ਰਿਸ਼ੀ ਸੂਨਕ ਦੇ ਵੱਡ-ਵਡੇਰੇ ਅਣਵੰਡੇ ਪੰਜਾਬ ਦੇ ਗੁੱਜਰਾਂਵਾਲਾ ਦੇ ਸਨ ਰਹਿਣ ਵਾਲੇ
ਪੰਜਾਬੀ ਖਬਰਸਾਰ ਬਿਉਰੋ
ਲੰਡਨ, 24 ਅਕਤੂਬਰ: ਜਿਸ ਅੰਗਰੇਜ਼ ਦੇ ਰਾਜ ‘ ਚ ਕਦੇ ਸੂਰਜ ਨਹੀਂ ਛਿਪਦਾ ਸੀ ਤੇ ਭਾਰਤ ਉਪਰ ਇੰਨਾਂ ਦਾ ਕਰੀਬ 300 ਸਾਲ ਰਾਜ ਰਿਹਾ, ਅੱਜ ਦੀਵਾਲੀ ਮੌਕੇ ਉਸੇ ਭਾਰਤ ਦੇ ਇੱਕ ਪੰਜਾਬੀ ਪੁੱਤ ਰਿਸੀ ਸੂਨਕ ਇੰਗਲੈਂਡ ਦੇ ਪਹਿਲੇ ਭਾਰਤੀ ਮੁਲ ਦੇ ਪ੍ਰਧਾਨ ਮੰਤਰੀ ਬਣਨ ਜਾ ਰਹੇ ਹਨ। ਮੌਜੂਦਾ ਪ੍ਰਧਾਨ ਮੰਤਰੀ ਲਿਜ ਟਰੱਸ ਵਲੋਂ ਅਚਾਨਕ ਅਸਤੀਫਾ ਦੇਣ ਤੋਂ ਬਾਅਦ ਕੰਜਰਵੇਟਿਵ ਪਾਰਟੀ ਦੇ ਲੀਡਰ ਵਜੋਂ ਅੱਗੇ ਆਏ ਰਿਸ਼ੀ ਹੁਣ ਮੁਕਾਬਲੇ ਵਿੱਚ ਇਕੱਲੇ ਰਹਿ ਗਏ ਹਨ, ਜਿਸਦੇ ਚੱਲਦੇ ਉਨ੍ਹਾਂ ਦਾ ਪ੍ਰਧਾਨ ਮੰਤਰੀ ਬਣਨਾ ਤੈਅ ਹੈ। ਜਿਕਰਯੋਗ ਹੈ ਕਿ ਰਿਸ਼ੀ ਸ਼ੂਨਕ ਦੇ ਪੁਰਖੇ ਅਣਵੰਡੇ ਪੰਜਾਬ ਦੇ ਗੁਜਰਾਂਵਾਲਾ ਦੇ ਰਹਿਣ ਵਾਲੇ ਸਨ, ਜਿੱਥੋਂ ਦੇ ਮਹਾਰਾਜਾ ਰਣਜੀਤ ਸਿੰਘ ਦੇ ਜਿਉਂਦੇ ਜੀਅ ਕਦੇ ਇੰਨਾਂ ਅੰਗਰੇਜ਼ਾਂ ਦੀ ਪੰਜਾਬ ਵੱਲ ਅੱਖ ਚੁੱਕ ਕੇ ਦੇਖਣ ਦੀ ਜੁਰਅਤ ਨਹੀਂ ਰਹੀ ਸੀ। ਭਾਰਤ ਪਾਕਿਸਤਾਨ ਦੀ ਵੰਡ ਤੋਂ ਬਾਅਦ ਸੂਨਕ ਦੇ ਵਡੇਰੇ ਭਾਰਤ ਵਿੱਚ ਆ ਕੇ ਵਸ ਗਏ, ਜਿੱਥੋਂ ਉਹ ਅਫਰੀਕਾ ਚਲੇ ਗਏ ਤੇ ਅਖੀਰ ਇੰਗਲੈਂਡ ਵਸ ਗਏ। ਇੰਗਲੈਂਡ ਦੇ ਰਿਚਮੰਡ ਹਲਕੇ ਤੋਂ ਸਾਲ 2015 ਤੋਂ ਐਮ ਪੀ ਚੱਲੇ ਆ ਰਹੇ ਰਿਸ਼ੀ ਦਾ ਵਿਆਹ ਭਾਰਤੀ ਮੂਲ ਦੇ ਇੰਗਲੈਂਡ ਵਾਸੀ ਅਰਬਪਤੀ ਐਨ ਆਰ ਮੂਰਤੀ ਨਰਾਇਣ ਦੀ ਪੁੱਤਰੀ ਅਕਸਤਾ ਨਾਲ ਹੋਇਆ ਸੀ ਦੇ ਦੋਨਾਂ ਦੇ ਘਰ ਦੋ ਬੇਟੀਆਂ ਹਨ। ਇੱਥੇ ਇਹ ਵੀ ਦੱਸਣ ਬਣਦਾ ਹੈ ਕਿ ਇਸਤੋਂ ਪਹਿਲਾਂ ਜੁਲਾਈ ਮਹੀਨੇ ਵਿੱਚ ਵੀ ਰਿਸ਼ੀ ਸ਼ੂਨਕ ਨੇ ਪ੍ਰਧਾਨ ਮੰਤਰੀ ਦੇ ਅਹੁੱਦੇ ਲਈ ਦਾਅਵੇਦਾਰੀ ਜਤਾਈ ਸੀ ਜਦ ਤਤਕਾਲੀ ਪ੍ਰਧਾਨ ਮੰਤਰੀ ਬੋਰਿਸ ਜੋਹਨਸਨ ਨੇ ਅਹੁੱਦੇ ਤੋਂ ਅਸਤੀਫਾ ਦਿੱਤਾ ਸੀ ਪਰੰਤੂ ਉਹ ਲਿੱਜ ਟਰੱਸ ਨਾਲ ਹੋਏ ਸਖ਼ਤ ਮੁਕਾਬਲੇ ਕਾਰਨ ਦੋੜ ਵਿਚੋਂ ਬਾਹਰ ਹੋ ਗਏ ਸਨ ਪਰੰਤੂ ਹੁਣ ਟਰੱਸ ਵਲੋਂ ਅਸਤੀਫਾ ਦੇਣ ਤੋਂ ਬਾਅਦ ਕੰਜਰਵੇਟਿਵ ਪਾਰਟੀ ਦੇ ਸੰਸਦਾਂ ਨੇ ਉਨ੍ਹਾਂ ਉਪਰ ਭਰੋਸਾ ਜਤਾਇਆ ਹੈ।
