾਰੀ ਦੇ ਘਰ ਅੱਗੇ ਪੈਟਰੋਲ ਪੰਪ ਸੁੱਟਣ ਦਾ
ਸਪੈਸ਼ਲ ਸਟਾਫ਼ ਦਾ ਇੱਕ ਪੁਲਿਸ ਮੁਲਾਜਮ ਵੀ ਚਰਚਾ ’ਚ

ਸੁਖਜਿੰਦਰ ਮਾਨ

ਬਠਿੰਡਾ, 22 ਸਤੰਬਰ –ਲੰਘੀ 5 ਸਤੰਬਰ ਨੂੰ ਸ਼ਹਿਰ ਦੇ ਇੱਕ ਵਪਾਰੀ ਰਜਿੰਦਰ ਮੰਗਲਾ ਦੇ ਘਰ ਅੱਗੇ ਫ਼ਿਰੌਤੀ ਲਈ ਪੈਟਰੋਲ ਬੰਬ ਸੁੱਟਣ ਦਾ ਮਾਮਲਾ ਦਿਨ-ਬ-ਦਿਨ ਸਿਆਸੀ ਘੁੰਮਣਘੇਰੀਆਂ ਵਿਚ ਫ਼ਸਦਾ ਜਾ ਰਿਹਾ ਹੈ। ਹਾਲਾਂਕਿ ਇਸ ਮਾਮਲੇ ਵਿਚ ਪੁਲਿਸ ਨੇ ਇਸ ਕਾਂਡ ਦੇ ਮੁੱਖ ਸਰਗਨਾਂ ਲਾਲੀ ਮੋੜ ਸਹਿਤ ਅੱਧੀ ਦਰਜ਼ਨ ਵਿਅਕਤੀਆਂ ਨੂੰ ਗਿ੍ਰਫਤਾਰ ਕਰ ਲਿਆ ਹੈ ਪ੍ਰੰਤੂ ਇਸ ਕਾਂਡ ਕਾਰਨ ਚਰਚਾ ਵਿਚ ਆਏ ਪੰਕਜ਼ ਉਰਫ਼ ਚਿੰਕੀ ਦੇ ਨਾਲ ਸਬੰਧਾਂ ਨੂੰ ਲੈ ਕੇ ਕਾਂਗਰਸ ਅਤੇ ਅਕਾਲੀ ਦਲ ਆਹਮੋ ਸਾਹਮਣੇ ਆਏ ਹੋਏ ਹਨ। ਇਸ ਮਾਮਲੇ ਵਿਚ ਜਿੱਥੇ ਦੋਨਾਂ ਧਿਰਾਂ ਨੇ ਉਕਤ ਕਥਿਤ ਦੋਸ਼ੀਆਂ ਦੀਆਂ ਇੱਕ-ਦੂਜੇ ਫ਼ੋਟੋਆਂ ਵਾਇਰਲ ਕਰਕੇ ਨਜਦੀਕੀ ਹੋਣ ਦੇ ਦੋਸ਼ ਲਗਾਏ ਸਨ। ਉਥੇ ਕੁੱਝ ਦਿਨ ਪਹਿਲਾਂ ਸਾਬਕਾ ਅਕਾਲੀ ਵਿਧਾਇਕ ਸਰੂਪ ਸਿੰਗਲਾ ਵਲੋਂ ਸਾਥੀਆਂ ਨਾਲ ਪ੍ਰੈਸ ਕਾਨਫਰੰਸ ਕਰਕੇ ਚਿੰਕੀ ਦੇ ਕਾਂਗਰਸੀ ਲੀਡਰਾਂ ਨਾਲ ਨੇੜਤਾ ਵਾਲੀਆਂ ਫ਼ੋਟੋਆਂ ਦੀ ਪ੍ਰਦਰਸ਼ਨੀ ਵੀ ਲਗਾਈ ਸੀ। ਹਾਲਾਂਕਿ ਉਸ ਸਮੇਂ ਕਾਂਗਰਸੀ ਆਗੂਆਂ ਨੇ ਇਸਦਾ ਜਵਾਬ ਨਹੀਂ ਦਿੱਤਾ ਸੀ ਪ੍ਰੰਤੂ ਕਈ ਦਿਨਾਂ ਤੋਂ ਬਾਅਦ ਵਾਪਸ ਬਠਿੰਡਾ ’ਚ ਆਏ ਵਿਤ ਮੰਤਰੀ ਦੇ ਰਿਸ਼ਤੇਦਾਰ ਜੈਜੀਤ ਸਿੰਘ ਜੌਹਲ ਨੇ ਅਪਣੇ ਨਾਲ ਸ਼ਹਿਰ ਦੇ ਪ੍ਰਮੁੱਖ ਕਾਂਗਰਸੀ ਆਗੂਆਂ ਨੂੰ ਲੈ ਕੇ ਅਕਾਲੀਆਂ ਨੂੰ ਜਵਾਬ ਦਿੰਦਿਆਂ ਨਾ ਸਿਰਫ਼ ਚਿੰਕੀ ਦੀ ਸਾਬਕਾ ਵਿਧਾਇਕ ਨਾਲ ਫ਼ੋਟੋ, ਬਲਕਿ ਯੂਥ ਅਕਾਲੀ ਦਲ ਦੇ ਆਗੂਆਂ ਤੇ ਕੁੱਝ ਸਾਬਕਾ ਕੋਂਸਲਰਾਂ ਨੂੰ ਵੀ ਲਪੇਟੇ ਵਿਚ ਲੈਂਦਿਆਂ ਉਨ੍ਹਾਂ ਦੇ ਗੈਗਸਟਰਾਂ ਨਾਲ ਸਬੰਧਾਂ ਦੇ ਦੋਸ਼ ਲਗਾਏ। ਇਸ ਦੌਰਾਨ ਫ਼ੇਸਬੁੱਕ ’ਤੇ ਲਾਈਵ ਹੋਏ ਜੌਹਲ ਨੇ ਪੁਲਿਸ ਦੇ ਸਪੈਸ਼ਲ ਸਟਾਫ਼ ਵਿਚ ਤੈਨਾਤ ਇੱਕ ਕਾਂਸਟੇਬਲ ਨੂੰ ਸ਼ੱਕ ਦੇ ਦਾਈਰੇ ਵਿਚ ਲਿਆਉਂਦਿਆਂ ਉਕਤ ਕਾਂਸਟੇਬਲ ਤੇ ਅਕਾਲੀ ਆਗੂ ਦੀ ਕਾਲ ਡਿਟੇਲ ਕਢਵਾ ਕੇ ਪੁਲਿਸ ਅਧਿਕਾਰੀਆਂ ਕੋਲ ਉਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ।

ਸੁਖਜਿੰਦਰ ਮਾਨ
ਬਠਿੰਡਾ, 22 ਸਤੰਬਰ -ਪਿਛਲੇ ਕਈ ਮਹੀਨਿਆਂ ਤੋਂ ਕੈਪਟਨ ਅਮਰਿੰਦਰ ਸਿੰਘ ਵਿਰੁਧ ਬਗਾਵਤ ਦਾ ਝੰਡਾ ਚੁੱਕਣ ਵਾਲਿਆਂ ਨਾਲ ਕਦਮ ਮਿਲਾਕੇ ਚੱਲ ਰਹੇ ਜ਼ਿਲ੍ਹੇ ਦੇ ਵਿਧਾਇਕ ਪ੍ਰੀਤਮ ਸਿੰਘ ਕੋਟਭਾਈ ਦਾ ਸਿਆਸੀ ਨਿਜ਼ਾਮ ਬਦਲਣ ਨਾਲ ਪ੍ਰਭਾਵ ਵਧਣ ਲੱਗਿਆ ਹੈ। ਕੁੱਝ ਸਮੇਂ ਪਹਿਲਾਂ ਤੱਕ ਹਲਕੇ ’ਚ ਲੈਣ ਵਾਲੀ ਅਫ਼ਸਰਸਾਹੀ ਹੁਣ ਉਕਤ ਵਿਧਾਇਕ ਦੇ ਗੇੜੇ ਕੱਟਣ ਲੱਗੀ ਹੈ। ਪ੍ਰਸ਼ਾਸਨਿਕ ਸੂਤਰਾਂ ਨੇ ਖ਼ੁਲਾਸਾ ਕੀਤਾ ਕਿ ਵਿਧਾਇਕ ਕੋਟਭਾਈ ਦੀ ਨਵੇਂ ਬਣੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਤੇ ਉਪ ਮੁੱਖ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਨੇੜਤਾ ਹੋਣ ਕਾਰਨ ਪ੍ਰਸ਼ਾਸਨ ’ਤੇ ਪਕੜ ਹੋਰ ਮਜਬੂਤ ਹੋਣ ਲੱਗੀ ਹੈ। ਹਾਲਾਂਕਿ ਸਿਆਸੀ ਹਲਕਿਆਂ ਵਿਚ ਚੱਲ ਰਹੀ ਚਰਚਾ ਮੁਤਾਬਕ ਪਾਰਟੀ ਅਗਲੀਆਂ ਚੋਣਾਂ ਵਿਚ ਪ੍ਰੀਤਮ ਸਿੰਘ ਕੋਟਭਾਈ ਦੀ ਥਾਂ ਉਨ੍ਹਾਂ ਦੇ ਪੁੱਤਰ ਐਡਵੋਕੇਟ ਰੁਪਿੰਦਰਪਾਲ ਕੋਟਭਾਈ , ਜੋ ਹਲਕੇ ਵਿਚ ਵਿਚਰ ਰਹੇ ਹਨ, ਨੂੰ ਮੌਕਾ ਦੇ ਸਕਦੀ ਹੈ ਪ੍ਰੰਤੂ ਸੂਬੇ ਵਿਚ ਹੋਏ ਸੱਤਾ ਪ੍ਰਵਰਤਨ ਕਾਰਨ ਪ੍ਰੀਤਮ ਸਿੰਘ ਕੋਟਭਾਈ ਦੀ ਤੂਤੀ ਬੋਲਣ ਲੱਗੀ ਹੈ। ਦਸਣਾ ਬਣਦਾ ਹੈ ਕਿ ਸਾਲ 2012 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਥੋੜੀਆਂ ਵੋਟਾਂ ਦੇ ਅੰਤਰ ’ਤੇ ਹਾਰਨ ਵਾਲੇ ਕੋਟਭਾਈ ਨੇ ਸੰਪਰਕ ਬਣਾਈ ਰੱਖਿਆ ਸੀ ਤੇ 2017 ਵਿਚ ਆਪ ਉਮੀਦਵਾਰ ਨੂੰ ਹਰਾ ਕੇ ਜਿੱਤ ਪ੍ਰਾਪਤ ਕੀਤੀ ਸੀ। ਇੱਥੇ ਜਿਕਰ ਕਰਨਾ ਬਣਦਾ ਹੈ ਕਿ ਸੂਬੇ ’ਚ ਸੱਤਾ ਨਿਜਾਮ ਬਦਲਣ ਕਾਰਨ ਜ਼ਿਲ੍ਹੇ ਦੇ ਕਈ ਕਾਂਗਰਸੀ ਆਗੂਆਂ ਤੇ ਵਿਧਾਇਕਾਂ ਦੀ ਪਕੜ ਢਿੱਲੀ ਹੁੰਦੀ ਜਾਪ ਰਹੀ ਹੈ ਜਦੋਂਕਿ ਕਈਆਂ ਦੇ ਹੱਥ ਸੱਤਾ ਦੀ ਚਾਬੀ ਆਉਂਦੀ ਦਿਖ਼ਾਈ ਦਿੰਦੀ ਹੈ। ਮੌਜੂਦਾ ਸਮੇਂ ਜ਼ਿਲ੍ਹੇ ਵਿਚ ਪੈਂਦੇ 6 ਵਿਧਾਨ ਸਭਾਂ ਹਲਕਿਆਂ ਵਿਚੋਂ ਚਾਰ ਵਿਚ ਕਾਂਗਰਸ ਪਾਰਟੀ ਨਾਲ ਸਬੰਧਤ ਨੁਮਾਇੰਦੇ ਹਨ ਜਦੋਂਕਿ ਦੋ ਹਲਕਿਆਂ ਆਪ ਦੇ ਆਗੂ ਨੁਮਾਇੰਦਗੀ ਕਰ ਰਹੇ ਹਨ।
.

ਮੰਗਲਵਾਰ ਤੇ ਸੁੱਕਰਵਾਰ ਨੂੰ ਬਿਨ੍ਹਾਂ ਸਮਾਂ ਲਏ ਵਿਧਾਇਕ ਮਿਲ ਸਕਣਗੇ ਮੁੱਖ ਮੰਤਰੀ ਨੂੰ

ਸੁਖਜਿੰਦਰ ਮਾਨ

ਬਠਿੰਡਾ, 22 ਸਤੰਬਰ –ਪਿਛਲੇ ਕਰੀਬ ਸਾਢੇ ਚਾਰ ਸਾਲਾਂ ਦੌਰਾਨ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਮਿਲਣ ਲਈ ਤਰਸਦੇ ਰਹੇ ਮੰਤਰੀ ਤੇ ਵਿਧਾਇਕ ਹੁਣ ਨਵੇਂ ਮੁੱਖ ਮੰਤਰੀ ਨੂੰ ਹਫ਼ਤੇ ’ਚ ਦੋ ਦਿਨ ਬਿਨ੍ਹਾਂ ਸਮਾਂ ਲਏ ਖੁੱਲੇ ਤੌਰ ’ਤੇ ਮਿਲ ਸਕਣਗੇ। ਮੁੱਖ ਮੰਤਰੀ ਦਫ਼ਤਰ ਦੇ ਉਚ ਸੂਤਰਾਂ ਮੁਤਾਬਕ ਚਰਨਜੀਤ ਸਿੰਘ ਚੰਨੀ ਵਲੋਂ ਵਿਧਾਇਕਾਂ ਤੇ ਹਲਕਾ ਇੰਚਾਰਜ਼ਾਂ ਦੀਆਂ ਮੁਸ਼ਕਿਲਾਂ ਨੂੰ ਧਿਆਨ ਵਿਚ ਰੱਖਦੇ ਹੋਏ ਮੰਗਲਵਾਰ ਤੇ ਸ਼ੁੱਕਰਵਾਰ ਦੋ ਦਿਨ ਉਨ੍ਹਾਂ ਲਈ ਰਾਖਵੇਂ ਰੱਖਣ ਦਾ ਫੈਸਲਾ ਲਿਆ ਹੈ। ਹਾਲਾਂਕਿ ਉਕਤ ਦਿਨ ਮੁੱਖ ਮੰਤਰੀ ਦੂਜੇ ਸਰਕਾਰੀ ਕੰਮ ਵੀ ਕਰਨਗੇ ਪ੍ਰੰਤੂ ਵਿਧਾਇਕਾਂ ਨੂੰ ਤਰਜੀਹ ਦਿੱਤੀ ਜਾਵੇਗੀੇ। ਇਸ ਸਬੰਧ ਵਿਚ ਜਲਦੀ ਹੀ ਐਲਾਨ ਕੀਤਾ ਜਾਵੇਗਾ। ਸੂਤਰਾਂ ਮੁਤਾਬਕ ਵਿਧਾਇਕਾਂ ਤੇ ਇੱਥੋਂ ਤੱਕ ਮੰਤਰੀਆਂ ਦੀ ਪਹੁੰਚ ਤੋਂ ਦੂਰ ਰਹੇ ਕੈਪਟਨ ਦੇ ਉਲਟ ਹੁਣ ਨਵੇਂ ਮੁੱਖ ਮੰਤਰੀ ਨੇ ਇਹ ਨੀਤੀ ਬਣਾਈ ਹੈ। ਇਹ ਵੀ ਪਤਾ ਲੱਗਿਆ ਹੈ ਕਿ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਅਪਣੇ ਅਤੇ ਮੰਤਰੀਆਂ, ਵਿਧਾਇਕਾਂ ਤੇ ਇੱਥੋਂ ਤੱਕ ਆਮ ਕਾਂਗਰਸੀ ਵਰਕਰਾਂ ਤੇ ਜਨਤਾ ਵਿਚਕਾਰ ਅਫ਼ਸਰਸਾਹੀ ਨੂੰ ‘ਕੰਧ’ ਬਣਨ ਤੋਂ ਰੋਕਣ ਲਈ ਵਿਸੇਸ ਹਿਦਾਇਤਾਂ ਜਾਰੀ ਕੀਤੀਆਂ ਹਨ ਤਾਂ ਕਿ ਸੂਬੇ ਦੀ ਜਨਤਾ ਤੇ ਖ਼ਾਸਕਰ ਕਾਂਗਰਸੀਆਂ ਵਿਚਕਾਰ ਪਿਛਲੇ ਸਾਢੇ ਚਾਰ ਸਾਲਾਂ ਦੌਰਾਨ ਸੂਬੇ ਵਿਚ ਅਫ਼ਸਰਸਾਹੀ ਦੀ ਸਰਕਾਰ ਹੋਣ ਦੇ ਪ੍ਰਭਾਵ ਨੂੰ ਬਦਲਿਆਂ ਜਾ ਸਕੇ। ਸ: ਚੰਨੀ ਦੇ ਨੇੜਲੇ ਸੂਤਰਾਂ ਨੇ ਦਸਿਆ ਕਿ ‘‘ ਮੁੱਖ ਮੰਤਰੀ ਮੁੱਖ ਸਕੱਤਰੇਤ ’ਚ ਸਥਿਤ ਅਪਣੇ ਦਫ਼ਤਰ ਅਤੇ ਅਪਣੀ ਸਰਕਾਰੀ ਰਿਹਾਇਸ਼ ਤੋਂ ਇਲਾਵਾ ਸੂਬੇ ਦੇ ਦੌਰਿਆਂ ਦੌਰਾਨ ਵੀ ਆਮ ਜਨਤਾ ਨਾਲ ਖੁੱਲਾ ਮੇਲ-ਮਿਲਾਪ ਕਰਿਆ ਕਰਨਗੇ ਤਾਂ ਲੋਕਾਂ ਵਿਚ ਅਪਣੀ ਸਰਕਾਰ ਹੋਣ ਦਾ ਪ੍ਰਭਾਵ ਦਿੱਤਾ ਜਾ ਸਕੇ। ’’ ਇਕੱਲੇ ਮੁੱਖ ਮੰਤਰੀ ਹੀ ਨਹੀਂ, ਬਲਕਿ ਆਉਣ ਵਾਲੇ ਦਿਨਾਂ ’ਚ ਪੂਰੀ ਵਜ਼ਾਰਤ ਦਾ ਗਠਨ ਹੋਣ ਤੋਂ ਬਾਅਦ ਵਜ਼ੀਰਾਂ ਨੂੰ ਇਹ ਹੁਕਮ ਦਿੱਤੇ ਜਾਣਗੇ ਕਿ ਉਹ ਆਮ ਲੋਕਾਂ ਦੀ ਪਹੁੰਚ ਵਿਚ ਰਹਿਣ। ਇੱਥੇ ਦਸਣਾ ਬਣਦਾ ਹੈ ਕਿ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਗੱਦੀ ਖੁੱਸਣ ਦਾ ਸਭ ਤੋਂ ਵੱਡਾ ਕਾਰਨ ਉਨ੍ਹਾਂ ਦਾ ਆਮ ਜਨਤਾ ਦੇ ਨਾਲ-ਨਾਲ ਅਪਣੀ ਸਰਕਾਰ ਦੇ ਮੰਤਰੀਆਂ ਤੇ ਵਿਧਾਇਕਾਂ ਦੀ ਪਹੁੰਚ ਤੋਂ ਦੂਰ ਹੋਣਾ ਰਿਹਾ ਹੈ। ਜਿਸਦੇ ਨਾਲ ਮੰਤਰੀਆਂ ਤੇ ਵਿਧਾਇਕਾਂ ਤੋਂ ਇਲਾਵਾ ਕਾਂਗਰਸੀਆਂ ਵਿਚ ਵੀ ਉਨ੍ਹਾਂ ਪ੍ਰਤੀ ਨਰਾਜ਼ਗੀ ਵਧਦੀ ਗਈ ਤੇ ਉਹ ਸਰਕਾਰ ਦੇ ਕੰਮਾਂ ਦਾ ਪ੍ਰਚਾਰ ਕਰਨ ਦੀ ਬਜਾਏ ਚੁੱੱਪ ਰਹਿਣ ਲੱਗੇ, ਜਿਸ ਕਾਰਨ ਆਮ ਜਨਤਾ ਵਿਚ ਵੀ ਸਰਕਾਰ ਪ੍ਰਤੀ ਨਾਂਹ ਪੱਖੀ ਪਹੁੰਚ ਬਣਨ ਲੱਗੀ ਸੀ। ਪ੍ਰੰਤੂ ਹੁਣ ਨਵੇਂ ਬਣੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਖੁਦ ਨੂੰ ਇੱਕ ਆਮ ਆਦਮੀ ਕਰਾਰ ਦੇ ਕੇ ਅਪਣੀ ਦਿੱਖ ਵੀ ਅਜਿਹੀ ਬਣਾਉਣਾ ਲੋਚਦੇ ਹਨ ਤਾਂ ਕਿ ਇਸਦੇ ਨਾਲ ਨਾ ਸਿਰਫ਼ ਸਾਲ 2022 ਵਿਚ ਅਪਣੇ ਚਿਹਰੇ ਨੂੰ ਮਜਬੂਤ ਕੀਤਾ ਜਾ ਸਕੇ, ਬਲਕਿ ਸੱਤਾ ਦੀ ਮੁੱਖ ਦਾਅਵੇਦਾਰ ਵਿਰੋਧੀ ਧਿਰ ਆਮ ਆਦਮੀ ਪਾਰਟੀ ਨੂੰ ਵੀ ਠਿੱਬੀ ਲਗਾਈ ਜਾ ਸਕੇ। ਹਾਲਾਂਕਿ ਬੀਤੇ ਕੱਲ ਉਨ੍ਹਾਂ ਵਲੋਂ ਇੱਕ ਵਿਸੇਸ ਜਹਾਜ ਰਾਹੀਂ ਦਿੱਲੀ ਜਾਣ ਦੇ ਫੈਸਲੇ ਦੀ ਚਰਚਾ ਨੇ ਥੋੜਾ ਨੁਕਸਾਨ ਪਹੁੰਚਾਇਆ ਹੈ।
ਬਾਕਸ
ਚੰਨੀ ਦੇ ਚੱਲਦੇ ਰਾਤ ਨੂੰ ਵੀ ਦਫ਼ਤਰ ਖੁੱਲਣ ਲੱਗੇ!
ਬਠਿੰਡਾ: ਉਧਰ ਆਗਾਮੀ ਚੋਣਾਂ ’ਚ ਸਮਾਂ ਕਾਫ਼ੀ ਘੱਟ ਹੋਣ ਕਾਰਨ ਨਵੇਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ 24 ਘੰਟਿਆਂ ਵਿਚੋਂ 18 ਘੰਟੇ ਕੰਮ ਕਰਨ ਲੱਗੇ ਹਨ। ਪਹਿਲੇ ਦਿਨ ਹੀ ਸਹੁੰ ਚੁੱਕਣ ਤੋਂ ਬਾਅਦ ਜਿਸ ਤਰ੍ਹਾਂ ਉਨ੍ਹਾਂ ਦਿਨ ਭਰ ਦੀਆਂ ਗਤੀਵਿਧੀਆਂ ਰਹੀਆਂ, ਉਸਦੇ ਨਾਲ ਬਾਲੀਵੁੱਡ ਦੀ ਮਸ਼ਹੂਰ ਫ਼ਿਲਮ ਨਾਇਕ ਪੰਜਾਬੀਆਂ ਨੂੰ ਯਾਦ ਆਉਣ ਲੱਗੀ ਹੈ। ਮੁੱਖ ਮੰਤਰੀ ਦਫ਼ਤਰ ਦੇ ਸੂਤਰਾਂ ਨੇ ਦਸਿਆ ਕਿ ਪਹਿਲੇ ਹੀ ਦਿਨ ਉਹ ਅੱਧੀ ਰਾਤ ਤੱਕ ਦਫ਼ਤਰ ਵਿਚ ਮੌਜੂਦ ਰਹੇ। ਜਦੋਂਕਿ ਦੂਜੇ ਦਿਨ ਉਨ੍ਹਾਂ ਦਿੱਲੀ ਰਵਾਨਾ ਹੋਣਾ ਸੀ। ਮੁੱਖ ਮੰਤਰੀ ਦੇ ਨਜਦੀਕੀਆਂ ਮੁਤਾਬਕ ਅੱਜ ਸਵੇਰੇ ਵੀ ਦਿੱਤੇ ਸਮੇਂ ਮੁਤਾਬਕ 3 ਵਜੇਂ ਸਵੇਰ ਉਠ ਕੇ ਪੌਣੇ ਚਾਰ ਵਜੇਂ ਹਰਮਿੰਦਰ ਸਾਹਿਬ ਪੁੱਜ ਗਏ ਤੇ ਜਿਸਤੋਂ ਬਾਅਦ ਕਈ ਥਾਂ ਜਾਣ ਤੋਂ ਬਾਅਦ ਮੁੜ ਦਫ਼ਤਰ ਪੁੱਜ ਗਏ। ਇਹ ਖ਼ਬਰ ਲਿਖੇ ਜਾਣ ਤੱਕ ਦੇਰ ਰਾਤ ਮੁੱਖ ਮੰਤਰੀ ਅਪਣੇ ਦਫ਼ਤਰ ਵਿਚ ਬਿਰਾਜਮਾਨ ਸਨ।

ਡਿਪਟੀ ਸੀਐਮ ਲਈ ਕਰ ਰਿਹਾ ਸੀ ਜੈਕੇਟ ਦੀ ਚੋਣ
ਸਿੱਧੂ ਤੇ ਜਾਖ਼ੜ ਧੜੇ ਦਾ ਵਿਰੋਧ ਰੰਧਾਵਾ ਨੂੰ ਪਿਆ ਮਹਿੰਗਾ

ਸੁਖਜਿੰਦਰ ਮਾਨ

ਬਠਿੰਡਾ, 19 ਸਤੰਬਰ –ਕਹਿੰਦੇ ਨੇ ਸਿਆਸਤ ’ਚ ਕੋਈ ਵੀ ਚੀਜ਼ ਸਥਾਈ ਨਹੀਂ ਹੁੰਦੀ ਤੇ ਖ਼ਾਸਕਰ ਕਾਂਗਰਸ ਵਰਗੀ ਪਾਰਟੀ ’ਚ। ਅਜਿਹਾ ਹੀ ਕੁੱਝ ਵਾਪਰਿਆਂ ਸੁਨੀਲ ਜਾਖੜ ਤੇ ਮਾਂਝੇ ਦੇ ਜਰਨੈਲ ਸੁਖਜਿੰਦਰ ਸਿੰਘ ਰੰਧਾਵਾ ਨਾਲ, ਜਿਹੜੇ ਮੁੱਖ ਮੰਤਰੀ ਦੀ ਸਹੁੰ ਚੁੱਕਣ ਲਈ ਰਾਜਪਾਲ ਨੂੰ ਮਿਲਣ ਜਾਂਦੇ-ਜਾਂਦੇ ਖ਼ਾਲੀ ਹੱਥ ਰਹਿ ਗਏ। ਸਪੋਕਸਮੈਨ ਦੇ ਇਸ ਪ੍ਰਤੀਨਿਧ ਵਲੋਂ ਕਾਂਗਰਸ ਪਾਰਟੀ ਦੇ ਉਚ ਸੂਤਰਾਂ ਨਾਲ ਕੀਤੀ ਗੱਲਬਾਤ ਦੌਰਾਨ ਸਾਹਮਣੇ ਆਇਆ ਕਿ ਰੰਧਾਵਾ ਦਾ ਨਾਮ ਲਗਭਗ ਤੈਅ ਹੋਣ ਅਤੇ ਖ਼ੁਦ ਨੂੰ ਉਪ ਮੁੱਖ ਮੰਤਰੀ ਦੇ ਅਹੁੱਦੇ ਦਾ ਇਸ਼ਾਰਾ ਮਿਲਣ ਤੋਂ ਬਾਅਦ ਲਈ ਸਹੁੰ ਚੁੱਕਣ ਵਾਸਤੇ ਪਹਿਨਣ ਲਈ ਗੱਡੀ ਵਿਚ ਜਾਂਦੇ ਸਮੇਂ ਅਪਣੇ ਸਾਥੀਆਂ ਨਾਲ ‘ਡਰੈਸ’ ਦੀ ਚਰਚਾ ਕਰਦੇ-ਕਰਦੇ ਚਰਨਜੀਤ ਸਿੰਘ ਚੰਨੀ ਦੀ ਅਚਾਨਕ ਕਿਸਮਤ ਜਾਗ ਪਈ। ਜਦੋਂਕਿ ਸਾਰਾ ਦਿਨ ਚੰਨੀ ਤੇ ਰੰਧਾਵਾ ਅਤੇ ਹੋਰ ਸਾਰੇ ਸਾਥੀ ਇੱਕ ਦੂਜੇ ਦੇ ਨਾਲ ਹੀ ਰਹੇ। ਚੰਨੀ ਦੇ ਨਾਲ ਰਹੇ ਇੱਕ ਕਾਂਗਰਸੀ ਆਗੂ ਨੇ ਅਪਣਾ ਨਾਮ ਨਾ ਛਾਪਣ ਦੀ ਸਰਤ ’ਤੇ ਦਸਿਆ ਕਿ ‘‘ ਹੋਟਲ ਦੇ ਰਾਸਤੇ ਤੱਕ ਜਾਂਦੇ ਸਮੇਂ ਖ਼ੁਦ ਉਨ੍ਹਾਂ ਨੂੰ ਖੁਦ ਕੁੱਝ ਪਤਾ ਨਹੀਂ ਸੀ । ’’ ਉਨ੍ਹਾਂ ਅੱਗੇ ਦਸਿਆ ਕਿ ਅੱਜ ਸੁਬਹ ਤੋਂ ਹੀ ਸੁਖਜਿੰਦਰ ਸਿੰਘ ਰੰਧਾਵਾ ਦੇ ਮੁੱਖ ਮੰਤਰੀ ਬਣਨ ਬਾਰੇ ਲਗਭਗ ਫ਼ਾਈਨਲ ਸੀ ਤੇ ਲਾਲ ਸਿੰਘ ਸ: ਰੰਧਾਵਾ ਦੇ ਘਰ ਆ ਕੇ ਸੀਐਲਪੀ ਦਾ ਲੀਡਰ ਚੁਣਨ ਲਈ ਰਸਮੀ ਕਾਰਵਾਈਆਂ ਪੂਰੀਆਂ ਕਰਨ ਵਾਸਤੇ ਦਸਖ਼ਤ ਵੀ ਕਰਵਾ ਕੇ ਲੈ ਗਏ ਸਨ। ਫ਼ਿਰ ਅਜਿਹਾ ਕੀ ਹੋਇਆ ਕਿ ਬਾਦਲਾਂ ਵਿਰੁਧ ਧਾਕੜ ਮੰਨੇ ਜਾਣ ਵਾਲੇ ਇਸ ਮਝੈਲ ਜਰਨੈਲ ਦੇ ਰਾਸਤੇ ਵਿਚ ਕੰਡੇ ਵਿਛ ਗਏ ਤੇ 57 ਸਾਲਾਂ ਬਾਅਦ ਮਾਲਵੇ ਤੋਂ ਮੁੱਖ ਮੰਤਰੀ ਦਾ ਅਹੁੱਦਾ ਮਾਝੇ ਵਿਚ ਜਾਂਦਾ ਜਾਂਦਾ ਰਹਿ ਗਿਆ? ਸੂਤਰਾਂ ਮੁਤਾਬਕ ਜਿੱਥੇ ਰੰਧਾਵਾ ਦੀ ਕਿਸਮਤ ਐਨ ਮੌਕੇ ’ਤੇ ਹਾਰ ਗਈ, ਉਥੇ ਨਵਜੋਤ ਸਿੱਧੂ ਤੇ ਜਾਖੜ ਧੜੇ ਦਾ ਅੰਦਰਖ਼ਾਤੇ ਵਿਰੋਧ ਵੀ ਉਨ੍ਹਾਂ ’ਤੇ ਭਾਰੂ ਪੈ ਗਿਆ। ਸੂਚਨਾ ਮੁਤਾਬਕ ਬੀਤੀ ਦੇਰ ਰਾਤ ਤੱਕ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਸੁਨੀਲ ਜਾਖੜ ਦਾ ਨਾਮ ਮੁੱਖ ਮੰਤਰੀ ਦੇ ਅਹੁੱਦੇ ਲਈ ਤੈਅ ਸੀ ਤੇ ਉਨ੍ਹਾਂ ਦੇ ਨਾਲ ਸੁਖਜਿੰਦਰ ਰੰਧਾਵਾ ਤੇ ਚਰਨਜੀਤ ਚੰਨੀ ਨੂੰ ਉਪ ਮੁੱਖ ਬਣਾਇਆ ਜਾਣਾ ਸੀ ਪ੍ਰੰਤੂ ਮਾਂਝਾ ਬਿ੍ਰਗੇਡ ਦੁਆਰਾ ਜਾਖੜ ਦੇ ਹਿੰਦੂ ਚੇਹਰੇ ਤੇ ਵਿਧਾਨ ਸਭਾ ਦੇ ਮੈਂਬਰ ਨਾ ਹੋਣ ਦਾ ਮੁੱਦਾ ਚੁੱਕ ਕੇ ਉਨ੍ਹਾਂ ਦਾ ਰਾਸਤਾ ਰੋਕ ਦਿੱਤਾ ਗਿਆ। ਜਦੋਂਕਿ ਹਾਈਕਮਾਂਡ ਵਲੋਂ ਸੱਦੀ ਸੀਨੀਅਰ ਮਹਿਲਾ ਆਗੂ ਅੰਬਿਕਾ ਸੋਨੀ ਨੇ ਵੀ ਇਹ ਕਹਿ ਕੇ ਬਲਦੀ ’ਤੇ ਤੇਲ ਪਾ ਦਿੱਤਾ ਕਿ ‘‘ ਦੇਸ ਦੇ ਇਕਲੌਤੇ ਸੂਬੇ ਪੰਜਾਬ ਵਿਚ ਗੈਰ ਸਿੱਖ ਚਿਹਰਾ ਅੱਗੇ ਲਿਆਉਣਾ ਕਾਂਗਰਸ ਨੂੰ ਮਹਿੰਗਾ ਪੈ ਸਕਦਾ ਹੈ।’’ ਜਿਸਤੋਂ ਬਾਅਦ ਕਹਾਣੀ ਬਦਲ ਗਈ ਤੇ ਸੁਖਜਿੰਦਰ ਰੰਧਾਵਾ ਵਿਧਾਇਕਾਂ ਤੇ ਹਾਈਕਮਾਂਡ ਦੀ ਪਸੰਦ ਬਣਨ ਲੱਗੇ। ਪ੍ਰੰਤੂ ਸੂਤਰਾਂ ਮੁਤਾਬਕ ਇਸ ਦੌਰਾਨ ਹੀ ਨਵਜੋਤ ਸਿੱਧੂ ਦੇ ਕੰਨ ਵਿਚ ਕਿਸੇ ਨੇ ਇਹ ਗੱਲ ਪਾ ਦਿੱਤੀ ਕਿ ਜੇਕਰ ਕਾਬਲ ਆਗੂ ਮੰਨੇ ਜਾਂਦੇ ਸੁਖਜਿੰਦਰ ਸਿੰਘ ਰੰਧਾਵਾ ਦੀ ਕਾਰਗੁਜ਼ਾਰੀ ਜਿਆਦਾ ਵਧੀਆ ਰਹੀ ਤਾਂ ਉਸਦੇ ਲਈ 2022 ਦਾ ਰਾਸਤਾ ਵੀ ਬੰਦ ਹੋ ਜਾਵੇਗਾ। ਇਸਦੇ ਇਲਾਵਾ ਅਪਣੇ ਘਰੋਂ ਨਿਕਲਦੇ ਸਮੇਂ ਰੰਧਾਵਾ ਦੁਆਰਾ ਇੱਕ ਸੁਲਝੇ ਆਗੂ ਵਾਂਗ ਕੈਪਟਨ ਅਮਰਿੰਦਰ ਸਿੰਘ ਨਾਲ ਸਬੰਧਾਂ ਬਾਰੇ ਕੀਤੀਆਂ ਬੇਬਾਕ ਟਿੱਪਣੀਆਂ ਵੀ ਕਈਆਂ ਦੇ ਮਨ ਨੂੰ ਦੁਖੀ ਕਰ ਗਈਆਂ। ਜਿਸਦੇ ਚੱਲਦੇ ਸਵੇਰ ਤੋਂ ਹੀ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਤੋਂ ਬਾਅਦ ਮੁੱਖ ਮੰਤਰੀ ਬਣਨ ਦੀ ਦੋੜ ’ਚ ਲੱਗੇ ‘ਗੁਰੂ’ ਵੀ ਇਸ ਅਹੁੱਦੇ ਲਈ ਅੜ ਗਏ ਤੇ ਹਾਈਕਮਾਂਡ ਲਈ ਅੱਗੇ ਦਾ ਰਾਸਤਾ ਕਾਫ਼ੀ ਔਖਾ ਹੋ ਗਿਆ। ਇਸ ਦੌਰਾਨ ਹਾਈਕਮਾਂਡ ਤੱਕ ਪਹੁੰਚ ਰੱਖਣ ਵਾਲੇ ਇੱਕ ਮਲਵਾਈ ਮੰਤਰੀ ਨੇ ਪੰਜਾਬ ’ਚ 32 ਫ਼ੀਸਦੀ ਦਲਿਤ ਆਬਾਦੀ ਤੇ ਵਿਰੋਧੀ ਪਾਰਟੀਆਂ ਵਲੋਂ ਦਲਿਤ ਮੁੱਖ ਮੰਤਰੀ ਤੇ ਉਪ ਮੁੱਖ ਮੰਤਰੀ ਬਣਾਉਣ ਦੇ ਕੀਤੇ ਐਲਾਨਾਂ ਦਾ ਹਵਾਲਾ ਦੇ ਕੇ ‘ਗੇਮ’ ਚੰਨੀ ਦੇ ਹੱਕ ਵਿਚ ਕਰ ਦਿੱਤੀ। ਇਸਦੇ ਨਾਲ ਜਾਖੜ ਤੇ ਸਿੱਧੂ ਵੀ ਸ਼ਾਂਤ ਹੋ ਗਏ। ਉਜ ਇਹ ਗੱਲ ਵੀ ਦਸਣੀ ਜਰੂਰੀ ਹੈ ਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਗੱਦਿਓ ਲਾਉਣ ਦੇ ਛਿੜੇ ਮਹਾਂਯੁੱਧ ਵਿਚ ਨਵਜੋਤ ਸਿੱਧੂ ਦੇ ਨਾਲ ਮਾਂਝਾ ਬਿ੍ਰਗੇਡ ਦੇ ਇਲਾਵਾ ਚਰਨਜੀਤ ਸਿੰਘ ਚੰਨੀ ਦੀ ਵੀ ਵੱਡੀ ਭੂਮਿਕਾ ਰਹੀ ਹੈ। ਜਿਸਦੇ ਚੱਲਦੇ ਆਉਣ ਵਾਲੇ ਦਿਨਾਂ ‘ਚ ਸਿੱਧੂ ਤੇ ਮਾਂਝਾ ਬਿ੍ਰਗੇਡ ਦੀ ਚੰਨੀ ਨਾਲ ਚਾਲ ਮਿਲਣ ’ਚ ਜਿਆਦਾ ਦਿੱਕਤ ਆਉਣ ਦੀ ਸੰਭਾਵਨਾ ਨਹੀਂ ਹੈ।

ਪਾਵਰਕਾਮ ਨੇ ਝੀਲ ਕਿਨਾਰੇ ਬਣੇ ਗੈਸਟ ਹਾਊਸ ਨੂੰ ਠੇਕੇ ’ਤੇ ਦੇਣ ਲਈ ਲਗਾਏ ਟੈਂਡਰ

ਸੁਖਜਿੰਦਰ ਮਾਨ

ਬਠਿੰਡਾ, 16 ਸਤੰਬਰ –ਸ੍ਰੀ ਗੁਰੂ ਨਾਨਕ ਦੇਵ ਦੀ 500 ਸਾਲਾਂ ਜਨਮ ਸਤਾਬਦੀ ਮੌਕੇ ਸ਼ੁਰੂ ਕੀਤੇ ਸਥਾਨਕ ਥਰਮਲ ਪਲਾਂਟ ਦੀਆਂ ਰਿਊੜੀਆਂ ਵੱਟਣ ਤੋਂ ਬਾਅਦ ਹੁਣ ਸਰਕਾਰ ਨੇ ਕੁੱਝ ਸਾਲ ਪਹਿਲਾਂ ਸੱਤ ਕਰੋੜ ਖਰਚ ਕਰਕੇ ਝੀਲਾਂ ਕਿਨਾਰੇ ਬਣਾਏ ਆਲੀਸ਼ਾਨ ਗੈਸਟ ਹਾਊਸ ਨੂੰ ਠੇਕੇਦਾਰਾਂ ਦੇ ਹੱਥਾਂ ’ਚ ਦੇਣ ਦੀ ਤਿਆਰੀ ਕਰ ਲਈ ਹੈ। ਥਰਮਲ ਦੀਆਂ ਐਨ ਝੀਲਾਂ ਦੇ ਵਿਚਕਾਰ ਬਣਿਆਂ ਇਹ ਗੈਸਟ ਕਸ਼ਮੀਰ ਦਾ ਭੁਲੇਖਾ ਪਾਉਂਦਾ ਹੈ। ਬਠਿੰਡਾ ਆਮਦ ਦੌਰਾਨ ਸੂਬੇ ਦੇ ਵੀਆਈਪੀ ਦੀ ਪਹਿਲੀ ‘ਪਸੰਦ’ ਬਣੇ ਇਸ ਲੈਕ ਵਿਊ ਗੈਸਟ ਹਾਊਸ ਨੂੰ ਪਾਵਰਕਾਮ ਨੇ ਠੇਕੇ ’ਤੇ ਚਾੜਣ ਦੀ ਤਿਆਰੀ ਕਰ ਲਈ ਹੈ। ਕਰੋੜਾਂ ਖ਼ਰਚ ਕਰਕੇ ਬਣਾਏ ਇਸ ਗੈਸਟ ਹਾਊਸ ਦੇ ਪ੍ਰਾਈਵੇਟਕਰਨ ਦੀਆਂ ਕਨਸੋਆਂ ਮਿਲਦੇ ਹੀ ਸ਼ਹਿਰ ਦੇ ਲੋਕਾਂ ਤੇ ਥਰਮਲ ਦੇ ਸਾਬਕਾ ਮੁਲਾਜਮਾਂ ਨੇ ਵਿਰੋਧ ਦੇ ਕਮਰਕਸੇ ਕਸ ਲਏ ਹਨ। ਦੂਜੇ ਪਾਸੇ ਵਿਰੋਧੀ ਪਾਰਟੀਆਂ ਨੇ ਸੱਤਾਧਿਰ ਉਪਰ ਥਰਮਲ ਪਲਾਂਟ ਦੀ ਤਰ੍ਹਾਂ ਇਸ ਗੈਸਟ ਹਾਊਸ ਦੀ ਕਰੋੜਾਂ ਦੀ ਜਾਇਦਾਦ ਨੂੰ ਕੋਡੀਆਂ ਦੇ ਭਾਅ ਚਹੇਤਿਆਂ ਨੂੰ ਦੇਣ ਦੇ ਦੋਸ਼ ਲਗਾਏ ਹਨ। ਜਿਕਰਯੋਗ ਹੈ ਕਿ ਪਿਛਲੀ ਅਕਾਲੀ ਸਰਕਾਰ ਦੌਰਾਨ ਸੁਖਬੀਰ ਸਿੰਘ ਬਾਦਲ ਦੀ ਦੇਖਰੇਖ ਹੇਠ ਪਾਵਰਕੌਮ ਵੱਲੋਂ ਇਸ ਗੈੱਸਟ ਹਾਊਸ ਨੂੰ ਵਿਦੇਸ਼ੀ ਤਰਜ਼ ’ਤੇ ਤਿਆਰ ਕੀਤਾ ਗਿਆ ਸੀ। 1970 ਦੇ ਦਹਾਕੇ ਵਿਚ ਬਣੇ ਇਸ ਗੈਸਟ ਹਾਊਸ ਉਪਰ ਕਰੀਬ ਸੱਤ ਕਰੋੜ ਰੁਪਏ ਖ਼ਰਚ ਕਰਕੇ ਇਸ ਦੋ ਮੰਜਿਲਾਂ ਇਮਾਰਤ ਵਿਚ 2 ਡੀਲਕਸ ਸੁਇਟ ਤੋਂ ਇਲਾਵਾ 6 ਏਅਰ ਕੰਡੀਸ਼ਨਰ ਲਗਜਰੀ ਕਮਰੇ ਤਿਆਰ ਕੀਤੇ ਗਏ ਸਨ। ਇਸ ਗੈਸਟ ਹਾਊਸ ਦੇ ਡੀਲਕਸ ਸੁਇਟ ਵਿਚ ਮੁੱਖ ਮੰਤਰੀ, ਮੰਤਰੀ ਤੇ ਪਿ੍ਰੰਸੀਪਲ ਸਕੱਤਰ ਤੋਂ ਉਪਰ ਦੇ ਉਚ ਅਧਿਕਾਰੀ ਹੀ ਠਹਿਰ ਸਕਦੇ ਹਨ। ਜਦੋਂਕਿ ਦੂਜੇ ਕਮਰਿਆਂ ਵਿਚ ਵੀ ਚੀਫ਼ ਇੰਜੀਨੀਅਰ ਤੇ ਆਈ.ਏ.ਐਸ, ਆਈ.ਪੀ.ਐਸ ਅਧਿਕਾਰੀ ਰਹਿ ਸਕਦੇ ਹਨ। ਸੂਤਰਾਂ ਮੁਤਾਬਕ ਇਸ ਗੈਸਟ ਹਾਊਸ ਦੇ ਰੱਖ-ਰਖਾਊ ਉਪਰ ਪਾਵਰਕਾਮ ਵਲੋਂ ਸਲਾਨਾ 25 ਲੱਖ ਰੁਪਏ ਦੇ ਕਰੀਬ ਖ਼ਰਚਾ ਕੀਤਾ ਜਾ ਰਿਹਾ ਹੈ। ਇਸ ਗੈਸਟ ਹਾਊਸ ਨੂੰ ਚਲਾਉਣ ਲਈ ਅੱਧੀ ਦਰਜ਼ਨ ਦੇ ਕਰੀਬ ਠੇਕੇ ’ਤੇ ਮੁਲਾਜਮ ਰੱਖੇ ਹੋਏ ਹਨ।
ਬਾਕਸ
ਠੇਕੇ ’ਤੇ ਲੈਣ ਦੇ ਚਾਹਵਾਨਾਂ ਨੇ ਬੀਅਰ ਬਾਰ ਖੋਲਣ ਦੀ ਕੀਤੀ ਮੰਗ
ਬਠਿੰਡਾ: ਪਾਵਰਕਾਮ ਵਲੋਂ ਇਸ ਗੈਸਟ ਹਾਊਸ ਨੂੰ ਠੇਕੇ ’ਤੇ ਦੇਣ ਲਈ ਠੇਕੇਦਾਰਾਂ ਤੋਂ ਮੰਗੇ ਟੈਂਡਰਾਂ ਵਿਚ 3-4 ਪਾਰਟੀਆਂ ਵਲੋਂ ਉਤਸ਼ਾਹ ਦਿਖਾਉਣ ਦੀ ਸੂਚਨਾ ਹੈ। ਸੂਤਰਾਂ ਨੇ ਖ਼ੁਲਾਸਾ ਕੀਤਾ ਕਿ ਇੰਨ੍ਹਾਂ ਪਾਰਟੀਆਂ ਨੇ ਇਸ ਗੈਸਟ ਹਾਊਸ ਵਿਚ ਗਜੀਬੋ ਲਗਾਉਣ ਤੇ ਬੀਅਰ ਬਾਰ ਆਦਿ ਖੋਲਣ ਦੀ ਸ਼ਰਤ ਰੱਖੀ ਹੈ ਪ੍ਰੰਤੂ ਅਥਾਰਟੀ ਹਾਲੇ ਇਸਦੇ ਲਈ ਤਿਆਰ ਨਹੀਂ ਹੋਈ ਹੈ। ਜਿਸਦੇ ਚੱਲਦੇ ਪਾਵਰਕਾਮ ਅਥਾਰਟੀ ਨੇ ਕੋਈ ਹੋਰ ਬਦਲ ਤਲਾਸ਼ਣ ਲਈ ਕਿਹਾ ਹੈ।
ਬਾਕਸ
ਥਰਮਲ ਇੰਪਲਾਈਜ਼ ਫ਼ੈਡਰੇਸ਼ਨ ਨੇ ਕੀਤਾ ਵਿਰੋਧ
ਬਠਿੰਡਾ: ਪਹਿਲਾਂ ਹੀ ਥਰਮਲ ਪਲਾਂਟ ਨੂੰ ਮਲਟੀਮੇਟ ਕਰਨ ਤੋਂ ਦੁਖੀ ਸ਼੍ਰੀ ਗੁਰੂ ਨਾਨਕ ਦੇਵ ਥਰਮਲ ਪਲਾਂਟ ਇੰਪਲਾਇਜ ਫੈਡਰੇਸ਼ਨ ਨੇ ਪਾਵਰਕਾਮ ਅਥਾਰਟੀ ਦੇ ਇਸ ਫੈਸਲੇ ਦਾ ਸਖ਼ਤ ਵਿਰੋਧ ਕੀਤਾ ਹੈ। ਫੈਡਰੇਸ਼ਨ ਦੇ ਪ੍ਰਧਾਨ ਗੁਰਸੇਵਕ ਸਿੰਘ ਸੰਧੂ ਨੇ ਕਿਹਾ ਕਿ ‘‘ਪਹਿਲਾ ਤਤਕਾਲੀ ਸਰਕਾਰ ਨੇ ਥਰਮਲ ਦੀ ਜ਼ਮੀਨ ਨੂੰ ਟੋਟੇ ਕਰ ਕੇ ਅੰਬੂਜਾ ਸੀਮਿੰਟ ਫ਼ੈਕਟਰੀ ਨੂੰ ਦਿੱਤੀ ਗਈ ਅਤੇ ਹੁਣ ਮੌਜੂਦਾ ਸਰਕਾਰ ਨੇ 2200 ਕਰੋੜ ਦੀ ਮਿਸ਼ਨਰੀ 164 ਕਰੋੜ ਵਿਚ ਮੁੰਬਈ ਦੀ ਕੰਪਨੀ ਨੂੰ ਵੇਚ ਦਿੱਤਾ ਹੈ ਅਤੇ 1364 ਏਕੜ ਜਮੀਨ ਪੁੱਡਾ ਦੇ ਹਵਾਲੇ ਕਰ ਦਿੱਤੀ ਹੈ। ’’ ਉਧਰ ਜਮਹੂਰੀ ਅਧਿਕਾਰ ਸਭਾ ਨੇ ਇਸ ਫੈਸਲਾ ਦਾ ਵਿਰੋਧ ਕਰਦਿਆਂ ਕਿਹਾ ਕਿ ਲੋਕ ਇਸ ਨੂੰ ਬਰਦਾਸਤ ਨਹੀਂ ਕਰਨਗੇ। ਸਭਾ ਦੇ ਸਕੱਤਰ ਡਾ ਅਜੀਤਪਾਲ ਸਿੰਘ ਨੇ ਕਿਹਾ ਕਿ ਕੈਪਟਨ ਤੇ ਮੋਦੀ ਸਰਕਾਰ ਦੋਨੋਂ ਹੀ ਕਾਰਪੋਰੇਟ ਘਰਾਣਿਆਂ ਪੱਖੀ ਨੀਤੀਆਂ ਨੂੰ ਲਾਗੂ ਕਰ ਰਹੀਆਂ ਹਨ।
ਵੇਚਣ ਲਈ ਨਹੀਂ, ਠੇਕੇ ’ਤੇ ਦੇਣ ਲਈ ਲਗਾਏ ਸਨ ਟੈਂਡਰ-ਜਰਨਲ ਮੈਨੇਜਰ
ਬਠਿੰਡਾ: ਦੂਜੇ ਪਾਸੇ ਸ਼੍ਰੀ ਗੁਰੂ ਨਾਨਕ ਦੇਵ ਥਰਮਲ ਪਲਾਂਟ ਬਠਿੰਡਾ ਦੇ ਜਰਨਲ ਮੈਨੇਜਰ ਕੁਲਦੀਪ ਕੁਮਾਰ ਨੇ ਸੰਪਰਕ ਕਰਨ ’ਤੇ ਦਾਅਵਾ ਕੀਤਾ ਕਿ ਲੇਕ ਵੀਊ ਗੈੱਸਟ ਹਾਊਸ ਨੂੰ ਵੇਚਣ ਲਈ ਨਹੀਂ, ਬਲਕਿ ਲੀਜ਼ ’ਤੇ ਦੇਣ ਲਈ ਟੈਂਡਰ ਲਗਾਏ ਗਏ ਸਨ ਪ੍ਰੰਤੂ ਤਿੰਨ-ਚਾਰ ਪਾਰਟੀਆਂ ਵਲੋਂ ਰੁਚੀ ਦਿਖਾਉਣ ਦੇ ਬਾਵਜੂਦ ਰੱਖੀਆਂ ਸਰਤਾਂ ਅਥਾਰਟੀ ਨੂੰ ਮੰਨਜੂਰ ਨਹੀਂ। ਜਿਸਦੇ ਚੱਲਦੇ ਇਸਨੂੰ ਚਲਾਉਣ ਲਈ ਕੋਈ ਹੋਰ ਬਦਲ ਦੇਖਿਆ ਜਾ ਰਿਹਾ ਹੈ।